ខេត្តបាត់ដំបង ៖ ប្រចៀវរាប់លានក្បាល ហើរចេញពីរូងភ្នំនៃរមនីយដ្ឋានភ្នំសំពៅ ក្លាយជាផ្ទាំងទស្សនីយភាពដ៏ទាក់ទាញដល់ភ្ញៀវទេសចរជាតិ អន្តរជាតិ គយគន់ទស្សនាកំសាន្តម្តងហើយ ចង់មកម្តងទៀត បើថា នៅរដូវប្រាំង…
ខេត្តបាត់ដំបង ៖ ប្រចៀវរាប់លានក្បាល ហើរចេញពីរូងភ្នំនៃរមនីយដ្ឋានភ្នំសំពៅ ក្លាយជាផ្ទាំងទស្សនីយភាពដ៏ទាក់ទាញដល់ភ្ញៀវទេសចរជាតិ អន្តរជាតិ គយគន់ទស្សនាកំសាន្តម្តងហើយ ចង់មកម្តងទៀត បើថា នៅរដូវប្រាំង រឺរដូវវស្សានោះទេ ។ នេះបើយោងតាមផេកមន្ទីរទេសចរណ៍ខេត្តបាត់ដំបង បានប្រកាសនាព្រឹកថ្ងៃទី០៦ ខែតុលា ឆ្នាំ២០២៥ ។
រមនីយដ្ឋានភ្នំសំពៅជារមនីយដ្ឋាន បែបវប្បធម៌ ប្រវត្តិសាស្ត្រ និងធម្មជាតិ ស្ថិតក្នុងភូមិក្រពើកើត ឃុំភ្នំសំពៅ ស្រុកបាណន់ខេត្តបាត់ដំបង មានចម្ងាយប្រមាណ១៦គីឡូម៉ែត្រ ពីក្រុងបាត់ដំបង ដោយប្រើរយៈពេលធ្វើដំណើរប្រហែល២៥នាទី តាមផ្លូវជាតិលេខ៥៧ នឹងទៅដល់ទីតាំងនោះហើយ ។
បច្ចុប្បន្ននេះ រមនីយដ្ឋានភ្នំសំពៅ ត្រូវបានរដ្ឋបាលខេត្តបាត់ដំបង និងមន្ត្រីពាក់ព័ន្ធបានរៀបចំកែលម្អ និងអភិវឌ្ឍន៍ទីតាំង នៅតំបន់ល្អាងប្រចៀវ យ៉ាងស្រស់ស្អាត មានសណ្តាប់ធ្នាប់ល្អ មានទីតាំងសម្រាប់ភ្ញៀវអង្គុយទស្សនាហ្វូងប្រចៀវរាប់លានក្បាល ហើរចេញពីរូងនៅពេលល្ងាច ។ ក្រៅពីទស្សនាហ្វូងប្រចៀវ ភ្ញៀវទេសចរចាប់អារម្មណ៍ខ្លាំងផងដែរ នៅព្រះពុទ្ធប្បដិមាដ៏ធំ ដែលត្រូវបានឆ្លាក់លើជញ្ជាំង ភ្នំសំពៅ ក្បែរល្អាងប្រចៀវតែម្តង ហើយភ្ញៀវទេសចរបានថតផ្តិតទុកជាអនុស្សាវរីយ៍ផងដែរ ។
បន្ថែមពីនោះភ្ញៀវទេសចរអាចឡើងតាមជណ្តើរ ឬជិះម៉ូតូ រថយន្តឡើង តាមផ្លូវជម្រាលភ្នំ រហូតដល់ កំពូលភ្នំបាន ដើម្បីទស្សនាទេសភាពពីលើកំពូលភ្នំ ឃើញវាលស្រែ និងភូមិឋានអ្នកស្រុកដ៏ល្វឹងល្វើយ ព្រមទាំងទស្សនាល្អាងប្រវត្តិសាស្ត្រជាច្រើន នៅលើភ្នំសំពៅផងដែរ ។ ដែលល្អាងទាំងនោះ មានដូចជា ល្អាងផ្កាស្លា ល្អាងគក់ទ្រូង ល្អាងខ្យល់ ល្អាងតែងខ្លួន ដែលសុទ្ធសឹងបង្កប់នូវរឿងរ៉ាវអស្ចារ្យ ជំនឿ និងបានដឹងពីប្រវត្តិភ្នំសំពៅ ក៏ដូចជា ប្រវត្តិហេតុការណ៍ដ៏រន្ធត់នៅភ្នំសំពៅនាអំឡុងសង្គមសម័យខ្មែរក្រហមជាដើម ។
នៅតំបន់រមនីយដ្ឋានភ្នំសំពៅនេះ ភ្ញៀវទេសចរអាចទិញវត្ថុអនុស្សាវរីយ៍ និងម្ហូបចំណីអាហារទទួលទាន នៅទីនោះផ្ទាល់បាន ដែលមានបងប្អូនប្រជាពលរដ្ឋក្នុងសហគមន៍ភ្នំសំពៅដាក់លក់ហូហែរ ដើម្បីបម្រើ សេវាភ្ញៀវ ដែលមកលេងទីនេះដោយមានរស់ជាតិឈ្ងុយឆ្ងាញ់បែបអ្នកស្រុក និងមានតម្លៃសមរម្យ ៕
ចែករំលែកព័តមាននេះ