រាជធានីភ្នំពេញ ៖ អយ្យការអមសាលាដំបូងរាជធានីភ្នំពេញ នៅថ្ងៃទី១៣ ខែកញ្ញា ឆ្នាំ២០២៥ បានប្រកាសព័ត៌មាន ស្តីពី ការចោទប្រកាន់លើក្រុមក្មេងទំនើង៣ក្រុម ដែលមានរហស្សនាមថា…
រាជធានីភ្នំពេញ ៖ អយ្យការអមសាលាដំបូងរាជធានីភ្នំពេញ នៅថ្ងៃទី១៣ ខែកញ្ញា ឆ្នាំ២០២៥ បានប្រកាសព័ត៌មាន ស្តីពី ការចោទប្រកាន់លើក្រុមក្មេងទំនើង៣ក្រុម ដែលមានរហស្សនាមថា ក្រុមBCK (បឹងឈូក) ក្រុមDC (ដើមឆ័ត្រ) និងក្រុមMT (ប្លុកថ្នាំ)។
អ្នកនាំពាក្យនៃអយ្យការអមសាលាដំបូងរាជធានីភ្នំពេញ មានកិត្តិយសសូមជម្រាបជូនសាធារណជនមេត្តាជ្រាបថា កាលពីថ្ងៃទី០៥ ខែកញ្ញា ឆ្នាំ២០២៥ វេលាម៉ោង២០ និង៣០នាទី មានក្មេងទំនើងមួយក្រុមរហស្សនាមថា BCK (បឹងឈូក) មានគ្នាចំនួន០៤ នាក់ បានជិះម៉ូតូចំនួន២ គ្រឿង កាន់ដុំថ្មចំនួន២ដុំ មកដល់ចំណុចផ្លូវបេតុង ក្រុមទី១០ ភូមិចុងខ្សាច់ សង្កាត់ទួលសង្កែទី១ ខណ្ឌឬស្សីកែវ រាជធានីភ្នំពេញ ក្រុម BCK (បឹងឈូក) ក៏បានធ្វើសកម្មភាពយកដុំថ្មនោះគប់ទៅលើ ក្រុមក្មេងទំនើងមួយក្រុមផ្សេងទៀតមានរហ្សនាមថា ក្រុមDC (ដើមឆ័ត្រ) ត្រូវចំម៉ូតូអ្នកជិតខាងមួយគ្រឿងដែលចតក្បែរនោះ បំតាលឲ្យបែកក្បាំងម៉ូតូ និងត្រូវជញ្ជាំងផ្ទះជួល។ រួចក្រុមBCK (បឹងឈូក) បាននាំគ្នាជិះម៉ូតូគេចខ្លួនតាមផ្លូវរទេះភ្លើង ភ្លាមនោះក្រុមDC (ដើមឆ័ត្រ) បានជិះម៉ូតូដេញតាមមកដល់ចំណុចជិតផ្លូវបំបែកឡើងមកផ្លូវជាតិលេខ៥ បក្ខពួកនៃក្រុមBCK (បឹងឈូក) បានជិះម៉ូតូទៅបុកគេដួល ឃើញដូច្នេះក្រុមDC (ដើមឆ័ត្រ) បានកាន់មួកសុវត្តិភាពចុះពីលើម៉ូតូទៅរកវាយក្រុមBCK (បឹងឈូក) តែក្រុមBCK (បឹងឈូក) បានរត់គេចខ្លួនអស់។
បន្ទាប់មកនៅថ្ងៃទី០៦ ខែកញ្ញា ឆ្នាំ២០២៥ វេលាម៉ោង១៤ និង៣០ នាទី ក្រុមក្មេងទំនើងមួយក្រុមមានគ្នាចំនួន០៤ នាក់ មានរហស្សនាម ក្រុមMT (ប្លុកថ្នាំ) ជិះម៉ូតូចំនួន២គ្រឿង មកដល់ចំណុចផ្លូវបេតុង ក្រុម១០ ភូមិចុងខ្សាច់ សង្កាត់ទួលសង្កែទី១ ខណ្ឌឬស្សីកែវ រាជធានីភ្នំពេញ រួចបាននាំគ្នាឈប់ម៉ូតូរកមើលក្រុមDC (ដើមឆ័ត្រ) ដែលធ្លាប់ឌឺដងតាមហ្វេសប៊ុក និងតិកតុក ក៏ឃើញក្រុមDC (ដើមឆ័ត្រ) ជាច្រើននាក់នៅជុំគ្នា ពេលនោះបក្ខពួកនៃក្រុមMT (ប្លុកថ្នាំ) បានចុះពីលើម៉ូតូយកដុំថ្ម គប់ទៅក្នុងផ្ទះជួលនៅចំណុចកើតហេតុបណ្តាលឲ្យចំឆ្នាំងសម្ល ភ្លាមនោះបក្ខពួកនៃក្រុមDC (ដើមឆ័ត្រ) បានស្ទុះមកចាប់បក្ខពួកនៃក្រុមMT (ប្លុកថ្នាំ) បានចំនួនម្នាក់ និងអូសចូលទៅក្នុងផ្ទះរួចបានទះកំភ្លៀងចំនួន២កំភ្លៀង ហើយក្រុមDC (ដើមឆ័ត្រ) វាយទៅលើបក្ខពួកនៃក្រុមMT (ប្លុកថ្នាំ) ចំនួន២ដៃ ចំទ្រូង និងមុខ និងបានបន្តវាយបណ្តាលឲ្យបក្ខពួកនៃក្រុមMT (ប្លុកថ្នាំ) ដួលផ្កាប់មុខរួចក៏ចូលទៅធាក់ និងជាន់បន្ថែមទៀត។
ក្រោយកើតហេតុសមត្តកិច្ចបានស្រាវជ្រាវ និងឃាត់ខ្លួនបានជនសង្ស័យចំនួន១១ នាក់ ១.ឈ្មោះ ញ៉ែម វង្សា ភេទប្រុស អាយុ៤៤ ឆ្នាំ ២.ឈ្មោះ ប៉ុន វិចិត្រ ភេទប្រុស អាយុ១៤ ឆ្នាំ ៣.ឈ្មោះ ឆៃ វិច្ឆិកា ភេទប្រុស អាយុ១៤ ឆ្នាំ ៤.ឈ្មោះ រឹម អ៊ីសា ហៅ រ៉ា អ៊ីសា ភេទប្រុស អាយុ១៤ ឆ្នាំ ៥.ឈ្មោះ ជុន ម៉េងហួត ភេទប្រុស អាយុ១៥ ឆ្នាំ ៦.ឈ្មោះ ឡាយ ហៃ ភេទប្រុស អាយុ១៥ ឆ្នាំ ៧.ឈ្មោះ ង៉ែត គឹមសេង ភេទប្រុស អាយុ១៤ ឆ្នាំ ៨.ឈ្មោះ ទេស លីម៉េង ហៅ ជូ ភេទប្រុស អាយុ១៤ ឆ្នាំ ៩.ឈ្មោះ ហៃ យ៉ាកូ ភេទប្រុស អាយុ១៤ ឆ្នាំ ១០.ឈ្មោះ អ៊ុក សេរីរិទ្ធរស្មី ភេទប្រុស អាយុ១៦ ឆ្នាំ និង១១.ឈ្មោះ វៀន បញ្ញាយ៉ារាជ្យ ភេទប្រុស កើតថ្ងៃទី៥ ខែកក្កដា ឆ្នាំ២០១២។ ចំណែកឈ្មោះ ប្រាក់ ឈិនរតនៈ ហៅ ណាក់ ភេទប្រុស អាយុ១៥ ឆ្នាំ និងបក្ខពួកដែលពាក់ពន្ធនិងករណីខាងលើនេះ សមត្តកិច្ចបាននិងកំពុងស្រាវជ្រាវបន្ត។
ក្រោយពីបានទទួល និងពិនិត្យលើសំណុំរឿងនេះ តំណាងអយ្យការសម្រេចចោទប្រកាន់លើជនសង្ស័យចំនួន១១ នាក់និងបក្ខពួក ពីបទ.ហិង្សាដោយចេតនាមានស្ថានទម្ងន់ទោស និងធ្វើឲ្យខូចខាតដោយចេតនាមានស្ថានទម្ងន់ទោស ប្រព្រឹត្តនៅចំណុចផ្លូវបេតុង ក្រុមទី១០ សង្កាត់ទួលសង្កែទី១ រាជធានីភ្នំពេញ កាលពីថ្ងៃទី៥ និងថ្ងៃទី៦ ខែកញ្ញា ឆ្នាំ២០២៥ បទល្មើសដែលមានបញ្ញត្តិឲ្យផ្តន្ទាទោសតាមមាត្រា ២១៨ មាត្រា ៤១១ នៃក្រមព្រហ្មទណ្ឌ។ ចំណែកជនសង្ស័យឈ្មោះ វៀន បញ្ញាយ៉ារាជ្យ ភេទប្រុស កើតថ្ងៃទី៥ ខែកក្កដា ឆ្នាំ២០១២ ត្រូវបានតំណាងអយ្យការបានសម្រេចបង្គាប់ឲ្យដោះលែងឲ្យមានសេរីភាពឡើងវិញ ដោយហេតុថាជននេះជាអនីតិជនមានអាយុ១៣ ឆ្នាំ។
ក្រោយបញ្ចប់បើកការស៊ើបសួរ និងចោទប្រកាន់ជនសង្ស័យជាផ្លូវការ សំណុំរឿងខាងលើនេះត្រូវបានតំណាងអយ្យការចាត់បញ្ជូនទៅចៅក្រមស៊ើបសួរ ដើម្បីសម្រេចឃុំខ្លួនដាក់ពន្ធនាគារជាបណ្តោះអាសន្ន ៕
ចែករំលែកព័តមាននេះ