រាជធានីភ្នំពេញ ៖ តារាសម្តែង និងបង្ហាញម៉ូតនាង កុយ អេណា ត្រូវបានតែងតែជាទូតសុឆន្ទះសម្រាប់ក្រសួងកិច្ចការនារីក្នុងបេសកម្មលើកកម្ពស់តម្លៃនារីមិនថា ក្មេងស្រី ឬស្ត្រីមានពិការភាព ។ការប្រកាសតែងតាំងនេះ…
រាជធានីភ្នំពេញ ៖ តារាសម្តែង និងបង្ហាញម៉ូតនាង កុយ អេណា ត្រូវបានតែងតែជាទូតសុឆន្ទះសម្រាប់ក្រសួងកិច្ចការនារីក្នុងបេសកម្មលើកកម្ពស់តម្លៃនារីមិនថា ក្មេងស្រី ឬស្ត្រីមានពិការភាព ។
ការប្រកាសតែងតាំងនេះ បានធ្វើឡើងក្នុងឨកាសតារាស្រីរូបនេះ ត្រូវបានអនុញ្ញាតអោយចូលជួបសម្តែងការគួរសមជាមួយលោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងជាប្រធានក្រុមប្រឹក្សាជាតិកម្ពុជាដើម្បីស្ត្រី កាលពីថ្ងៃទី២២ ខែតុលា ឆ្នាំ២០២៥ ។
ក្រោយទទួលបានតំណែងខាងលើនេះ កុយ អេណា បានសម្តែងក្តីរីករាយ និងមោទនភាពយ៉ាងខ្លាំង ក្នុងពេលដែលនាងមានឨកាសចូលរួមផ្សព្វផ្សាយភាពគំរូ និងស្នាដៃរបស់ស្ត្រីក្នុងការអភិវឌ្ឍន៍សង្គមជាតិ ។
តាមរយៈសំណេរបង្ហោះលើបណ្តាញសង្គម កុយ អេណា បានលើកឡើងថា នាងខ្ញុំមានមោទនភាពដែលត្រូវបានតែងតាំងក្នុងតំណែងជាទូតសុឆន្ទៈថ្មីរបស់ក្រសួងកិច្ចការនារីពីសំណាក់លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី ដើម្បីចូលរួមលើកកម្ពស់តម្លៃនារី មិនថាជាក្មេងស្រី ឬស្ត្រីមានពិការភាព និងផ្សព្វផ្សាយភាពជាគម្រូ ព្រមទាំងស្នាដៃរបស់ស្ត្រីដែលមានសក្តានុពលក្នុងការចូលរួមអភិវឌ្ឍសង្គមជាតិ។
ដោយឡែក នៅអំឡុងពេលដឹកនាំ កុយ អេណា ចូលជួបសម្តែងការគួរសមជាមួយលោកជំទាវរដ្ឋមន្ត្រី ក្រសួងកិច្ចការនារីនោះ លោកជំទាវ ញ៉ែម មរកត រដ្ឋលេខាធិការបានលើកឡើងសរសេរតារាស្រីរូបនេះថា ខ្ញុំមានមោទនភាពក្រៃលែង មិនស្តាយពេលវេលា កម្លាំងកាយចិត្តក្នុងការគាំទ្រផ្តល់ភាពកក់ក្តៅ ជម្រុញទឹកចិត្ត ពិគ្រោះយោបល់ ចែករំលែកបទពិសោធន៍ទៅក្មេងស្រីដែលមានអាយុត្រឹម២៤ឆ្នាំ ក្រៅពីសម្រស់ស្អាតចរិតទន់ភ្លន់ ឧស្សាហ៍ព្យាយាម អេណា មានឆន្ទៈមោះមុតក្នុងការអភិវឌ្ឍន៍ខ្លួន និងចូលរួមជួយកិច្ចការសង្គម។ល។
លោកជំទាវបញ្ជាក់ថា គិតត្រឹម១អាទិត្យ អេណាទទួលបានកិត្តិយសដ៍ខ្ពស់ខ្ពស់ តែងតាំងជា
