ខេត្តមណ្ឌលគិរី ៖ បច្ចុប្បន្ន បច្ចេកវិទ្យាបានរីកចម្រើនយ៉ាងសំបូរបែប មហាជនទូទៅតែងទទួលបានព័ត៌មានតាមរយៈបណ្តាញនានា ជាពិសេស គឺបណ្តាញសង្គម ដែលគេអាចមើលឃើញ និងស្តាប់ឮគ្រប់ហេតុការណ៍ដែលកើតមានជុំវិញពិភពលោក ។…
ខេត្តមណ្ឌលគិរី ៖ បច្ចុប្បន្ន បច្ចេកវិទ្យាបានរីកចម្រើនយ៉ាងសំបូរបែប មហាជនទូទៅតែងទទួលបានព័ត៌មានតាមរយៈបណ្តាញនានា ជាពិសេស គឺបណ្តាញសង្គម ដែលគេអាចមើលឃើញ និងស្តាប់ឮគ្រប់ហេតុការណ៍ដែលកើតមានជុំវិញពិភពលោក ។ ទន្ទឹមនឹងការវិឌ្ឍន៍ឥតឈប់ឈររបស់បច្ចេកវិទ្យា គេបានមើលឃើញថា ការផ្សព្វផ្សាយព័ត៌មានក្លែងក្លាយ និងការញុះញង់តាមរយៈបណ្តាញព័ត៌មានពីសំណាក់ជនខិលខូចបានបង្កបាតុភាពឱ្យសង្គមមានភាពចលាចលរំខានដល់ការរស់នៅប្រកបដោយសេចក្តីសុខរបស់ប្រជាពលរដ្ឋយ៉ាងខ្លាំងផងដែរ ។
ដើម្បីបន្សាបឥទ្ឋិពលអវិជ្ជមានពីក្រុមប្រឆាំងអគតិ និងអ្នកធ្វើមាតិការក្លែងបន្លំសភាពការណ៍នានាក្នុងមូលដ្ឋាន មន្ទីរព័ត៌មានខេត្តមណ្ឌលគិរីបានសស្រាក់សស្រាំធ្វើការងារកាន់តែសកម្មទៅលើការគាំទ្រដល់គណៈបញ្ជាការឯកភាព និងរដ្ឋបាលខេត្តលើការងារគ្រប់គ្រងសាធារណមតិ គ្រប់គ្រងព័ត៌មាន និងសាធារណៈមតិមហាជន ដោយតាមដានព័ត៌មានធ្វើការឆ្លើយតបបកស្រាយ ផ្សព្វផ្សាយនូវព័ត៌មានពិត ត្រឹមត្រូវជូនប្រជាពលរដ្ឋឱ្យយល់ដឹងពីគោលនយោបាយរបស់រាជរដ្ឋាភិបាល រួមទាំងដំណើរការអភិវឌ្ឍន៍រីកចម្រើនរបស់ប្រទេសជាតិ ជាពិសេស បានទប់ស្កាត់ និងប្រឆាំងព័ត៌មានក្លែងក្លាយទាន់ពេលវេលាជាច្រើនករណី ។
កន្លងមក ក្រោមការដឹកនាំ និងគាំទ្រពីឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ក្រុមការងារសាធារណមតិរបស់មន្ទីរព័ត៌មានខេត្តមណ្ឌលគិរី ត្រូវបានបង្កើតឡើង និងបន្តបង្កើនសកម្មភាពតួនាទីរបស់ខ្លួន ជាជំនួយការដល់គណៈបញ្ជាការឯកភាពខេត្ត ជាពិសេស កិច្ចការងារសាធារណមតិ និងកិច្ចការងារព័ត៌មានទូទៅ អំពីការអភិវឌ្ឍរីកចំរើនរបស់ខេត្ត និងបានផ្សព្វផ្សាយអំពីសមិទ្ធផលជាច្រើន ដែលរដ្ឋបាលខេត្តសម្រេចបាននាពេលកន្លងមក ក្នុងការបញ្ជ្រាបជូនយ៉ាងទូលំទូលាយទៅប្រជាពលរដ្ឋគ្រប់មជ្ឈដ្ឋាន ។ទន្ទឹមនិងស្មារតីទទួលខុសត្រូវចំពោះមុខ មន្ត្រីនៃមន្ទីរព័ត៌មានខេត្តមណ្ឌលគិរី ក៏បានខិតខំពង្រឹងសមត្ថភាព ចំណេះជំនាញរបស់ខ្លួន ហើយខិតខំកែច្នៃទៅលើអ្វីដែលមានស្រាប់ដើម្បីបង្កើននូវប្រសិទ្ធភាពការងារព័ត៌មាន ។
លោក សុន សារឿន ប្រធានមន្ទីរព័ត៌មានខេត្តមណ្ឌលគិរីមានប្រសាសន៍ថា សព្វថ្ងៃនេះ បរិបទទំនើបកម្មឌីជីថល បានធ្វើឲ្យប្រជាពលរដ្ឋងាយទទួលបានព័ត៌មានយ៉ាងឆាប់រហ័សទាំងវិជ្ជមាន និងអវិជ្ជមាន ។ តែមន្ត្រីរបស់យើងបានធ្វើបុរេសកម្ម ជាមួយការគ្រប់គ្រងសារធារណមតិប្រកបដោយគុណភាព និងប្រសិទ្ធភាព។
លោក សុន សារឿន មានប្រសាសន៍បន្តថា ការងារព័ត៌មានគឺមានសារសំខាន់ណាស់ ក្នុងជីវិតប្រចាំថ្ងៃរបស់យើង គឺមិនអាចខ្វះព័ត៌មានបាននោះទេ។ ដូច្នេះហើយ ការងាររបស់មន្ទីរព័ត៌មានខេត្តមណ្ឌលគិរី គឺសំខាន់ក្នុងការផ្តល់ព័ត៌មានពិត ដល់សាធារណជនទូទៅ ដោយជ្រើសរើសយកព័ត៌មានណាមកសរសេរឱ្យមានភាពទាក់ទាញ ហើយព្រឹត្តការណ៍ ដែលកើតឡើងនោះគួរដាក់ផ្សាយ ឬអត់ ហើយបានផ្តល់ផលប្រយោជន៍អ្វីខ្លះដល់អ្នកអាន និងសង្គម ។ មិនត្រឹមប៉ុណ្ណោះ អ្នកសារព័ត៌មានផ្សេងទៀត ក៏មានតួនាទីក្នុងការចូលរួមថែរក្សាស្ថិរភាពសង្គម និងប្រឆាំងព័ត៌មានក្លែងក្លាយដើម្បីរក្សាសន្តិសុខជាតិផងដែរ៕
ចែករំលែកព័តមាននេះ