ខេត្តកំពង់ចាម ៖ បុរសម្នាក់រងរបួសត្រូវបានគេបង្ហោះចែកចាយតាមបណ្ដាញសង្គមដោយប្រាប់ថា ត្រូវចោរចាក់បណ្ដាលឱ្យរងរបួស ពេលដឹកភ្ញៀវធ្វើដំណើរតាមតាក់ស៊ីរបស់ខ្លួនលើផ្លូវជាតិលេខ៧ កាលពីវេលាម៉ោង១០និង១៨នាទីយប់ ថ្ងៃទី៨ ខែតុលា ឆ្នាំ២០២៥ នៅចំណុចភូមិផ្កាយព្រឹក…
ខេត្តកំពង់ចាម ៖ បុរសម្នាក់រងរបួសត្រូវបានគេបង្ហោះចែកចាយតាមបណ្ដាញសង្គមដោយប្រាប់ថា ត្រូវចោរចាក់បណ្ដាលឱ្យរងរបួស ពេលដឹកភ្ញៀវធ្វើដំណើរតាមតាក់ស៊ីរបស់ខ្លួនលើផ្លូវជាតិលេខ៧ កាលពីវេលាម៉ោង១០និង១៨នាទីយប់ ថ្ងៃទី៨ ខែតុលា ឆ្នាំ២០២៥ នៅចំណុចភូមិផ្កាយព្រឹក ឃុំមៀន ស្រុកព្រៃឈរ ខេត្កំពង់ចាម ។
ក្រោយពីមានហេតុការណ៍នេះកើតឡើង កម្លាំងសមត្ថកិច្ចគ្រប់ច្រកល្ហក បានបើកការស្រាវជ្រាវតាមបណ្ដោយដងផ្លូវ និងស្រាវជ្រាវតាមរកជនសង្ស័យ ទីបំផុត ជនសង្ស័យម្នាក់ត្រូវបានចាប់ខ្លួននាព្រឹកថ្ងៃទី៩ តុលា ២០២៥ ពេលដែលជននេះបានធាក់ម៉ូតូពលរដ្ឋផ្ដួលនៅក្នុងទឹកដីស្រុកកំពង់សៀម ដើម្បីប្លន់ ។
តាមសមត្ថកិច្ចឲ្យដឹងថា ក្រោយពីមានហេតុការណ៍ ជនល្មើសចាក់អ្នកបើកបររថយន្តតាក់ស៊ីឱ្យរងរបួសរួចមក ត្រូវបានលោកអធិការនគរបាលស្រុកព្រៃឈរ បញ្ជាឲ្យកម្លាំងនគរបាលក្រោមឱវាទនៅតាមបណ្ដាប៉ុស្តិ៍នានា ត្រូវធ្វើការតាមប្រមាញ់ជនសង្ស័យទាំងយប់ រហូតដល់ភ្លឺ តែមិនបានប្រទះឃើញនៅក្នុងភូមិសាស្ត្រស្រុកព្រៃឈរនោះទេ ។
ទាក់ទិននឹងករណីនេះ ស្នងការដ្ឋាននគរបាលខេត្តកំពង់ចាម ឱ្យដឹងក្នុងសេចក្ដីប្រកាសព័ត៌មានថា នៅវេលាម៉ោង១០និង១៨នាទីយប់ ថ្ងៃទី៨ ខែតុលា ឆ្នាំ២០២៥ សមត្ថកិច្ចទទួលបានព័ត៌មានស្វែងរកជំនួយពីបុរសម្នាក់ជាអ្នករត់តាក់ស៊ីថា ជនសង្ស័យបានប្រើអំពើហិង្សាមកលើខ្លួន ដោយប្រើប្រាស់កាំបិតចុងស្រួចចាក់ឲ្យរបួស។
ក្រោយពីទទួលបានព័ត៌មានភ្លាម សមត្ថកិច្ចបានស្វែងរក និងប្រទះឃើញរថយន្តរបស់ជនរងគ្រោះម៉ាកព្រូស នៅចំណុចភូមិទួលពោន ឃុំមៀន ស្រុកព្រៃឈរ ។ ចំណែកជនរងគ្រោះ ត្រូវបានក្រុមគ្រួសារយកទៅព្យាបាលនៅមន្ទីរពេទ្យខេត្តកំពង់ចាម ។
