រាជធានីភ្នំពេញ ៖ ក្មេងប្រុសជំទង់ម្នាក់ មានមុខរបរជាជាងផ្សារដែក ខណៈឡើងទៅជួសជុលដំបូលឃ្លាំង ស្តុកទំនិញមួយកន្លែង ជាអកុសលបានជាន់លើស័ង្កសីជ័រសថ្លា បណ្ដាលឲ្យផុងធ្លាក់បោកផ្កាប់មុខលើសាបខាងក្រោមបែកក្បាលស្លាប់ភ្លាមៗនៅនឹងកន្លែង ។ ហេតុការណ៍ខាងលើនេះបានបង្កឲ្យមានការភ្ញាក់ផ្អើលកាលពីវេលាម៉ោងជាង២រសៀលថ្ងៃទី១០…
រាជធានីភ្នំពេញ ៖ ក្មេងប្រុសជំទង់ម្នាក់ មានមុខរបរជាជាងផ្សារដែក ខណៈឡើងទៅជួសជុលដំបូលឃ្លាំង ស្តុកទំនិញមួយកន្លែង ជាអកុសលបានជាន់លើស័ង្កសីជ័រសថ្លា បណ្ដាលឲ្យផុងធ្លាក់បោកផ្កាប់មុខលើសាបខាងក្រោមបែកក្បាលស្លាប់ភ្លាមៗនៅនឹងកន្លែង ។
ហេតុការណ៍ខាងលើនេះបានបង្កឲ្យមានការភ្ញាក់ផ្អើលកាលពីវេលាម៉ោងជាង២រសៀលថ្ងៃទី១០ ខែតុលា ឆ្នាំ២០២៥ នៅចំណុចឃ្លាំងស្តុកទំនិញខាងលើ ដែលមានទីតាំងស្ថិតនៅតាមផ្លូវបេតុងភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។
ក្មេងប្រុសជំទង់រងគ្រោះខាងលើនោះឈ្មោះ ភឹម សីហា អាយុ១៦ឆ្នាំ មុខរបរជាងដែក មានស្រុកកំណើតនៅភូមិត្នោតជ្រុំ ឃុំល្វា ស្រុកព្រះស្ដេច ខេត្តព្រៃវែង ។
តាមប្រភពពីកន្លែងកើតហេតុបានប្រាប់ឲ្យដឹងថា មុនពេលជួបគ្រោះអកុសលរហូតដល់មានអ្នកស្លាប់បែបនេះ ម្ចាស់ឃ្លាំងខាងលើបានជួលក្រុមជាងដែក១ក្រុមឲ្យទៅជួសជុលដំបូលឃ្លាំង ព្រោះតែពេលភ្លៀងមកម្ដងៗដំបូលឃ្លាំហនោះលិចទឹកប៉ះពាល់ទំនិញ ។ ដោយឡែកក្នុងចំណោមជាងដែក១ក្រុមនោះ ក៏មានក្មេងប្រុសជំទង់រងគ្រោះខាងលើនោះម្នាក់ផងដែរ ហើយខណៈពេលឡើងទៅធ្វើការជួសជុលរហូតដល់ពេលកើតហេតុ ស្រាប់តែក្មេងប្រុសខាងលើមានគ្រោះថ្នាក់កើតឡើង ។
ប្រភពខាងលើបានប្រាប់ឲ្យដឹងទៀតថា គ្រោះថ្នាក់នោះបណ្ដាលមកពីក្មេងប្រុសរងគ្រោះជាន់លើស័ង្កសីជ័រសថ្លា ដែលគេប្រក់ដំបូលឆ្លាស់ជាមួយស័ង្កសីដែក ដើម្បីឲ្យមានពន្លឺថ្ងៃជះចូលទៅបំភ្លឺក្នុងឃ្លាំងនៅពេលថ្ងៃជាហេតុបណ្ដាលឲ្យបាក់ផុងធ្លាក់ក្មេងប្រុសរងគ្រោះរូបនោះបោកផ្កាប់មុខជាមួយសាបខាងក្រោមបែកក្បាលស្លាប់ភ្លាមៗតែម្ដង ។
ក្រោយពេលទទួលបានដំណឹងនេះ កម្លាំងនគរបាលប៉ុស្តិ៍ដង្កោ និងនគរបាលខណ្ឌដង្កោបានចេះទៅពិនិត្យមើល រួចរាយការណ៍ជូននគរបាលការិយាល័យបច្ចេកទេសនិងវិទ្យាសាស្ត្រ នៃស្នងការដ្ឋាននគរបាលរាជធានីភ្នំពេញ ។ ព្រមទាំងលោកឧកញ៉ាវេជ្ជបណ្ឌិត នង សុវណ្ណារត្ន័ គ្រូពេទ្យសាលាដំបូងរាជធានីភ្នំពេញ ចុះធ្វើកោសល្យវិច័យ ហើយលទ្ធផលបញ្ជាក់ថា ជនរងគ្រោះពិតជាស្លាប់ដោយសារធ្លាក់ពីលើដំបូលឃ្លាំងប្រាកដមែន ៕
ចែករំលែកព័តមាននេះ