ខេត្តត្បូងឃ្មុំ ៖ គម្រោងធ្វើផ្លូវបេតុងនិងផ្លូវក្រាលក្រួសក្រហមនៅក្នុងឃុំចំនួន២ ដែលមានទឹកប្រាក់សរុបជាង ៦០០លានរៀល ត្រូវបានដាក់ឲ្យដេញថ្លៃជាសាធារណៈ កាលពីព្រឹកថ្ងៃទី១៧ ខែកញ្ញា ឆ្នាំ២០២៥កន្លងទៅ ដោយធ្វើឡើងនៅសាលាឃុំក្រែក…
ខេត្តត្បូងឃ្មុំ ៖ គម្រោងធ្វើផ្លូវបេតុងនិងផ្លូវក្រាលក្រួសក្រហមនៅក្នុងឃុំចំនួន២ ដែលមានទឹកប្រាក់សរុបជាង ៦០០លានរៀល ត្រូវបានដាក់ឲ្យដេញថ្លៃជាសាធារណៈ កាលពីព្រឹកថ្ងៃទី១៧ ខែកញ្ញា ឆ្នាំ២០២៥កន្លងទៅ ដោយធ្វើឡើងនៅសាលាឃុំក្រែក ស្រុកពញាក្រែក ។
ចំពោះលទ្ធផលនៃការដេញថ្លៃ គេសង្កេតឃើញថា មានក្រុមហ៊ុនជាច្រើនបានចូលរួមដាក់ប៊ីតក្នុងប្រអប់សំបុត្រដោយតម្លាភាព ហើយនិងបើកសិទ្ធិសេរីភាពឱ្យអ្នកសារព័ត៌មានចូលរួមតាមដានដោយសេរីទៀតផង ។ កន្លងមកធ្លាប់មានផ្ទុះបាតុភាព មន្ត្រីលទ្ធកម្មម្នាក់បានប្រើពាក្យសម្ដីមិនសមរម្យលើអ្នកកាសែតអនឡាញ ដែលមានបំណងចូលយកព័ត៌មានដេញថ្លៃ ។
លោក សុខ មករា អភិបាលរងស្រុកពញាក្រែក ថ្លែងថា ចំពោះគម្រោងផ្លូវដែលត្រូវដាក់ឲ្យដេញថ្លៃ និងធ្វើឡើងនៅសាលាឃុំក្រែក នេះ មានផ្លូវក្រាលក្រួសក្រហម ដែលនៅសល់ពីគម្រោងដេញថ្លៃលើកមុនជាង៥៦លានរៀល និងផ្លូវបេតុងមួយខ្សែទៀតនៅឃុំក្រែកប្រវែង ៩១២ម៉ែត្រ ។ តម្លៃដាក់ឲ្យដេញថ្លៃជាង ៦០០លានរៀល តាមការសង្កេតដោយផ្ទាល់ គឺមានក្រុមហ៊ុនជាច្រើនបានចូលរួមប្រកួតប្រជែង ។
លោកអភិបាលរងស្រុក ឲ្យដឹងទៀតថា ចំពោះលទ្ធផលនៃការដេញថ្លៃ ៖
១-សម្រាប់ផ្លូវក្រាលក្រួសក្រហមនៅឃុំត្រពាំងផ្លុង តម្លៃប៉ានស្មានជាង ៥៦លានរៀល មានក្រុមហ៊ុនចំនួន ១០ បានចូលរួមប្រកួតប្រជែង និងបានទៅលើក្រុមហ៊ុន ហ័ន សោភ័ណ្ឌ នៅត្បូងឃ្មុំ តម្លៃ ៤១លានរៀល ។
២-ផ្លូវបេតុងប្រវែង ៩១២ម៉ែត្រ ទទឹង៥ម៉ែត្រ កម្រាស់១តឹកកន្លះ តម្លៃដែលដេញថ្លៃជាង ៦០០លានរៀល ក្នុងនោះមានក្រុមហ៊ុនចំនួន ១៣ចូលរួមប្រកួតប្រជែង និងបានលើក្រុមហ៊ុន ហ័ន សោភ័ណ្ឌ តម្លៃ ២៨១លានរៀល ។
សម្រាប់ថវិកាដែលត្រូវដាក់ឲ្យដេញថ្លៃនាឱកាសនេះ គឺជាថវិការបស់មូលនិធិឃុំទាំង២តែម្ដង ។ ក្នុងនាមអាជ្ញាធរចូលរួមសង្កេតមើលការដេញថ្លៃ គឺធ្វើយ៉ាងណាទទួលបានលទ្ធផលល្អ និងរក្សាសណ្ដាប់ធ្នាប់ពេលដេញថ្លៃ កុំឲ្យមានបញ្ហាអសកម្មណាមួយកើតឡើង ។ ជាមួយនេះ ក៏មានការព្រួយបារម្ភខ្លាចរឿងអចេតនាណាមួយលេចចេញទៅក្រៅ គឺជះឥទ្ធិពលមកលើគណៈកម្មការដេញថ្លៃ សូមកុំឱ្យមាន ។
សូមបញ្ជាក់ថា ក្រុមហ៊ុនដែលដេញថ្លៃបាន ត្រូវចុះកិច្ចសន្យាចុះស្ថាបនាផ្លូវទាំង២ខ្សែ ដោយធ្វើឡើងនៅថ្ងៃទី២៩ ខែកញ្ញា ឆ្នាំ២០២៥។ ចំណែកឃុំនីមួយៗ ត្រូវចាត់ឱ្យកម្លាំងរបស់ឃុំចុះតាមដានមើលសកម្មភាពស្ថាបនារបស់ក្រុមហ៊ុនឲ្យជាប់ជាប្រចាំ និងត្រូវដាក់ផ្លាកសញ្ញាដើម្បីប្រាប់ឱ្យពលរដ្ឋក្នុងមូលដ្ឋានដឹងជាមុន ។
អាជ្ញាធរក៏បានព្រមានដល់ក្រុមហ៊ុនដែលដេញថ្លៃបាន ត្រូវស្ថាបនាផ្លូវតាមស្តង់ដាបច្ចេកទេស បើពុំនោះទេមិនទទួលយកឡើយ ៕
ចែករំលែកព័តមាននេះ