សហរដ្ឋអាមេរិក ៖ នៅថ្ងៃ១០ តុលា ខាងមុខនេះ គណៈកម្មាធិការពានរង្វាន់ណូបែលសន្តិភាពនឹងប្រគល់នៅក្រុងអូស្លូពានរង្វាន់ណូបែលសន្តិភាពដល់តួអង្គសំខាន់សម្រាប់បុព្វហេតុនោះ ។ ប្រធានាធិបតីអាមេរិកលោកដូណាល់ត្រាំ់ ហាក់់មិនមានការលាក់លៀមឡើយ ដែលលោកចង់បានពានរង្វាន់កិត្តិយសនោះ…
សហរដ្ឋអាមេរិក ៖ នៅថ្ងៃ១០ តុលា ខាងមុខនេះ គណៈកម្មាធិការពានរង្វាន់ណូបែលសន្តិភាពនឹងប្រគល់នៅក្រុងអូស្លូពានរង្វាន់ណូបែលសន្តិភាពដល់តួអង្គសំខាន់សម្រាប់បុព្វហេតុនោះ ។ ប្រធានាធិបតីអាមេរិកលោកដូណាល់ត្រាំ់ ហាក់់មិនមានការលាក់លៀមឡើយ ដែលលោកចង់បានពានរង្វាន់កិត្តិយសនោះ ។
កាលពីថ្ងៃទី៣០ កញ្ញា លោកត្រាំថ្លែងថា គ្រប់គ្នានិយាយថា ខ្ញុំត្រូវជាអ្នកទទួលពានរង្វាន់ណូបែលសន្តិភាព។ នេះជាការហ៊ាននិយាយមុនរបស់ប្រធានាធិបតីទី៤៥ និងទី៤៧ របស់សហរដ្ឋអាមេរិក នៅលើវេទិកាអ.ស.ប កាលពីថ្ងៃទី២៣កញ្ញា ជាមួយការគាំទ្ររបស់មេដឹកនាំអន្តរជាតិជាច្រើនរូប។ លោកថាវាជាការប្រមាថមួយដ៏ធំចំពោះប្រទេសយើងប្រសិនបើខ្ញុំមិនបានទទួលពានរង្វាន់នោះ។
បន្ទាប់ពីសុន្ទរកថារបស់លោកនៅអ.ស.ប ទទួលស្គាល់រដ្ឋប៉ាឡេស្ទីនមួយ ប្រធានាធិបតីបារាំងលោកអេមម៉ានុយអែលម៉ាក្រុងលើកឡើងថា ខ្ញុំឃើញប្រធានាធិបតីអាមេរិកខិតខំគៀងគរដោយនិយាយថា លោកពិតជាចង់បានពានរង្វាន់នូបែលសន្តិភាព។
លោកម៉ាក្រុងថ្លែងថា ពាននោះលោកត្រាំអាចទទួលបានប្រសិនបើអាចបញ្ចប់ជម្លោះនៅជ្រោយហ្គាហ្សា។ លោកត្រាំនៅអ.ស.ប ក៏បានលាតត្រដាងផែនការសន្តិភាពមួយ សម្រាប់ជ្រោយហ្គាហ្សាដែលទទួលការគាំទ្រពីសំណាក់សហគមន៍អន្តរជាតិស្ទើរទាំងមូល។ ផែនការសន្តិភាពនោះដែលបង្ហាញដល់ភាគីជម្លោះទាំង២នៅហ្គាហ្សា ត្រូវបានទទួលយកហើយដោយសម្ព័ន្ធមិត្តអីុស្រាអែលរបស់អាមេរិក។ ប៉ុន្តែអ្វីៗក៏មិនសូវច្បាស់ដែរដោយដំបូងបំផុតក្រុមហាម៉ាស់នៅមិនទាន់ឆ្លើយតបចំពោះឱសានវាទនោះរបស់លោកត្រាំនៅឡើយ។
បែបនេះផែនការសន្តិភាពនៅមិនទាន់ក្លាយជាការពិត។ រួចនាថ្ងៃទី២៩កញ្ញាពេលលោកជួបជាមួយនាយករដ្ឋមន្ត្រីអុីស្រាអែលលោកបេនចាមីននេតាន់យ៉ាហ៊ូនៅសេតវិមាន លោកត្រាំនៅថ្លែងថា វិធីក្ដៅអាចប្រើប្រសិនបើក្រុមហាម៉ាស់ បដិសេធផែនការរបស់លោក។ លោកត្រាំរហូតដល់ថ្លែងទៅកាន់មេដឹកនាំអុីស្រាអែលថា ដូចអ្នកដឹងហើយបើក្រុមហាម៉ាស់បដិសេធ អ្នកនឹងទទួលការគាំទ្រពេញទំហឹងរបស់យើង ចំពោះអ្វីដែលអ្នកត្រូវធ្វើ។ អាចនិយាយម្យ៉ាងទៀតថា ពេលនោះអាមេរិកអាចបើកដៃឲ្យអីុស្រាអែលបន្តធ្វើអ្វីតាមចិត្តរបស់គេ ដើម្បីសម្រេចគោលដៅសង្គ្រាមនៅជ្រោយហ្គាហ្សា។
ទោះបីយ៉ាងណាលោកត្រាំំពិតជាមានសង្ឃឹមខ្លាំងក្នុងការទទួលបានពានរង្វាន់ណូបែលសន្តិភាពព្រោះលោកអាចបញ្ចប់សង្គ្រាម៧ក្នុងរយៈពេលត្រឹមតែ៧ខែ។ តាំងពីលោកវិលត្រឡប់ចូលកាន់កាប់សេតវិមានវិញមក លោកត្រាំជួយឲ្យមានបទឈប់បាញ់គ្នារវាងឥណ្ឌានិងប៉ាគីស្ថាន បញ្ឈប់ការច្បាំងគ្នារវាងអុីស្រាអែលនិងអីុរ៉ង់ និងជួយបញ្ចប់សង្គ្រាមរវាងអាមេនីនិងអាស៊ែបៃហ្សង់។
លោកក៏ជាអ្នកខិតខំប្រឹងប្រែងដែរ ឲ្យមានបទឈប់បាញ់គ្នា រវាងកម្ពុជានិងថៃ ទោះបីមកទល់ពេលនេះថៃ នៅមិនទាន់បញ្ឈប់បណ្ដាសកម្មភាពប្រទូស្តរ៉ាយចំពោះកម្ពុជាក្ដី។ លោកក៏បានរួមចំណែកក្នុងការបញ្ចប់ជម្លោះរវាងសាធារណរដ្ឋ ប្រជាធិបតេយ្យកុងបហ្គោនិងរវ៉ាន់ដាផងដែរ។ លោកក៏បានខិតខំប្រឹងប្រែងឲ្យមានការបញ្ចប់ជម្លោះ រវាងរុស្សុីនិងអ៊ុយក្រែនដែលតាមមើលទៅជម្លោះនោះពិតជាពិបាកក្នុងការបញ្ចប់ណាស់៕
ចែករំលែកព័តមាននេះ