រាជធានីភ្នំពេញ ៖ សពបុរសម្នាក់ ដែលបានលោតចុះទៅក្នុងប្រឡាយ ដើម្បីជួយស្រីស្នេហ៍ ដែលរអិលជើងធ្លាក់ទឹកប្រឡាយ ហើយលិចបាត់ស្លាប់ទាំង២នាក់ ត្រូវបានក្រុមគ្រួសារ និងជនជាតិឥស្លាម ជួយស្វែងរកឃើញហើយ…
រាជធានីភ្នំពេញ ៖ សពបុរសម្នាក់ ដែលបានលោតចុះទៅក្នុងប្រឡាយ ដើម្បីជួយស្រីស្នេហ៍ ដែលរអិលជើងធ្លាក់ទឹកប្រឡាយ ហើយលិចបាត់ស្លាប់ទាំង២នាក់ ត្រូវបានក្រុមគ្រួសារ និងជនជាតិឥស្លាម ជួយស្វែងរកឃើញហើយ នៅវេលា៧និង២០នាទីយប់ ថ្ងៃទី១៣ ខែតុលា ឆ្នាំ២០២៥នេះ បន្ទាប់ពីកម្លាំងកងពលតូច ទ័ពពិសេសឆ័ត្រយោង៩១១ បានងូងរាវរកមិនឃើញ ហើយដកថយទៅវិញ ។
បុរសរូបនោះឈ្មោះ វុទ្ធ សំណាង អាយុ៣៥ឆ្នាំ មានទីលំនៅភូមិអន្លូងគងថ្មី សង្កាត់ព្រៃស ខណ្ឌដង្កោ រាជធានីភ្នំពេញ មានប្រពន្ធ និងកូន២នាក់ ។
គួរបញ្ជាក់ថា កាលពីយប់ពីវេលាម៉ោង៤និង៣៤នាទីទៀបភ្លឺថ្ងៃទី១១ ខែតុលា ឆ្នាំ២០២៥ នៅចំណុចប្រឡាយទឹកស្អយស្តុបលូ៣ ក្នុងភូមិទ្រា២ សង្កាត់ស្ទឹងមានជ័យ៣ ខណ្ឌមានជ័យ និងបង្កបុរសរូបនោះបានលោតចុះទៅក្នុងប្រឡាយ ដើម្បីជួយស្រីស្នេហ៍របស់ខ្លួន ដែលបានរអិលជើងធ្លាក់ចូលទៅក្នុងប្រឡាយ ហើយបានលិចបាត់ស្លាប់បាត់បង់ជីវិតទាំងពីរនាក់។ លុះក្រោយមក នៅវេលាម៉ោង៤ទៀបភ្លឺថ្ងៃទី១២ ខែតុលា ឆ្នាំ ២០២៥ សពស្រីស្នេហ៍ឈ្មោះ សែម ស្រី អូន អាយុ៣០ឆ្នាំ មុខរបរបម្រើការនៅហាងខារ៉ាអូខេ ស្នាក់នៅភូមិត្រពាំងស្វាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ បានអណ្តែតនៅចំណុចប្រឡាយលូ ស្ទឹងមានជ័យ សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ ។
តាមកាមេរ៉ាសុវត្ថិភាព បានបង្ហាញអោយដឹងថា នៅយប់កើតហេតុ វេលាម៉ោង៤និង៣៤នាទីទៀបភ្លឺ ថ្ងៃទី១១ ខែតុលា ឆ្នាំ២០២៥ នៅពេលមេឃភ្លៀងធ្លាក់ គេបានឃើញរថយន្ត Toyota Prius ពណ៌ទឹកប្រាក់ មិនចាំផ្លាកលេខ បានឈប់នៅនៅកន្លែងកើតហេតុ។ បន្ទាប់មកគេបានឃើញបុរសម្នាក់ ពាក់អាវយឺតពណ៌ស ចេញពីរថយន្តទ្វារខាងស្តាំ ដើរចេញទៅក្អួតចង្អោរក្បែរបង្គោលភ្លើង ។ ក្រោយមក គេឃើញនារីម្នាក់បើកទ្វារខាងឆ្វេង ចេញពីរថយន្ត ដើរទៅរកបុរសខាងលើ ដោយស្ទុះទៅអោបដោយភាពស្និទ្ធស្នាលក្នុងស្ថានភាពស្រវឹង។ លុះក្រោយមកពួកគេទាំងពីរ ក៏បានអោបគ្នាដើរ ទៅឈរបង្កាន់ដៃមាត់ប្រឡាយលូ ។
តាមកាមេរ៉ាសុវត្ថិភាពបានអោយដឹងទៀតថា ខណៈនោះ គេឃើញស្ត្រីជាសង្សារ បានរអិលជើងធ្លាក់ចូលក្នុងប្រឡាយទឹកស្អុយ ភ្លាមនោះខាងប្រុស ក៏បានលោតចុះទៅជួយ ហើយលិចបាត់ទាំងពីរនាក់។ បន្ទាប់ពីលិចបាត់ រកសពមិនឃើញ នៅវេលាថ្ងៃត្រង់ទី១៣ ខែតុលា កងពលតូចទ័ពពិសេសឆ័ត្រយោង៩១១ បានចុះទៅអន្តរាគមន៍ ដើម្បីរកសាកសពបុរសខាងលើ ខណៈនោះ ស្ត្រីជាប្រពន្ធ ក៏បានចុះទៅកន្លែងកើតហេតុផងដែរ និងបានសូមបន់ស្រន់ឲ្យរកឃើញសពប្ដី និងបានអហោសកម្មគ្រប់យ៉ាង មិនយកទោសពៃអ្វីឡើយ សូមឱ្យរកសពឃើញ ដើម្បីយកទៅធ្វើបុណ្យ។ ការរុករកសពពីសំណាក់កងពលតូចទ័ពពិសេសឆ័ត្រយោង៩១១ ពុំឃើញឡើយ ក៏បានដកថយវិញ ក្រោយមកជនជាតិអ៊ីស្លាម និងក្រុមគ្រួសារជនរងគ្រោះ ក៏បានបន្តរុករកនៅតាមប្រពន្ធលូ ហើយប្រទះឃើញ ដោយសព បើកគម្របអណ្តូងលូឃើញ ក៏ប្រាប់ក្រុមគ្រួសារមកនាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