សង្គ្រាមអ៊ីស្រាអែលនិងហាម៉ាស់ ៖ កាលពីថ្ងៃទី២៩ កញ្ញា ប្រធានាធិបតីអាមេរិកលោកដូណាល់ត្រាំ បានថ្លែងអំណរគុណចំពោះនាយករដ្ឋមន្ត្រីអ៊ីស្រាអែល លោកបេនចាមីននេតាន់យ៉ាហ៊ូ ដែលព្រមទទួលយកផែនការសន្តិភាពមាន២០ចំណុចរបស់លោក សម្រាប់ជ្រោយហ្គាហ្សា ហើយលោកសង្ឃឹមលើចម្លើយតបជាវិជ្ជមានរបស់ក្រុមហាម៉ាស់ប៉ាឡេស្ទីន។…
សង្គ្រាមអ៊ីស្រាអែលនិងហាម៉ាស់ ៖ កាលពីថ្ងៃទី២៩ កញ្ញា ប្រធានាធិបតីអាមេរិកលោកដូណាល់ត្រាំ បានថ្លែងអំណរគុណចំពោះនាយករដ្ឋមន្ត្រីអ៊ីស្រាអែល លោកបេនចាមីននេតាន់យ៉ាហ៊ូ ដែលព្រមទទួលយកផែនការសន្តិភាពមាន២០ចំណុចរបស់លោក សម្រាប់ជ្រោយហ្គាហ្សា ហើយលោកសង្ឃឹមលើចម្លើយតបជាវិជ្ជមានរបស់ក្រុមហាម៉ាស់ប៉ាឡេស្ទីន។
ពេលជួបលោកត្រាំនៅសេតវិមានលោកនេ តាន់យ៉ាហ៊ូថ្លែងថា លោកមគាំទ្រផែនការនោះ។ ចំណាប់ខ្មាំងទាំងអស់ទាំងអ្នកនៅរស់ទាំងសាកសពអ្នកស្លាប់ត្រូវប្រគល់ឲ្យភ្លាមៗ។ ក្រុមហាម៉ាស់ត្រូវរំសាយអាវុធ។ជ្រោយហ្គាហ្សា នឹងជាតំបន់គ្មានកងទ័ព។ អីុស្រាអែលនឹងនៅរក្សាការទទួលខុសត្រូវខាងសន្តិសុខសម្រាប់ដំណាក់កាលមួយ។ ប្រសិនបើក្រុមហាម៉ាស់បដិសេធផែនការលោកត្រាំនោះអ៊ីស្រាអែលប្ដេជ្ញាចាត់កាដោយខ្លួនឯង។
ខាងក្រៅមហាសន្និបាតអ.ស.បក្រុងញូវយ៉ក លោកដូណាល់ត្រាំលើកឡើងថា លោកបានបង្ហាញផែនការសន្តិភាពថ្មីសម្រាប់ជ្រោយហ្គាហ្សា ចំពោះបណ្ដាមេដឹកនាំអារ៉ាប់និងអ៊ិស្លាម។ ផែនការនោះដែលមានជាង៣ទំព័រនិង២០ចំណុច ប៉ុនប៉ងបញ្ចប់ជម្លោះនៅជ្រោយហ្គាហ្សា។ ផែនការនោះចាប់ផ្ដើមពីការបញ្ឈប់រាល់សកម្មភាពយោធា បន្ទាប់មកផ្អាករាល់ខ្សែបន្ទាត់ប្រយុទ្ធនិងការដោះលែងសំណាប់ខ្មាំងទាំងអស់ដែលនៅរស់និងប្រគល់សាកសពបណ្ដាចំណាប់ខ្មាំងដែលស្លាប់ក្នុងអំឡុងពេលត្រឹម៧២ម៉ោង។
ជាថ្នូរវិញអ្នកទោសប៉ាឡេស្ទីននៅអ៊ីស្រាអែល ច្រើនពាន់នាក់ក៏ត្រូវដោះលែងដែរ។ បន្ទាប់មកគឺវិធានការ សម្រាប់បណ្ដាសមាជិកក្រុមហាម៉ាស់។ គេត្រូវទុកឲ្យមានច្រកចេញមួយដែលមានការធានាសន្តិសុខ សម្រាប់ពួកគេចាកចេញពីជ្រោយហ្គាហ្សា។ ទន្ទឹមនឹងនេះដែររាល់អាវុធវាយលុករបស់ក្រុមហាម៉ាស់នឹងត្រូវបំផ្លាញចោល។ ជំនួយមនុស្សធម៌ពេញលេញក៏នឹងបញ្ជូនមកជ្រោយហ្គាហ្សាភ្លាមៗ រួមទាំងការជួយស្ដារឡើងវិញបណ្ដាហេដ្ឋារចនាសម្ព័ន្ធដូចជាទឹក ភ្លើង ការជួយសម្អាត និងស្ដារឡើងវិញបណ្ដាមន្ទីរពេទ្យ កន្លែងផលិតនំប៉័ង ហើយនឹងមានការបញ្ជូនសម្ភារចាំបាច់សម្រាប់ការយកចេញបណ្ដាគំនរបាក់បែកនិងបើកផ្លូវថ្នល់នានា។
ចុងក្រោយបំផុតអាមេរិកនឹងទទួលបន្ទុករួមជាមួយបណ្ដាដៃគូអារ៉ាប់និងអន្តរជាតិ បង្កើតកងកម្លាំងអន្តរជាតិថែរក្សាសន្តិភាពបណ្ដោះអាសន្នមួយ ដែលដាក់ពង្រាយភ្លាមៗសម្រាប់ត្រួតពិនិត្យសន្តិសុខនៅជ្រោយហ្គាហ្សា។ ចំណែកអ៊ីស្រាអែលវិញត្រូវប្រគល់ជាបន្តបន្ទាប់ដែនដីហ្គាហ្សាដែលខ្លួនកាន់កាប់។
ដែនដីជ្រោយហ្គាហ្សានឹងត្រូវដឹកនាំដោយអាជ្ញាធរបណ្ដោះអាសន្នមួយដែលរួមមានបណ្ដាអ្នកបច្ចេកទេសនិងគ្មានអ្នកនយោបាយ ដោយបដិសេធពួកហាម៉ាស់។ អាជ្ញាធរនោះនឹងស្ថិតក្រោមការត្រួតពិនិត្យ របស់គណៈកម្មាធិការសន្តិភាពមួយ ដឹកនាំដោយលោកត្រាំផ្ទាល់ ដោយក្នុងនោះអតីតនាយករដ្ឋមន្ត្រីអង់គ្លេសលោកតូនីប្លែរនឹងដើរតួនាទីមួយ។
ចំណុចគន្លឹះដទៃៗទៀតនៃផែនការនោះ សហរដ្ឋអាមេរិកនឹងធ្វើការជាមួយបណ្ដាដៃគូអារ៉ាប់និងអន្តរជាតិ ក្នុងការបង្កើនកងកម្លាំងអន្តរជាតិរក្សាស្ថេរភាពមួយ ដែលនឹងត្រូវដាក់ពង្រាយភ្លាមៗនៅជ្រោយហ្គាហ្សា។ កងកម្លាំងនោះនឹងជួយបណ្ដុះបណ្ដាលព្រមទាំងនឹងផ្ដល់ការជួយទ្រទ្រង់ដល់កងកម្លាំងប៉ូលិសប៉ាឡេស្ទីនដែលត្រូវសម្រេចបង្កើតឡើង ហើយធ្វើការពិគ្រោះយោបល់ជាមួយហ្ស៊កដានីនិងអេហ្ស៊ីប។ នឹងគ្មានមនុស្សណាម្នាក់ត្រូវចាប់បង្ខំឲ្យចាកចេញពីហ្គាហ្សាឡើយ ប្រសិនបើផែនការសន្តិភាពត្រូវបានអនុវត្ត។ សេតវិមានក៏អះអាងដែរថា ប្រជាជនជ្រោយហ្គាហ្សានឹងត្រូវលើកទឹកចិត្តឲ្យស្តិតនៅដើម្បីចូលរួមក្នុងការកសាងឡើងវិញ។
សង្គ្រាមរវាងអ៊ីស្រាអែលនិងហាម៉ាស់ពីថ្ងៃទី៧តុលាឆ្នាំ២០២៣មក បណ្ដាលឲ្យជនប៉ាឡេស្ទីនស្លាប់ជាង៦៦.០០០នាក់នៅជ្រោយហ្គាហ្សា។ ខាងអ៊ីស្រាអែលវិញមានអ្នកស្លាប់១២១៩នាក់ភាគច្រើនជាជនស៊ីវិល៕
ចែករំលែកព័តមាននេះ