ទីក្រុងហាណូយ៖ ប្រទេសវៀតណាមកំពុងតែរត់ប្រណាំងនឹងពេលវេលាដើម្បីដោះស្រាយបញ្ហានៅចំពោះមុខដោយសារខ្យល់ព្យុះឈ្មោះបួឡយ។ អាជ្ញាធរចាប់ផ្ដើមជម្លៀសមនុស្សរាប់ពាន់នាក់ និងបិទអាកាសយានដ្ឋានជាច្រើនកន្លែងនៅភាគកណ្ដាល។ ខ្យល់ព្យុះនេះរំកិលខ្លួនឆាប់រហ័សជាងការព្យាករទៅទៀត។ ថ្ងៃនេះតាំងពីព្រឹកព្រលឹមតែម្ដង ខ្យល់ព្យុះចាប់ផ្ដើមបក់ទៅដល់តំបន់ដីគោក។
ខ្យល់ព្យុះបក់ទៅដល់តំបន់មាត់សមុទ្រខេត្តហាទិញ (Ha Tinh) ដែលស្ថិតនៅប្រទេសវៀតណាមខាងជើង។ ក្រុមឧតុនិយមព្យាករថាខ្យល់ព្យុះនឹងបក់ចូលជ្រៅទៅក្នុងតំបន់ដីគោក មុននឹងបន្ថយកម្លាំងបោកបក់របស់វានៅពេលបង្វែរទិសដៅទៅភាគពាយព្យទៅរកតំបន់ខ្ពង់រាបនៃខេត្តហាទិញ និងខេត្តញ៉ែអាន (Nghe An) ដែលនៅក្បែរខាងនោះ។
ខ្យល់ព្យុះបួឡយទើបតែវាយប្រហារប្រទេសហ្វ៊ីលីពីន និងសម្លាប់មនុស្សយ៉ាងតិច២០នាក់។ ជនរងគ្រោះភាគច្រើនស្លាប់ដោយសារដើមឈើបាក់សង្កត់ពីលើ និងលង់ទឹក។ ខ្យល់ព្យុះធ្វើឱ្យដាច់ភ្លើងអគ្គិសនីជាច្រើនកន្លែងនៅតាមទីក្រុងតូច-ធំមួយចំនួន។ ខ្យល់ព្យុះបានបង្ខំឱ្យប្រជាជនហ្វ៊ីលីពីនរាប់ម៉ឺននាក់ចាកចោលផ្ទះសម្បែងដើម្បីស្នាក់នៅក្នុងទីជម្រកបណ្ដោះអាសន្ន។
ក្រឡេកទៅមើលប្រទេសវៀតណាមវិញម្ដង ខ្យល់ព្យុះដែលមានល្បឿន១៣៣គីឡូម៉ែត្រក្នុងមួយម៉ោងនេះនឹងធ្វើឱ្យរលកសមុទ្រហក់ឡើងខ្ពស់លើសពីមួយម៉ែត្រ និងបង្កជាភ្លៀងធ្លាក់ខ្លាំង។ ដូច្នេះ គេរំពឹងថានឹងមានគ្រោះទឹកជំនន់ និងការបាក់ដីកើតឡើងជាមិនខាន។ សារព័ត៌មានរបស់រដ្ឋផ្សាយថាផ្ទះជាង៣សែនខ្នងដាច់ភ្លើង, ដំបូលផ្ទះស័ង្កសីត្រូវខ្យល់បក់របើករបាញអស់រលីង។ នៅឃុំផុងញ៉ា (Phong Nha) ដែលស្ថិតនៅចម្ងាយ៤៥គីឡូម៉ែត្រពីដុងហយ (Dong Hoi) ប្រជាជនប្រាប់ថាមានខ្យល់កន្ត្រាក់បក់ខ្លាំងៗ និងមានភ្លៀងធ្លាក់ខ្លាំង។ ប្រជាជនម្នាក់ប្រាប់ថាគ្មាននរណាហ៊ានចាកចេញពីផ្ទះទេ។
នៅក្នុងស្ថានភាពនេះ អាជ្ញាធរបានអំពាវនាវឱ្យអ្នកម្ចាស់ទូកនេសាទនៅភាគខាងជើង និងភាគកណ្ដាលសូមប្រញាប់ចូលចតនៅមាត់កំពង់ជាបន្ទាន់។ អាជ្ញាធរត្រៀមជម្លៀសមនុស្សជាង២សែននាក់នៅទីក្រុងដាណាង (Da Nang) ដែលជាទីក្រុងមាត់សមុទ្រ។ ចំណែកទីក្រុងវ៉េ (Hue) ត្រៀមជម្លៀសមនុស្សជាង៣សែននាក់។ ដូច្នេះ គ្រាន់តែទីតាំង២កន្លែងនេះត្រៀមជម្លៀសមនុស្សជាងកន្លះលាននាក់។
នៅក្នុងវិស័យអាកាសចរណ៍ស៊ីវិល អាជ្ញាធរថ្លែងថាព្រលានយន្តហោះនៅតំបន់មាត់សមុទ្រចំនួន៤កន្លែងត្រូវផ្អាកដំណើរការ។ ក្នុងនោះក៏មានអាកាសយានដ្ឋានអន្តរជាតិទីក្រុងដាណាងផងដែរ។ តាំងពីមុនពេលខ្យល់ព្យុះបក់ទៅដល់ដីគោក ភ្លៀងចាប់ផ្ដើមធ្លាក់ខ្លាំងតាំងពីយប់ថ្ងៃសៅរ៍នៅតាមបណ្ដាខេត្តភាគកណ្ដាល។ ដងវិថីនានានៅទីក្រុងវ៉េត្រូវទឹកលិចគ្មានសល់។ មនុស្សម្នាក់បាត់ខ្លួនជារៀងរហូតបន្ទាប់ពីរសាត់ទៅតាមខ្សែទឹកហូរ។
នៅខេត្តក្វាងទ្រី (Quang Tri) ទូកនេសាទមួយគ្រឿងលិចទៅក្នុងទឹកសមុទ្រ ខណៈដែលទូកមួយគ្រឿងទៀតជាប់កឿងនៅពេលព្យាយាមស្វែងរកកន្លែងចត។ មនុស្ស៩នាក់ត្រូវគេជួយសង្គ្រោះទាន់ពេលវេលា។ ប៉ុន្តែមនុស្ស២នាក់ទៀតបាត់ខ្លួន។ យុវជនអាយុ១៦ឆ្នាំម្នាក់ស្លាប់ដោយឆក់ខ្សែភ្លើងនៅពេលគាត់រួមដំណើរជាមួយមិត្តភក្តិកាត់ភ្លៀងលាយខ្យល់កន្ត្រាក់។ អាជ្ញាធរអំពាវនាវឱ្យប្រជាជនបន្តប្រុងប្រយ័ត្នខ្ពស់ព្រោះទោះបីខ្យល់ព្យុះអាចនឹងអស់ឥទ្ធិពលរបស់វា ប៉ុន្តែភ្លៀងនឹងបន្តធ្លាក់ខ្លាំងរហូតដល់ថ្ងៃទី១ ខែតុលា។ បណ្ដាខេត្តភាគខាងជើង និងភាគកណ្ដាលប្រឈមនឹងគ្រោះទឹកជំនន់ និងការបាក់ដី។ នេះបើតាមការផ្សាយរបស់អេភី និងប្រភពដទៃទៀត៕
ចែករំលែកព័តមាននេះ