ពន្ធរបស់លោកត្រាំ អាចជួយកាត់បន្ថយឱនភាពថវិកាអាមេរិកបានដល់៤ទ្រីលានដុល្លារ
សហរដ្ឋអាមេរិក ៖ ការិយាល័យថវិកាសភាអាមេរិក ហៅកាត់ថា CBO កាលពីថ្ងៃទី២២ ខែសីហា ឆ្នាំ២០២៥ បានប្រកាសថា ការដំឡើងពន្ធរបស់លោកប្រធានាធិបតី…
សហរដ្ឋអាមេរិក ៖ ការិយាល័យថវិកាសភាអាមេរិក ហៅកាត់ថា CBO កាលពីថ្ងៃទី២២ ខែសីហា ឆ្នាំ២០២៥ បានប្រកាសថា ការដំឡើងពន្ធរបស់លោកប្រធានាធិបតី ដូណាល់ ត្រាំ (Donald Trump) លើការនាំចូលទំនិញពីប្រទេសជាដៃគូពាណិជ្ជកម្មរបស់សហរដ្ឋអាមេរិក អាចកាត់បន្ថយឱនភាពថវិកាជាតិបានចំនួនរហូតដល់ ៤ទ្រីលានដុល្លារអាមេរិកក្នុងរយៈពេល១ទសវត្សរ៍ក្រោយ។ នេះបើតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
ទីភ្នាក់ងារ CBO ដែលជាក្រុមវិភាគមិនលំអៀងទៅកាន់បក្សណាមួយរបស់សភាអាមេរិក បានឱ្យដឹងថា ប្រសិនបើការដំឡើងពន្ធសកលរបស់លោក ត្រាំ នៅតែបន្ត នោះការកើនឡើងប្រាក់ចំណូលនឹងអាចកាត់បន្ថយឱនភាពបឋមចំនួន ៣,៣ទ្រីលានដុល្លារ និងកាត់បន្ថយការចំណាយលើការប្រាក់សហព័ន្ធចំនួន ០,៧ទ្រីលានដុល្លារ នៅក្នុងរយៈពេល១ទសវត្សរ៍ខាងមុខ។
យ៉ាងណាមិញ អត្រាពន្ធគយកម្រិតខ្ពស់បច្ចុប្បន្នរបស់លោក ត្រាំ អាចនឹងមិនរក្សាថេរបាននោះទេ ដោយសារតែការចរចាជាមួយបណ្តាដៃគូពាណិជ្ជកម្ម និងការប្រឈមផ្នែកច្បាប់អន្តរជាតិ។ ប៉ុន្តែចំណូលពន្ធបន្ថែម អាចជួយទូទាត់ការកើនឡើងនៃឱនភាពថវិកាដែលបង្កឡើងដោយការកាត់ពន្ធ និងការចំណាយដ៏ខ្ពស់របស់គណបក្សសាធារណរដ្ឋ ដែលបានអនុម័តនៅឆ្នាំនេះ។ ទីភ្នាក់ងារ CBO បានប៉ាន់ប្រមាណថា កត្តាទាំងនេះ នឹងពង្រីកឱនភាពថវិកាចំនួន ៣,៤ទ្រីលានដុល្លារក្នុងរយៈពេល១ទសវត្សរ៍ក្រោយ។
ការប៉ាន់ប្រមាណចុងក្រោយរបស់ទីភ្នាក់ងារ CBO បង្ហាញពីការកើនឡើងច្រើនជាងបើធៀបនឹងការពីព្យាករណ៍កាលពីខែមិថុនាកន្លងទៅរបស់ខ្លួន ដោយនៅពេលនោះ CBO បានប្រកាសថា ពន្ធរបស់លោកប្រធានាធិបតី ត្រាំ នឹងអាចកាត់បន្ថយឱនភាពបឋមចំនួន ២,៥ទ្រីលានដុល្លារ និងកាត់បន្ថយការចំណាយលើការប្រាក់សហព័ន្ធចំនួន ៥០០ពាន់លានដុល្លារ។
បើយោងតាមក្រសួងរតនាគារអាមេរិកបានឱ្យដឹងថា បំណុលសហព័ន្ធអាមេរិកបានកើនដល់ចំនួន ៣៧,១៨ទ្រីលានដុល្លារ ដោយបានបន្តកើនឡើងក្រោមការដឹកនាំរបស់គណបក្សសាធារណរដ្ឋ និងប្រជាធិបតេយ្យ ខណៈសភាអាមេរិកបន្តអនុញ្ញាតឱ្យរដ្ឋាភិបាលសហព័ន្ធចំណាយប្រាក់ច្រើនជាងចំណូល៕
ចែករំលែកព័តមាននេះ