ទី១-ទូតសុឆន្ទៈសប្បុរសធ៍មរបស់ជនមានពិការភាពភ្នែក និងកាយសម្បទា (ដែលស្នើដោយជនមានពិការភាពភ្នែក កាយសម្បទាជិត១ពាន់នាក់) ទី២-ទូតសុឆន្ទៈរបស់ក្រសួងកិច្ចការនារី (តាមការតែងតាំងរបស់លោកជំទាវរដ្ឋមន្ត្រី) ។
លោកជំទាវបន្តថា បេសកម្មទាំង២ គឺមានសារសំខាន់ដូចគ្នាក្នុងការផ្សព្វផ្សាយផ្តល់ក្តីសង្ឃឹមនិងលើកទឹកចិត្តដល់ស្ត្រី ក្មេងស្រី កុមារីកុមារាជនពិការគ្រប់ប្រភេទ និងជាទូតសុឆន្ទៈរបស់ក្រសួងកិច្ចការនារីក្នុងការចូលរួមផ្សព្វផ្សាយពីភាពជាគំរូ តម្លៃ និងស្នាដៃរបស់ស្ត្រី ដែលជាកម្លាំងចលករដ៏សំខាន់ និងមានសក្តានុពលក្នុងការរួមចំណែកអភិវឌ្ឍន៍សេដ្ឋកិច្ច និងសង្គម ។
គួរបញ្ជាក់ថា កាលពីពេលថ្មីៗនេះ កុយ អេណា បានបង្ហាញតួលេខសរុបចំនួនថវិកាដែលនាងទទួលបានពីសប្បុរសជននានាពីព្រឹត្តការដើរថ្មីជើងរបស់នាងពីភ្នំពេញទៅកាន់ខេត្តសៀមរាប ដែលទើបតែបានបញ្ចប់កាលពីពេលថ្មីៗនេះ ។
កុយ អេណា បានបញ្ជាក់ថា ចំនួនថវិកាដែលនាងទទួលបានពីសប្បុរសនៃព្រឹត្តការខាងលើនេះមានចំនួនជាង១២ម៉ឺនដុល្លារអាមេរិក ហើយថវិកាទាំងអស់នេះនាងនឹងប្រើប្រាស់សម្រាប់ជួយដល់ជនពិការនៅកម្ពុជា ។
កុយ អេណា បានលើកឡើងថា ការដែលនាងបង្កើតនូវព្រឹត្តការមួយនេះគឺជារឿងអស្ចារ្យមួយសម្រាប់នាង ហើយនាងក៏មិននឹកស្មានដល់សម្រាប់ការគាំទ្រយ៉ាងច្រើនពីមហាជន ជាពិសេសសប្បុរសជននានាដែលបានជួយឧបត្ថម្ភជាបន្តបន្ទាប់ ។ នាងថា សម្រាប់ទឹកប្រាក់ដែលនាងទទួលបានពីសប្បុរសជននានានោះមានចំនួនសរុប១២៤.៦១៦ដុល្លារ ដែលថវិកានេះគឺមានចំនួនច្រើន និងលើសពីការរំពឹងទុករបស់នាង ។ យ៉ាងណា សម្រាប់ថវិកាដ៏ច្រើននេះនាងពិតជាអរគុណទៅដល់សប្បុរសជនទាំងអស់ដែលបានចូលរួមមកកាន់មូលនិធិរបស់នាង ។
នាងបន្ថែមថា គោលបំណងដែលនាងធ្វើរឿងខាងលើនេះឡើង ដោយទីមួយនាងចង់បំពេញបំណងខ្លួនឯងនៅក្នុងការដើរដោយថ្មើរជើងពីភ្នំពេញទៅកាន់ខេត្តសៀមរាប និងទីពីរគឺនាងបានជួបសំណេះសំណាលដោយផ្ទាល់ជាមួយបងស្រីម្នាក់ដែលជាជនពិការ ហើយគាត់ជាអ្នកម៉ាស្សាសម្រាប់រូបនាងតែម្តង ហើយជាមនុស្សដែលជម្រុញឲ្យនាងបង្កើតព្រឹត្តការនេះឡើង ៕
ចែករំលែកព័តមាននេះ