ខេត្តសៀមរាប ៖ កម្លាំងនគរបាលការិយាល័យអន្តរាគមន៍ និងតម្រួតបទបញ្ជានៃស្នងការដ្ឋាននគរបាលខេត្ត ដឹកនាំដោយលោក ជា រតនៈ នាយការិយាល័យ បានបង្ក្រាបក្មេងទំនើងសុទ្ធតែស្ទាវជាង៣០នាក់ មានប្រុសមានស្រីអាយុប្រហែល២០ឆ្នាំប៉ុណ្ណោះ…
ខេត្តសៀមរាប ៖ កម្លាំងនគរបាលការិយាល័យអន្តរាគមន៍ និងតម្រួតបទបញ្ជានៃស្នងការដ្ឋាន
នគរបាលខេត្ត ដឹកនាំដោយលោក ជា រតនៈ នាយការិយាល័យ បានបង្ក្រាបក្មេងទំនើងសុទ្ធតែស្ទាវជាង៣០នាក់ មានប្រុសមានស្រីអាយុប្រហែល២០ឆ្នាំប៉ុណ្ណោះ ដែលដេញកាប់ចាក់គ្នាទាំងព្រលឹមអុរ នៅកណ្តាលក្រុងសៀមរាប រួចនាំយកមកសាកសួរ ។
ការបង្ក្រាបនេះ បានធ្វើឡើងកាលពីថ្ងៃទី១១ ខែតុលា ឆ្នាំ២០១៥កន្លងទៅ នៅកណ្តាលក្រុងសៀមរាប ដែលតាមលោកវរសេនីយ៍ឯក ជា រតន: ឱ្យដឹងថា ក្រុមក្មេងទំនើងទាំងនេះ តែងតែធ្វើសកម្មភាពអុកឡុក និងកាប់ចាក់គ្នានៅវេលាទៀបភ្លឺ ។
ដើម្បីអនុវត្តឱ្យបាននូវបទបញ្ជារបស់លោកស្នងការនគរបាលខេត្ត កងកម្លាំងនគរបាលបានធ្វើការបង្ក្រាបក្រុមក្មេងទំនើងទាំងនេះយ៉ាងសកម្ម ហើយឃាត់ខ្លួនបានជាបន្តបន្ទាប់យកមកប្រមូលផ្តុំគ្នានៅខាងកើតស្ពានថ្មព្រះរាជដំណាក់មុខហាងលក់ឥតល្ហែ រួចបញ្ជូនទៅកាន់ការិយាល័យនគរបាលព្រហ្មទណ្ឌកម្រិតស្រាលខេត្ត ដើម្បីធ្វើការស្រាវជ្រាវត្រួតពិនិត្យរកសារធាតុញៀននៅក្នុងខ្លួនគ្រប់គ្នាផងដែរ ។
លោកនាយការិយាល័យបញ្ជាក់ថា នេះជាការរឹតបន្តឹងវិធានការចំពោះក្រុមក្មេងទំនើងដែលធ្វើសកម្មភាពឱ្យខូចសណ្តាប់ធ្នាប់ និងបង្កអសន្តិសុខក្នុងក្រុងសៀមរាប នៅពេលដែលកងកម្លាំងមានភារកិច្ចក្នុងការការពារព្រំដែន ។ ប្រភពមួយរាយការណ៍ថា នៅវេលាម៉ោងជាង៤ទៀបភ្លឺថ្ងៃទី១១ ខែតុលា ឆ្នាំ២០២៥ក្មេងទំនើង២ក្រុម មានប្រុសមានស្រីបានជួបជុំបើកឆាកប្រយុទ្ធគ្នានៅតាមដងផ្លូវសាធារណៈកណ្តាលក្រុងសៀមរាបហើយកងកម្លាំងនគរបាលអន្តរាគមន៍ និងតម្រូតបទបញ្ជានៃស្នងការដ្ឋាននគរបាលខេត្ត ចេញធ្វើសកម្មភាពឃាត់ខ្លួនបានជាបន្តបន្ទាប់ចំនួន៣០នាក់ ក្នុងនោះស្រី៦នាក់ និងម៉ូតូ ១១គ្រឿង ។
សូមបញ្ជាក់ថា ក្នុងពេលបង្ក្រាបក្រុមក្មេងទំនើងទាំងនេះ ធ្វើឱ្យកងកម្លាំងរងរបួសដៃម្នាក់ដោយក្រុមក្មេងទំនើងទាំងនេះជិះម៉ូតូបំបុក ។បច្ចុប្បន្ន ក្មេងទំនើងទាំង២ក្រុម និងវត្ថុតាង ត្រូវបាននគរបាលការិយាល័យព្រហ្មទណ្ឌកម្រិតស្រាលខេត្តរៀបចំកសាងសំណុំរឿងបញ្ជូនទៅសាលាដំបូងខេត្ត ចាត់ការបន្តទៅតាមផ្លូវច្បាប់ ៕
ចែករំលែកព័តមាននេះ