ស.ព.ចង.ក.តែមានស្នាមកា.ប់.ជិត១០ពូថៅ…សង្ស័យស្នេហ៍ត្រីកោណ
- កំពត
ខេត្តកំពត ៖ សមត្ថកិច្ចននគរបាលខេត្តកំពត ដឹកនាំដោយលោកឧត្តមសេនីយ៍ត្រី លក ញ៉ាវ ស្នងការរងនគរបាលខេត្ត សហការជាមួយកងរាជអាវុធហត្ថខេត្ត កាលពីព្រឹកថ្ងៃទី២៦ ខែសីហា…
ខេត្តកំពត ៖ សមត្ថកិច្ចននគរបាលខេត្តកំពត ដឹកនាំដោយលោកឧត្តមសេនីយ៍ត្រី លក ញ៉ាវ ស្នងការរងនគរបាលខេត្ត សហការជាមួយកងរាជអាវុធហត្ថខេត្ត កាលពីព្រឹកថ្ងៃទី២៦ ខែសីហា ឆ្នាំ២០២៥ បានធ្វើកោសល្យវិច័យលើសពយុវជនម្នាក់ ដែលត្រូវបានគេកាប់ជាច្រើនពូថៅលើក្បាលផ្នែកខាងក្រោយ ហើយត្រូវបានគេឃើញសពចងកទៅវិញ នៅក្នុងផ្ទះស្ត្រីម្នាក់នៅភូមិដំណាក់ក្រឡាញ់ ឃុំភ្នំប្រាសាទ ស្រុកកំពង់ត្រាច ខេត្តកំពត ។
ការធ្វើកោសល្យវិច័យបានបង្ហាញថា រកឃើញស្នាមកាប់ក្បាលពីក្រោយជាច្រើនពូថៅ គឺមានន័យថា ក្រោយកាប់ប្រហារហើយ ឃាតករបានយកសពមកចង.កដើម្បីបំភាន់សមត្ថកិច្ចពីករណីឃាតកម្ម មកជាការធ្វើអត្តឃាត ។
ករណីនេះ ភ្នាក់ងារកោះសន្តិភាពបានទាក់ទងតាមទូរសព្ទ័ទៅលោកឧត្តមសេនីយ៍ត្រី លក ញ៉ាវ តែទូរសព្ទ័ចូលហើយក៏ដាច់ការទាក់ទងវិញទៅ ។ ទោះបីជាបែបណា ក្នុងសំណុំរឿងនេះ នគរបាលខេត្តកំពតបានឃាត់ខ្លួនបុរសម្នាក់យកទៅសាកសួរនៅស្នងការដ្ឋាន រីឯស្ត្រីជាម្ចាស់ផ្ទះ ក៏ត្រូវនគរបាលហៅទៅសួរនាំដែរ ជុំវិញការស្លាប់របស់យុវជនម្នាក់នេះ ដែលគេកាប់ជិត១០ពូថៅ ហើយត្រូវបានគេយកទៅព្យួរ.ក សង្ស័យឃាតកម្មដោយស្នេហ៍ត្រីកោណ ។
លោកយាយឈ្មោះ ជុំ អោ អាយុ៧២ឆ្នាំ ត្រូវជាម្ដាយស្ត្រីម្ចាស់ផ្ទះ បានប្រាប់អ្នកយកព័ត៌មានថា បុរសដែលត្រូវនគរបាលខេត្តឃាត់ខ្លួននោះ ជាមនុស្សមកពីខេត្តឆ្ងាយ បានទាក់ទងស្នេហាជាមួយកូនស្រីគាត់ ។ បុរសរូបនោះឃោរឃៅណាស់ ចាប់តាំងពីត្រូវរ៉ូវគ្នាជាមួយកូនស្រីគាត់ឈ្មោះ កិច ជ្រី មកកាលណា គឺបានដេញបងប្អូនសាច់ញាតិខាងគាត់មិនឱ្យចូលផ្ទះទេ រហូតដល់ហ៊ានចាក់សោទ្វារមុខផ្ទះទៀតផង ។
លោកយាយ ជុំ អោ និយាយបន្តថា ផ្ទះដែលសាងសង់ស្កឹមស្កៃនៅជនបទមួយនេះ គឺជាផ្ទះកូនស្រីគាត់ បានទ្រព្យពីប្ដីបរទេស ដែលគេឱ្យលុយធ្វើផ្ទះទុកឱ្យ តែឥឡូវគេទៅស្រុកគេវិញហើយ ។
ដោយឡែកបុរសម្នាក់ដែលនគរបាលឃាត់ខ្លួននេះ គ្រាន់តែមកស្នាក់នៅតែប៉ុណ្ណោះ ។ ចំណែកឯយុវជនជាជនរងគ្រោះឈ្មោះ សុឹម ណែត អាយុ២៨ឆ្នាំ ក៏ជាអ្នកធ្វើសំណង់ឱ្យកូនស្រី គាត់ដែលជាម្ចាស់ផ្ទះ ។
បើយោងតាមការឱ្យដឹងពីឈ្មោះ សុឹម ណាំ ត្រូវជាបងបង្កើតរបស់ជនរងគ្រោះបាននិយាយថា ប្អូនប្រុសគាត់ដែលគេសម្លាប់នេះ បានដេកចាំគ្រឿងសំណង់ដែលខ្លួនជាអ្នកម៉ៅការ នៅផ្ទះស្ត្រីដែលមានប្ដីជាជនបរទេសនោះ ។ ប៉ុន្តែនៅម៉ោងប្រហែល៨យប់ ប្អូនប្រុសបានទូរស័ព្ទប្រាប់ម្ដាយថា ម្ចាស់ផ្ទះចាក់សោជាប់នៅក្នុងផ្ទះហើយ ចេញមិនរួចទេ ។
ក្រោយមកក៏ស្ងាត់រហូត ទាល់តែម៉ោង៩ព្រឹកថ្ងៃទី២៦ ខែសីហា ឆ្នាំ២០២៥ ក៏មានការភ្ញាក់ផ្អើលថា ឈ្មោះ សុឹម ណែត បានចង.កស្លាប់ ដែលការព្យួរ.កនេះ ក៏ទាបបំផុតមិនគួរឱ្យជឿថាជាការចងកទេ ហើយមានស្នាមកាប់ជាច្រើនពូថៅ និងឈាមស្រក់ពេញដី ឯរាងកាយសពប្រឡាក់សុទ្ធតែដី ។
មន្ត្រីនគរបាលបានប្រមូលវត្ថុតាងមានពូថៅ និងខ្សែសម្រាប់ព្យួរ.កសាកសព ។ នៅរសៀលថ្ងៃទី២៦ សីហា ដដែលនោះ នគរបាលបានអនុញាតឱ្យក្រុមសាច់ញាតិដឹកសពទៅធ្វើបុណ្យនៅភូមិកោះតាកូវ ឃុំព្រែកក្រឹស ស្រុកកំពង់ត្រាច ឯបុរសដែលសង្ស័យ គឺបុរសម្នាក់ដែលមកស្នាក់នៅជាមួយស្ត្រីម្ចាស់ផ្ទះ និងស្ត្រីម្ចាស់ផ្ទះក៏ត្រូវនគរបាលហៅទៅសួរនាំ និងបានដាក់ការសន្និដ្ឋានជំហានដំបូងលើរឿងស្នេហាត្រីកោណផងដែរ ៕
ចែករំលែកព័តមាននេះ