ខេត្តកំពង់ស្ពឺ ៖ បុរសជាកម្មករធ្វើផ្ទះម្នាក់បានស្លាប់តាមផ្លូវក្រោយពេលដឹកបញ្ជូនយកទៅសង្គ្រោះនៅមន្ទីរពេទ្យបង្អែកស្រុកភ្នំស្រួច ខណៈដែលកំពុងធ្វើការងារហើយកាន់ចំខ្សែភ្លើងរលាត់សំបកបណ្តាលឱ្យឆក់តែម្តង។ ហេតុការណ៍ខ្សែឆក់បុរសម្នាក់ស្លាប់បានកើតឡើង កាលពីល្ងាចថ្ងៃទី២២ ខែសីហា ឆ្នាំ២០២៥ នៅភូមិព្រៃឈើទាល ឃុំព្រៃក្មេង…
ខេត្តកំពង់ស្ពឺ ៖ បុរសជាកម្មករធ្វើផ្ទះម្នាក់បានស្លាប់តាមផ្លូវក្រោយពេលដឹកបញ្ជូនយកទៅសង្គ្រោះនៅមន្ទីរពេទ្យបង្អែកស្រុកភ្នំស្រួច ខណៈដែលកំពុងធ្វើការងារហើយកាន់ចំខ្សែភ្លើងរលាត់សំបកបណ្តាលឱ្យឆក់តែម្តង។
ហេតុការណ៍ខ្សែឆក់បុរសម្នាក់ស្លាប់បានកើតឡើង កាលពីល្ងាចថ្ងៃទី២២ ខែសីហា ឆ្នាំ២០២៥ នៅភូមិព្រៃឈើទាល ឃុំព្រៃក្មេង ស្រុកភ្នំស្រួច ខេត្តកំពង់ស្ពឺ។
នគរបាលស្រុកភ្នំស្រួចបាននិយាយឱ្យដឹងថា នៅមុនពេកើតហេតុ វេលាម៉ោង៧យប់ថ្ងៃទី២២ ខែសីហា ឆ្នាំ២០២៥ លោកមេភូមិព្រៃឈើទាល បានរាយការណ៍មកលោកនាយប៉ុស្ដិ៍នគរបាលរដ្ឋបាលព្រៃក្មេងថាមានប្រជាពលរដ្ឋម្នាក់បានឆក់ខ្សែភ្លើងបណ្ដាលឲ្យស្លាប់។
នគរបាលស្រុកភ្នំស្រួចបានបន្តថា ក្រោយពីទទួលបានពាក្យបណ្តឹង កម្លាំងនគរបាលចុះទៅដល់កន្លែងកើតហេតុធ្វើការស្រាវជ្រាវ នៅវេលាម៉ោង០៣និង៣០នាទីនាទីរសៀលថ្ងៃទី២២ ខែសីហា ឆ្នាំ២០២៥ ឈ្មោះ ទ្រី សុខចំរើន ភេទប្រុស អាយុ៤១ឆ្នាំ រស់នៅភូមិព្រៃឈើទាល ឃុំព្រៃក្មេង ស្រុកភ្នំស្រួច បានទៅធ្វើជាកម្មករសំណង់(ធ្វើផ្ទះ) នៅផ្ទះរបស់ឈ្មោះ វ៉ន រឹម ភេទស្រី អាយុ៤៣ឆ្នាំ រស់នៅក្នុងភូមិក្រៀលបួស ឃុំព្រៃក្មេង ស្រុកភ្នំស្រួច ជនរងគ្រោះខាងលើជាអ្នកបញ្ជាម៉ាស៊ីនក្រឡុកស៊ីម៉ងត៍ បន្ទាប់មកបានប៉ះខ្សែភ្លើង(កន្លែងដាច់រលាត់) បណ្តាលឲ្យឆក់ដួលសន្លប់ ពេលនោះម្ចាស់ផ្ទះនិងក្រុមជាងបានបញ្ជូនទៅដល់មន្ទីរពេទ្យបង្អែកត្រពាំងក្រឡឹង ប៉ុន្តែលោកគ្រូពេទ្យបានពិនិត្យហើយប្រាប់ថាជនរងគ្រោះបានស្លាប់បាត់ទៅហើយ។
នគរបាលស្រុកភ្នំស្រួចបានបញ្ជាក់ថា ករណីឆក់ខ្សែភ្លើងស្លាប់បុរសម្នាក់ខាងលើនេះ សាច់ញាតិក្រុមគ្រួសារបានទទួលស្គាល់ថាឈ្មោះ ទ្រី សុខចំរើន ពិតជាបានស្លាប់ដោយសារឆក់ខ្សែភ្លើងពិតប្រាកដមែន ហើយមិនបានធ្វើការប្តឹងទេ។សពជនរងគ្រោះត្រូវបានប្រគល់ជូនសាច់ញាតិយកទៅធ្វើបុណ្យតាមប្រពៃណី ៕
ចែករំលែកព័តមាននេះ