តាមការសាកសួរព្រូឡានដែលធ្វើដំណើរជាមួយគ្នាបានឲ្យដឹងថា មូលហេតុឈានដល់ប្រព្រឹត្តអំពើហិង្សា គឺបណ្ដាលមកពីមានការប៉ះទង្គិចពាក្យសម្ដីគ្នា ក្នុងការតថ្លៃមិនត្រូវគ្នា ដោយសារដំបូងជនសង្ស័យបាននិយាយឲ្យជូនដល់ខេត្តកំពង់ចាម ក្នុងតម្លៃ១០ដុល្លារ ។ លុះមកដល់ចំណុចស្ពានស្ទឹងប្រយោល ក្នុងដីស្រុកព្រៃឈរ ជនសង្ស័យបែរជាឱ្យជនរងគ្រោះជូនទៅស្រុកពញាក្រែក ខេត្តត្បូងឃ្មុំវិញ ក៏កើតការប៉ះសម្ដីគ្នា ហើយជនសង្ស័យក៏ដកកូនកាំបិតចាក់តែម្ដង ។
តាមការពិនិត្យនៅលើរថយន្តឃើញថា ពុំមានបាត់បង់អ្វីនោះឡើយ ដូចនេះសមត្ថកិច្ចសន្និដ្ឋានថា ជាករណីហិង្សា ពុំមែនជាករណីប្លន់ទេ ។ បន្ទាប់មក កម្លាំងសមត្ថកិច្ចបើកកិច្ចប្រតិបត្តិការស្វែងរក និងចាប់បានជនសង្ស័យនៅចំណុចភូមិត្រពាំងជ្រៃ ឃុំក្រឡា ស្រុកកំពង់សៀម ហើយបាននាំខ្លួនមកសួរនាំនៅអធិការដ្ឋាននគរបាលស្រុកកំពង់សៀម ជនសង្ស័យឆ្លើយថា ខ្លួនពិតជាបានប្រព្រឹត្តសកម្មភាពដូចខាងលើកពិតប្រាកដមែន ។
សមត្ថកិច្ចបានបញ្ជាក់ថា ហេតុការណ៍ខាងលើ បង្កឡើងដោយជនសង្ស័យឈ្មោះ ទិត្យ រដ្ឋា ភេទប្រុស អាយុប្រហែល៣៤ឆ្នាំ បានចាក់ទៅលើឈ្មោះ វ៉ា មករា ភេទប្រុស អាយុ៣៤ឆ្នាំ រស់នៅភូមិកកោះ ឃុំត្រពាំងព្រះ ស្រុកព្រៃឈរ ខេត្តកំពង់ចាម មុខរបររត់តាក់ស៊ី បណ្តាលឲ្យរងរបួសត្រង់ស្មា និងត្រចៀក ឯអ្នករួមដំណើរម្នាក់ទៀតឈ្មោះ អ៊ុច សុខគឿន ភេទប្រុស អាយុ៣២ឆ្នាំ រស់នៅស្រុកកំពង់សៀម រងរបួសក្បាល រួចជនសង្ស័យបានរត់គេចខ្លួនបាត់ភ្លាមៗ ។
រហូតដល់ម៉ោង៨ព្រឹក ថ្ងៃទី០៩ ខែតុលា ឆ្នាំ២០២៥ ជនសង្ស័យរូបនោះ បានទៅធាក់ប្លន់ម៉ូតូគេនៅម្តុំផ្សារត្រពាំងជ្រៃ ស្ថិតក្នុងភូមិត្រពាំងជ្រៃ ឃុំក្រឡា ស្រុកកំពង់សៀម ខេត្តកំពង់ចាម ហើយត្រូវសមត្ថកិច្ចឃាត់ខ្លួន ។ ជនសង្ស័យរស់នៅភូមិកណ្តោលជ្រុំ ឃុំកណ្តោលជ្រុំ ស្រុកពញាក្រែក ខេត្តត្បូងឃ្មុំ ។ បច្ចុប្បន្នជនសង្ស័យ សមត្ថកិច្ចកំពុងចាត់ការតាមនីតិវិធី ៕
ចែករំលែកព័តមាននេះ