ទីក្រុងបាងកក៖ មានស្ថានការណ៍វិវត្តថ្មីពាក់ព័ន្ធនឹងនយោបាយថៃ។ ថ្ងៃនេះ រដ្ឋសភាប្រកាសថានឹងកោះប្រជុំនៅថ្ងៃទី៣ ខែកញ្ញា (ចំថ្ងៃពុធសប្ដាហ៍នេះ) ដោយផ្ដោតសំខាន់ទៅលើការត្រៀមបោះឆ្នោតផ្ដល់សេចក្ដីទុកចិត្តទៅលើបេក្ខជននាយករដ្ឋមន្ត្រីថ្មី។ គណបក្សណាខ្លះស្នើបេក្ខភាពនាយករដ្ឋមន្ត្រីទៅសភាមិនទាន់ដឹងនៅឡើយទេ។ ប៉ុន្តែនៅពីក្រោយវាំងនននយោបាយ គណបក្សនានាកំពុងតែដុតដៃដុតជើងក្នុងការដើរកៀងគរគណបក្សដទៃទៀតដែលមានអាសនៈនៅក្នុងសភាដើម្បីបោះឆ្នោតគាំទ្របេក្ខជនរបស់ខ្លួន។ ក្នុងនោះ គេដឹងថាមានគណបក្ស២កំពុងប្រជែងគ្នាដណ្ដើមការគាំទ្រពីគណបក្សប្រជាជន។
គណបក្សភូមិចៃថៃកំពុងបើកយុទ្ធនាការរបស់ខ្លួនដោយស្ងៀមស្ងាត់ដើម្បីឡើងកាន់អំណាចនៅពេលខាងមុខ។ ដូច្នេះគណ បក្សនេះកំពុងប្រទាំងប្រទើសគ្នាជាមួយគណបក្សភឿថៃដែលកំពុងអន្ទងចិត្តគណបក្សប្រជាជនដើម្បីបោះឆ្នោតគាំទ្របេក្ខជនរបស់ខ្លួន (លោកឆៃកាសឺម)។ ចំណុចសំខាន់នៅត្រង់ថាគណបក្សភឿថៃកំពុងដឹកនាំរដ្ឋាភិបាលចាំផ្ទះ ហើយអាចនឹងមានសិទ្ធិស្នើបេក្ខភាពរបស់ខ្លួនទៅមុន។ ដូច្នេះបើទុកជាភូមិចៃថៃអាចមានសិទ្ធិស្នើបេក្ខភាពរបស់ខ្លួនក៏ត្រូវចាំវគ្គក្រោយសិន។
គណបក្សប្រជាជនមានអ្នកតំណាងរាស្ត្រច្រើនជាងគេនៅសភា។ ប៉ុន្តែគណបក្សនេះមិនអាចស្នើបេក្ខភាពទៅសភាទេព្រោះគ្មានបេក្ខជននាយករដ្ឋមន្ត្រី។ គណបក្សនេះទើបតែបង្កើតថ្មីក្រោយពេលតុលាការធម្មនុញ្ញរំលាយគណបក្សឆ្ពោះទៅមុខ។ អ្នកតំណាងរាស្ត្ររបស់គណបក្សឆ្ពោះទៅមុខក៏ទៅជ្រកកោននៅក្នុងគណបក្សប្រជាជន។ គេសម្លឹងឃើញគណបក្សនេះជាកម្លាំងចលករសំខាន់ក្នុងការចាំជួយពីក្រោយខ្នងដើម្បីឱ្យគណបក្សណាមួយឡើងកាន់អំណាច។ ប៉ុន្តែក៏ត្រូវមានថ្នូរត្រឡប់ទៅវិញដែរ។ មានន័យថាត្រូវធ្វើទៅតាមលក្ខខណ្ឌទាមទារមួយចំនួន។ ក្រោយពេលបោះឆ្នោតឱ្យគេក្លាយជានាយករដ្ឋមន្ត្រីរួចហើយ គណបក្សប្រជាជនសន្យាថាខ្លួននឹងបន្តធ្វើជាគណបក្សប្រឆាំងដដែល។
