ទីក្រុងវ៉ាស៊ីនតោន៖ មន្ត្រីជាន់ខ្ពស់របស់គណបក្សសាធារណរដ្ឋនៅអាមេរិកប្រមើលឃើញថាអ៊ុយក្រែនអាចមានសមត្ថភាពវាយបកវិញទៅលើកងទ័ពរុស្ស៊ី ហើយអាចនឹងទទួលជ័យជម្នះនៅក្នុងសង្គ្រាម។ បន្ទាប់ពីវិលត្រឡប់ពីបំពេញទស្សនកិច្ចនៅអ៊ុយក្រែន មន្ត្រីរូបនេះយល់ឃើញថាបើសិនអាមេរិក និងសម្ព័ន្ធមិត្តផ្ដល់ការឧបត្ថម្ភ-គាំទ្រអ៊ុយក្រែនឱ្យបានពេញទំហឹង អ៊ុយក្រែនប្រាកដជាឈ្នះសង្គ្រាម។ លោកក៏បានជំរុញឱ្យសភាខង់ហ្ក្រែស (congress) បោះឆ្នោតអនុម័តសេចក្ដីព្រាងច្បាប់ដាក់ទណ្ឌកម្មរុស្ស៊ីឱ្យបានកាន់តែឆាប់តាមដែលអាចធ្វើទៅបាន។
លោកម៉ៃឃើល ថឺនណឺ (Michael Turner) ជាអ្នកតំណាងរាស្ត្រប្រចាំរដ្ឋអូហៃយ៉ូ (Ohio) និងជាសមាជិកគណៈកម្មការរដ្ឋសភាទទួលបន្ទុកខាងអាវុធ។ លោកបានដឹកនាំគណៈប្រតិភូសភាសភាដែលមកពីគណបក្សទាំង២ទៅប្រទេសអ៊ុយក្រែន ប៉ូឡូញ និងអាល្លឺម៉ង់។ លោកអំពាវនាវឱ្យប្រធានរដ្ឋសភា លោកម៉ៃចនសុន (Mike Johnson) ប្រញាប់រៀបចំការបោះឆ្នោតអនុម័តសេចក្ដីព្រាងច្បាប់ដាក់ទណ្ឌកម្មរុស្ស៊ី។
យោងតាមវិធានការដាក់ទណ្ឌកម្មថ្មីនេះ ក្រុមប្រទេសដែលបន្តទិញប្រេងឆៅ, ឧស្ម័ន និងទំនិញដទៃទៀតពីរុស្ស៊ីអាចនឹងត្រូវអាមេរិកដំឡើងពន្ធដ៏ខ្ពស់ទៅលើទំនិញរបស់ពួកគេនៅពេលដឹកទៅលក់នៅអាមេរិក។ នេះជាផ្នែកមួយនៃយុទ្ធសាស្ត្រកាត់ផ្ដាច់ប្រាក់ចំណូលរបស់រុស្ស៊ី។ លោកថឺនណឺថ្លែងថាលោកត្រាំពិតជាគិតបានត្រឹមត្រូវ។ អ៊ុយក្រែនអាចនឹងវាយដណ្ដើមយកទឹកដីរបស់ខ្លួនត្រឡប់មកវិញទាំងអស់។
ការអំពាវនាវរបស់អ្នកតំណាងរាស្ត្ររូបនេះជាកម្លាំងជំរុញថ្មីមួយទៀតដើម្បីអនុម័តសេចក្ដីព្រាងច្បាប់ដាក់ទណ្ឌកម្ម។ សេចក្ដីព្រាងនេះទទួលបានគាំទ្រយ៉ាងទូលំទូលាយ ប៉ុន្តែត្រូវនៅទើរត្រឹមរដ្ឋសភារាប់ខែមកហើយដើម្បីរង់ចាំសេចក្ដីសម្រេចពីរដ្ឋាភិបាលរបស់លោកត្រាំ។ សមាជិកព្រឹទ្ធសភាស្ទើរតែទាំងអស់រួមទាំងអ្នកតំណាងរាស្ត្រភាគច្រើនបានចុះហត្ថលេខាគាំទ្រសេចក្ដីព្រាងច្បាប់នេះ។
អាមេរិកលើកនេះអាចនឹងលេងដៃធ្ងន់បន្តិច។ នៅក្នុងសេចក្ដីព្រាងច្បាប់នោះ ប្រទេសណាដែលទិញទំនិញរុស្ស៊ី ហើយដឹកទំនិញទៅលក់នៅអាមេរិកអាចនឹងត្រូវអាមេរិកដំឡើងពន្ធគយរហូតដល់៥០០% ក្នុងនោះក៏មានរុស្ស៊ីចិន និងឥណ្ឌាផងដែរ។ លោកថឺនណឺមានជំនឿថាបើសិនមានជំនួយគ្រប់គ្រាន់សម្រាប់អ៊ុយក្រែន ហើយក្រុមបស្ចិមប្រទេសដាក់ទណ្ឌកម្មរុស្ស៊ីថែមទៀត ពេលនោះរុស្ស៊ីមិនអាចជោគជ័យទៅរួចទេ គឺមានតែបរាជ័យ។
នៅក្នុងលិខិតផ្ញើជូនប្រធានរដ្ឋសភា លោកថឺនណឺគូសបញ្ជាក់ថាលោកពូទីនមិនអាចបញ្ឈប់ការវាយប្រហារត្រឹមប្រទេសអ៊ុយក្រែនទេ។ មានន័យថាគាត់អាចនឹងពង្រីកសង្គ្រាមទៅប្រទេសដទៃទៀត។ នេះបើតាមការដកស្រង់ប្រភពពីអេភី និងប្រភពដទៃទៀត៕
ចែករំលែកព័តមាននេះ