ខេត្តបន្ទាយមានជ័យ ៖ ផ្ទុះអាវុធ៣គ្រាប់ក្នុងទឹកដីថៃ ទល់មុខភូមិអូរ៣ជាន់ កាលពីវេលាម៉ោង១០ និង៤៣នាទីយប់ថ្ងៃទី៣០ កញ្ញា ឆ្នាំ២០២៥ ស្ថិតនៅក្បែរមង្គោលសីមាលេខ៤៤ ក្នុងភូមិសាស្ត្រឃុំអូរបីជាន់…
ខេត្តបន្ទាយមានជ័យ ៖ ផ្ទុះអាវុធ៣គ្រាប់ក្នុងទឹកដីថៃ ទល់មុខភូមិអូរ៣ជាន់ កាលពីវេលាម៉ោង១០ និង៤៣នាទីយប់ថ្ងៃទី៣០ កញ្ញា ឆ្នាំ២០២៥ ស្ថិតនៅក្បែរមង្គោលសីមាលេខ៤៤ ក្នុងភូមិសាស្ត្រឃុំអូរបីជាន់ ស្រុកអូរជ្រៅ ។
លោក តុល សារិន មេឃុំអូរបីជាន់បានប្រាប់ថា ឮស្នូរផ្ទុះអាវុធដៃចំនួន៣គ្រាប់ទាំងកណ្តាលយប់ក្នុងទឹកដីថៃដែលឈមកម្ពុជា ជាភូមិសាស្ត្រឃុំអូរបីជាន់ នៅពេលទាហានថៃបានធ្វើសកម្មភាពរំលោភបំពានដែនដី និងអធិបតេយ្យរបស់កម្ពុជា ។
លោកបានបញ្ជាក់ថា ក្នុងនោះភូមិឋានដីធ្លី និងផ្ទះសម្បែងប្រជាពលរដ្ឋខ្មែរក្នុងភូមិជោគជ័យ និងព្រៃចាន់ ត្រូវបានកងទ័ពថៃធ្វើសកម្មភាពព័ទ្ធបន្លាលួសបំពានច្បាប់អន្តរជាតិ និងកិច្ចព្រមព្រៀងទាំងឡាយដែលថៃបានធ្វើជាមួយកម្ពុជា។
លោក លី សុវណ្ណារិទ្ធ អភិបាលរងខេត្តបន្ទាយមានជ័យ និងជាអ្នកនាំពាក្យបានបញ្ជាក់ថា ការផ្ទុះចំនួន៣គ្រាប់ជាប្រភេទអាវុធដៃធុនតូចទាំងកណ្តាលយប់ នៅក្នុងភូមិសាស្ត្រនេះថៃបានធ្វើសកម្មភាពចល័ត និងពង្រាយទ័ពផ្ទុយនឹងបទឈប់បាញ់ដែលថៃ បានធ្វើជាមួយកម្ពុជា។
លោកបានបញ្ជាក់ថា សំឡេងផ្ទុះនាយប់មិញនេះ គេមិនទាន់ដឹងថា ជាការផ្ទុះដោយសារមូលហេតុអ្វីនោះទេ ។ នាពេលកន្លងមក នៅក្នុងទឹកដីក្នុងភូមិសាស្ត្រខាងលើនេះ តែងតែឮសូរសំឡេងផ្ទុះអាវុធជាញឹកញាប់ តែភាគីកម្ពុជាមិនដែលធ្វើសកម្មភាពឆ្លើយតបណាមួយឡើយ ហើយរក្សាបានយ៉ាងខ្ជាប់ខ្ជួនបំផុតនូវស្មារតីនៃបទឈប់បាញ់។
លោក លី សុវណ្ណារិទ្ធ បានបញ្ជាក់ថា ជាការកត់សម្គាល់ ថៃតែងតែធ្វើសកម្មភាពបង្កហេតុនានានៅតាមបណ្តោយព្រំដែនជាមួយកម្ពុជា អំឡុងពេលអនុវត្តបទឈប់បាញ់ ក្នុងចេតនាអុជអាលឱ្យមានការផ្ទុះអាវុធនៅតាមព្រំដែន ។
សូមបញ្ជាក់ថា បើទោះបីយប់មិញនេះ មានឮសំឡេងផ្ទុះអាវុធនៅទឹកដីថៃ តែរហូតដល់ម៉ោង៧ព្រឹកថ្ងៃទី១ ខែតុលា ឆ្នាំ២០២៥នេះ ស្ថានភាពនៅក្នុងភូមិសាស្ត្រឃុំអូរបីជាន់ ជាពិសេស ភូមិជោគជ័យ និងព្រៃចាន់ មានសភាពស្ងប់ស្ងាត់ ៕
ចែករំលែកព័តមាននេះ