ឥឡូវនេះ គេសង្កេតឃើញថាមានប៉ូលនយោបាយ ឬមុំនយោបាយបីនៅក្នុងគម្រោងបោះឆ្នោតជ្រើសរើសនាយករដ្ឋមន្ត្រីថ្មី។ ទី១-ក្រុមពណ៌ទឹកក្រូចដែលដឹកនាំដោយគណបក្សប្រជាជនដែលមាន១៤៣អាសនៈនៅក្នុងសភា, ទី២-ក្រុមពណ៌ក្រហមដែលដឹកនាំដោយគណបក្សភឿថៃមាន១៤០អាសនៈនៅក្នុងសភា និងទី៣-ក្រុមពណ៌ខៀវដែលដឹកនាំដោយគណបក្សភូមិចៃថៃមាន៦៩អាសនៈនៅក្នុងសភា។
នៅថ្ងៃនេះផងដែរ ប្រធានរដ្ឋសភាថៃ លោកវ៉ាន់មហាម៉ាត់ (Wan Muhammad Noor Matha) ប្រកាសថាការបោះឆ្នោតជ្រើសរើសនាយករដ្ឋមន្ត្រីថ្មីអាចនឹងធ្វើឡើងនៅចន្លោះថ្ងៃទី៤ ឬទី៥ ខែកញ្ញា។ លោកបានណែនាំឱ្យអគ្គលេខាធិការដ្ឋានរដ្ឋសភាត្រៀមខ្លួនទទួលយកសំណើពីបណ្ដាគណបក្សនយោបាយនានាដែលចង់បញ្ជូនបេក្ខជនរបស់ខ្លួនទៅសភាដើម្បីស្នើសុំសេចក្ដីទុកចិត្ត។
លោកវ៉ាន់មហាម៉ាត់សង្កត់ធ្ងន់ថាមិនអាចបណ្ដោយឱ្យតំណែងនាយករដ្ឋមន្ត្រីទំនេរជាស្ថាពរបែបនេះយូរតទៅទៀតទេ។ បើមិនដូច្នេះទេនឹងធ្វើឱ្យប៉ះពាល់ការទុកចិត្តពីសាធាណៈជន។ ប្រភពខ្លះថាទោះបីភឿថៃអះអាងថាខ្លួន និងគណបក្សប្រជាជនបាននិយាយត្រូវរ៉ូវគ្នារួចហើយដើម្បីគាំទ្របេក្ខជនរបស់ខ្លួន ប៉ុន្តែគណបក្សប្រជាជនបញ្ជាក់ច្បាស់ៗថាខ្លួនសូមរក្សាភាពស្ងៀមស្ងាត់ មិនប្រកាសគាំទ្របេក្ខជនរូបណាទេ។ ដូច្នេះ ត្រូវរង់ចាំរហូតដល់ចេញលទ្ធផលបោះឆ្នោតសិនទើបដឹងទាំងអស់គ្នា។
រឿងនេះច្បាស់ណាស់។ សូម្បីតែមន្ត្រីជាន់ខ្ពស់របស់គណបក្សប្រជាជនក៏ទើបតែចេញមកបញ្ជាក់ផងដែរថារាល់ការធ្វើសេចក្ដីថ្លែងការណ៍ ឬអត្ថាធិប្បាយណាមួយមិនអាចយកជាផ្លូវការទេ។ ដូច្នេះ ទោះបីមានការចរចាគ្នាក្រោមតុយ៉ាងណាក្ដីក៏មិនទាន់អាចយកជាបានការដែរ។ ខាងលើនេះជាការដកស្រង់ប្រភពពីដឹណេសឹន (The Nation Thailand), ខាវសត់ (Khaosod) និងប្រភពដទៃទៀត៕
ចែករំលែកព័តមាននេះ