រាជធានីភ្នំពេញ ៖ ក្រុមប្រតិភូអន្តរជាតិមានទាំងអង្គទូត និងសង្គមស៊ីវិលបានមើលឃើញពីឧបសគ្គផ្សេងៗ បណ្តាលមកពីភាគីថៃការរាំងស្កាត់ប្រជាជនកម្ពុជា មិនឱ្យវិលត្រឡប់ចូលទៅកាន់លំនៅឋានរបស់ពួកគេវិញបាន ។ នេះបើតាមការបញ្ជាក់របស់ឯកឧត្តម ជុំ សុន្ទរី…
រាជធានីភ្នំពេញ ៖ ក្រុមប្រតិភូអន្តរជាតិមានទាំងអង្គទូត និងសង្គមស៊ីវិលបានមើលឃើញពីឧបសគ្គផ្សេងៗ បណ្តាលមកពីភាគីថៃការរាំងស្កាត់ប្រជាជនកម្ពុជា មិនឱ្យវិលត្រឡប់ចូលទៅកាន់លំនៅឋានរបស់ពួកគេវិញបាន ។ នេះបើតាមការបញ្ជាក់របស់ឯកឧត្តម ជុំ សុន្ទរី រដ្ឋលេខាធិការ និងជាអ្នកនាំពាក្យក្រសួងការបរទេស និងសហប្រតិបត្តិការអន្តរជាតិ ។
ថ្លែងក្នុងសន្នីសីទសារព័ត៌មាន នាល្ងាចថ្ងៃទី២៤ សីហា ឆ្នាំ២០២៥ អ្នកនាំពាក្យក្រសួងការបទេស បានថ្លែងថា ដំណើរទស្សនកិច្ចរបស់បណ្តាអង្គទូត តំណាងទីភ្នាក់ងារជំនាញរបស់អង្គការសហប្រជាជាតិ អង្គការអន្តរជាតិ និងអង្គការក្រៅរដ្ឋាភិបាលបរទេស ដែលធ្វើការលើការងារមីនមនុស្សធម៌ សរុបប្រមាណជា៦០រូប ដឹកនាំដោយឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ គណៈប្រតិភូបានទៅទស្សនានៅតាមតំបន់ដែលរងផលប៉ះពាល់នៅក្នុងខេត្តបន្ទាយមានជ័យ ដែលនៅទីនោះហើយគេបានមើលឃើញពីលួសបន្លា ដែលត្រូវបានដាក់ពង្រាយ ការដាក់របាំងរាំងផ្លូវ រួមនឹងឧបសគ្គផ្សេងៗទៀត ក្រោមស្នាដៃរបស់យោធាថៃ ជាការរាំងស្កាត់ប្រជាជនកម្ពុជាមិនឱ្យវិលត្រឡប់ចូលទៅកាន់លំនៅឋានរបស់ពួកគេវិញបាន ។
ឯកឧត្តម ជុំ សុន្ទរី បានឱ្យដឹងដែរថា គណៈប្រតិភូខាងលើក៏បានអញ្ជើញទៅពិនិត្យដល់ទីតាំងនៃការ ទម្លាក់គ្រប់បែកក្នុងខេត្តឧត្តរមានជ័យ ហើយក្នុងនោះក៏មានវត្តប្រាសាទតាមាន់សែនជ័យ រួមនឹងតំបន់ រងគ្រោះដោយគ្រាប់បែកប្រភេទ MK-84 នៅភូមិថ្មដូនផងដែរ ដោយក្នុងឱកាសនេះឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិបានអះអាងជាថ្មីម្តងទៀតអំពីការតាំងចិត្តដ៏ខ្លាំងក្លារបស់រាជរដ្ឋាភិបាលកម្ពុជា នៅក្នុងការធ្វើឱ្យមានភាពធូរស្រាលចំពោះទុក្ខលំបាករបស់បងប្អូនប្រជាពលរដ្ឋរងផលប៉ះពាល់ ខណៈដែលគណៈប្រតិភូបានសម្តែងក្តីរំពឹងថា សន្តិភាពដ៏ពេញលេញ និងស្ថិរភាពនឹងត្រូវបានស្តារមកវិញ នៅក្នុងពេលដ៏ខ្លីខាងមុខ ដើម្បីអនុញ្ញាតឱ្យពលរដ្ឋរងគ្រោះកម្ពុជា បានវិលត្រឡប់នៅកាន់លំនៅឋានរបស់ខ្លួនវិញប្រកបដោយសុវត្ថិភាព ដោយគណៈប្រតិភូបានគូសបញ្ជាក់ថា ការអនុវត្តដោយពេញលេញនូវកិច្ចព្រមព្រៀងឈប់បាញ់នៅតែជាជំហានដ៏សំខាន់មួយដើម្បីឆ្ពោះទៅរកសន្តិភាពដ៏ស្ថិតស្ថេរ និងដំណោះស្រាយដោយសន្តិវិធីចំពោះបញ្ហាព្រំដែន ។
ឯកឧត្តម ជុំ សុន្ទរី បានគូសបញ្ជាក់ថា កម្ពុជាសូមស្វាគមន៍ចំពោះការអំពាវនាវរបស់បណ្តាអង្គទូត និងសូមប្រកាសពីការអនុវត្តយ៉ាងខ្ជាប់ខ្ជួនចំពោះបទឈប់បាញ់ ៕
ចែករំលែកព័តមាននេះ