ប្រទេសជប៉ុន ៖ នាយករដ្ឋមន្ត្រីជប៉ុនលោកស៊ីហ្សេរូអ៊ីស៊ីបា ប្រកាសនាថ្ងៃទី៧កញ្ញាពីការលាលែងពីតំណែងប្រធានគណបក្សលោក ដែលបែបនេះវាក៏ជាការលាលែងពីតំណែងនាយករដ្ឋមន្ត្រីផងដែរ។ ការប្រកាសលាលែងនោះដោយសារការជម្រុញ របស់សមាជិកសំខាន់ៗនៃគណបក្សសេរីប្រជាធិបតេយ្យរបស់លោក ដែលអំពាវនាវឲ្យមានការផ្លាស់ប្ដូរថ្នាក់ដឹកនាំ បន្ទាប់ពីលទ្ធផលអាក្រក់នៃការបោះឆ្នោតព្រឹទ្ធសភាកន្លងទៅថ្មីៗនេះ។
សេចក្ដីសម្រេចចិត្តនោះមិនមានអ្វីភ្ញាក់ផ្អើលឡើយ បើដរាបណាប្រមុខរដ្ឋាភិបាលស្ថិតក្រោមការគាបសង្កត់។ ប៉ុន្តែលោកស៊ីហ្សេរូអ៊ីស៊ីបា នៅតែធ្វើមិនដឹងមិនឮចំពោះការអំពាវនាវទាំងនោះ ដោយថ្លែងកាលពីថ្ងៃទី២កញ្ញាថា លោកនឹងធ្វើសេចក្ដីសម្រេចចិត្តសមស្របមួយនាពេលខាងមុខ។
ទីបញ្ចប់នារសៀលថ្ងៃទី៧កញ្ញា លោកបានថ្លែងក្នុងសន្និសីទសារព័ត៌មានមួយថា ខ្ញុំសម្រេចចិត្តលាលែងចេញពីតំណែងប្រមុខគណបក្សសេរីប្រជាធិតេយ្យហើយ។ លោកថាពេលនេះដែលការចរចាពីវិធានការពន្ធគយអាមេរិក ឈានដល់ទីបញ្ចប់ខ្ញុំគិតថា ពេលវេលាសមស្របមកដល់ហើយ។ ខ្ញុំសម្រេចដកខ្លួនថយទុកកន្លែងឲ្យអ្នកជំនាន់ក្រោយ។
សេចក្ដីសម្រេចនោះ ត្រូវបានធ្វើមិនដល់មួយឆ្នាំផងបន្ទាប់ពីមេដឹកនាំវ័យ៦៨ឆ្នាំនោះ ឡើងកាន់ជាប្រមុខគណបក្សសេរីប្រជាធិបតេយ្យជប៉ុន PLDហើយជាស្វ័យប្រវត្តិក្លាយជានាយករដ្ឋមន្ត្រី។ យោងតាមទូរទស្សន៍ជប៉ុនNHK ថា បណ្ដាសមាជិកសភានិងបណ្ដាអ្នកទទួលខុសត្រូវតំបន់របស់គណបក្សPLDក្នុងទូទាំងប្រទេសជប៉ុន ត្រូវមកជួបជុំគ្នាធ្វើការបោះឆ្នោតនាថ្ងៃទី៨កញ្ញា ជ្រើសរើសប្រធានគណបក្សថ្មី។
NHKអះអាងថា លោកស៊ីហ្សេរូអ៊ីស៊ីបាចង់ចៀសវាងការបែកបាក់ ក្នុងផ្ទៃគណបក្សលោកទើបសុខចិត្តលាលែង៕
ចែករំលែកព័តមាននេះ