ខេត្តព្រៃវែង ៖ ផ្លូវបេតុងមួយខ្សែប្រវែងជិត ២គីឡូម៉ែត្រ តភ្ជាប់ពីផ្លូវជាតិលេខ១១ ចាក់ទៅដល់ភូមិព្រែកចាម ក្នុងឃុំបន្លិចប្រាសាទ ស្រុកពាមរក៍ កំពុងត្រូវទឹកជន់លិចស្ទើរទាំងស្រុងហើយ ប៉ុន្តែវាបែរជាទាក់ទាញប្រជាពលរដ្ឋឲ្យទៅលេងកម្សាន្តសប្បាយរាប់ពាន់នាក់ទៅវិញ…
ខេត្តព្រៃវែង ៖ ផ្លូវបេតុងមួយខ្សែប្រវែងជិត ២គីឡូម៉ែត្រ តភ្ជាប់ពីផ្លូវជាតិលេខ១១ ចាក់ទៅដល់ភូមិព្រែកចាម ក្នុងឃុំបន្លិចប្រាសាទ ស្រុកពាមរក៍ កំពុងត្រូវទឹកជន់លិចស្ទើរទាំងស្រុងហើយ ប៉ុន្តែវាបែរជាទាក់ទាញប្រជាពលរដ្ឋឲ្យទៅលេងកម្សាន្តសប្បាយរាប់ពាន់នាក់ទៅវិញ ។
អាជ្ញាធរឃុំបន្លិចប្រាសាទ បានឱ្យដឹងថា ផ្លូវបេតុងនេះ ទើបតែត្រូវទឹកជំនន់ជន់លិច ក្នុងរយៈពេលពីរបីថ្ងៃនេះទេ ប៉ុន្តែស្ថានភាពទឹកដែលលិចនៅលើខ្នងផ្លូវត្រឹមកំភួនជើងនេះ បែរជាទាក់ទាញមនុស្ស ម្នារាប់ពាន់នាក់ ឲ្យមកលេងកម្សាន្តយ៉ាងសប្បាយរីករាយទៅវិញ ដោយអ្នកខ្លះនាំគ្នាមកស្ទូចត្រីលេង អ្នកខ្លះមកហែលទឹក និងខ្លះទៀតមកជាលក្ខណៈគ្រួសារ ជួបជុំគ្នាហូបចុកផឹកស៊ីជាមួយនឹងចំណីអាហារ ដែលមានលក់ត្រៀមត្រានៅតាមបណ្តោយផ្លូវនេះ ។
ទោះជាយ៉ាងណាក៏ដោយ គេសង្កេតឃើញថា ដើម្បីការពារផ្លូវបេតុងនេះកុំឱ្យបាក់ស្រុត ឬរងការខូចខាត អាជ្ញាធរឃុំនិងស្រុក បានដាក់លូបិទផ្លូវ ហាមឃាត់មិនឱ្យរថយន្តតូចធំបើកឆ្លងកាត់ឡើយ ព្រមទាំងមានកម្លាំងសន្តិសុខនៅប្រចាំការចាំជួយអន្តរាគមន៍ពេលមានបញ្ហាកើតឡើងជាយហេតុផងដែរ ។
ដោយឡែកបងប្អូនប្រជាពលរដ្ឋ ដែលបានទៅលេងកម្សាន្តនៅលើផ្លូវបេតុងនេះ បានបង្ហាញអារម្មណ៍សប្បាយរីករាយជាខ្លាំង ប៉ុន្តែក៏បានសំណូមពរឲ្យអាជ្ញាធរ ត្រៀមបង្ការសម្រាប់ទូក និងសម្ភារៈសង្គ្រោះ ក្នុងករណីមានអ្នកលង់ទឹកផងដែរ ៕
ចែករំលែកព័តមាននេះ