រាជធានីភ្នំពេញៈ គណៈបញ្ជាការឯកភាពខណ្ឌទួលគោកនៅព្រឹកថ្ងៃទី០៩ខែតុលាឆ្នាំ ២០២៥នេះបានចុះរៀបចំសណ្តាប់ធ្នាប់និងប្រើវិធានការក្តៅ ចុះរុះរើកាត់សំយាបដែលអាជីវករសាងសង់លក់ដូររំលោភលើចិញ្ចើមផ្លូវសាធារណៈតាមដងផ្លូវលេខ២១៨ ផ្សារយូណាយ នៅក្នុងសង្កាត់ទឹកល្អក់ទី ៣ ដែលតែងតែបង្កឲ្យកកស្ទះចរាចរណ៍ជារៀងរាល់ថ្ងៃ។
ការចុះរៀបចំសណ្តាប់ធ្នាប់និងកាត់សំយាបនេះដឹកនាំដោយលោក ស៉ឹម សុផង់ អភិបាលរងខណ្ឌទួលគោក ។
លោក ស៉ឹម សុផង់ អភិបាលរងខណ្ឌទួលគោក បានឱ្យដឹងថា ដោយមានការណែនាំពីឯកឧត្តមឃួង ស្រេងអភិបាលនៃគណៈអភិបាលរាជធានីភ្នំពេញនិងលោកជា ពិសី អភិបាលខណ្ឌទួលគោកលោកបានដឹកនាំកម្លាំងចុះរៀបចំសណ្ដាប់ធ្នាប់នៅក្នុងមូលដ្ឋានជាប្រចាំដើម្បីសម្រួលចរាចរណ៍និងលើកកម្ពស់សោភ័ណ្ឌភាពរាជធានីភ្នំពេញឱ្យកាន់តែប្រសើរ។
ដោយឡែកតាមផ្លូវលេខ២១៨ (ផ្សារយូណាយ)សង្កាត់ទឹកល្អក់ទី៣ ជាចំណុចស្មុគស្មាញដែលអាជីវករលក់ដូរ ដែលបានរំលោភយកទ្រូងផ្លូវ និងចញ្ចើមផ្លូវ ធ្វើរោងនិងសំយាបលក់ដូរនិងតាំងទំនិញ ចង្ករឲ្យបាត់បង់សណ្ដាប់ធ្នាប់និងកកស្ទះចរាចរណ៍ជាប្រចាំធ្វើឲ្យប្រជាពលរដ្ឋធ្វើដំណើររអ៊ូរទាំជាខ្លាំង។
កន្លងមកអាជ្ញាធរខណ្ឌ សង្កាត់បានចុះណែនាំដល់អាជីវករលក់ដូររុះរើនិងកាត់សំយាបផ្ទះរបស់ខ្លួនចេញតែអាជីវករមួយចំនួនមិនស្ដាប់តាមការណែនាំហើយអាជ្ញាធរ ប្រើវិធានការរដ្ឋបាលចុះមករុះរើតែម្ដង។
លោក ស៉ឹម សុផង់ អភិបាលរងខណ្ឌទួលគោកក៏បានបញ្ជាក់ថា អាជ្ញាធរមិនចង់ប្រើវិធានការក្ដៅនោះទេ សូមឲ្យអាជីវករក៏ដូចប្រជាពលរដ្ឋ កុំយកចិញ្ចើមផ្លូវធ្វើអាជីវកម្ម មេត្តាចូលរួមសហការ ដើម្បីផ្លូវស្អាត បរិស្ថានល្អ ជាការចូលរួម លើកកម្ពស់សោភ័ណភាពរាជធានីភ្នំពេញឲ្យកាន់តែប្រសើរឡើង៕
ចែករំលែកព័តមាននេះ