ខេត្តបាត់ដំបង ៖ គេមិនឃើញមានសញ្ញាល្អសូម្បីបន្តិច អំពីតំលៃស្រូវនៅលើទីផ្សារក្នុងពេលបច្ចុប្បន្ននេះ នៅឡើយទេ បើទោះជាមន្ត្រីជំនាញកសិកម្ម បានព្យាយាមចុះសម្របសម្រួលស្វែងរកទីផ្សារឲ្យល្អប្រសើរជាងនេះក្ដី ។ ផ្ទុយទៅវិញ តំលៃស្រូវស្រង៉ែ…
ខេត្តបាត់ដំបង ៖ គេមិនឃើញមានសញ្ញាល្អសូម្បីបន្តិច អំពីតំលៃស្រូវនៅលើទីផ្សារក្នុងពេលបច្ចុប្បន្ននេះ នៅឡើយទេ បើទោះជាមន្ត្រីជំនាញកសិកម្ម បានព្យាយាមចុះសម្របសម្រួលស្វែងរកទីផ្សារឲ្យល្អប្រសើរជាងនេះក្ដី ។
ផ្ទុយទៅវិញ តំលៃស្រូវស្រង៉ែ ដែលកសិករកំពុងប្រមូលផលសព្វថ្ងៃ ពួកឈ្មួញទិញក្នុងតំលៃកាន់តែថោកងើបមិនរួច នាំឲ្យកសិករភាគច្រើនស្រែកថ្ងូរពេញស្រែ គ្មានដំណោះស្រាយឡើយ ។
ការធ្លាក់ដាំក្បាលចុះងើបមិនរួចនៃតំលៃស្រូវ «ស្រង៉ែ»ក្នុងពេលនេះ ត្រូវបានមន្ត្រីកសិកម្ម បង្ហាញពីមូលហេតុនៃតំលៃអង្ករដែលកំពុងធ្លាក់ចុះដែរនៅលើទីផ្សារអន្តរជាតិ ។ ជាពិសេស ប្រទេសជិតខាងកម្ពុជាមួយចំនួន ដែលធ្លាប់ទទួលទិញប្រភេទស្រូវ«ស្រង៉ែ»ពីកម្ពុជាត្រូវបានផ្ទាក់ទិញចូល ។ នេះជាហេតុផលខ្លះៗ ដែលនាំឲ្យតំលៃស្រូវធ្លាក់ចុះ ធ្វើឲ្យកសិករដ៏កំសត់នៃអ្នកខេត្តបាត់ដំបងស្រែកថ្ងូរពេញស្រែ ។
កសិករមួយចំនួននៅស្រុកបាណន់បានលើកឡើងថា កាលចាប់ផ្ដើមប្រមូលផលស្រូវ«ស្រង៉ែ»ដំបូងៗ ហាក់លក់បានតំលៃល្អគួរសម ចន្លោះពី៨០០រៀល ទៅ៩០០រៀល ក្នុងមួយគីឡូក្រាម ។ ប៉ុន្តែក្រោយៗមក នៅពេលកសិករចុះច្រូតកាត់កាន់តែច្រើន តំលៃស្រូវកាន់តែធ្លាក់ចុះជាបន្តបន្ទាប់ រហូតដល់បច្ចុប្បន្ននេះ ឈ្មួញកណ្ដាលទិញទម្លាក់ថ្ងៃសល់ត្រឹមតែ៦៥០រៀល ឬ៦៧០រៀលក្នុងមួយគីឡូក្រាម (តាមតំបន់) ។ ដោយឡែក កសិករនៅឯស្រុកសង្កែវិញ ក៏បានស្រែកថ្ងូរអំពីតំលៃស្រូវ«ស្រង៉ែ»ដែលកំពុងដាំក្បាលចុះហៅស្ទើរមិនឮនេះដូចគ្នាដែរ ។
លោក ប៊ុន សៀង កសិករនៅឃុំកំពង់ព្រៀង ដែលកំពុងប្រមូលផលស្រូវ នៅថ្ងៃទី២២ សីហា នេះ បានត្អូញត្អែរអំពីតំលៃស្រូវរបស់គាត់ដោយបានលើកឡើងដូច្នេះថា «ប៉ុន្មានថ្ងៃមុន ស្រូវ«ស្រង៉ែ»ឈ្មួញចុះទិញក្នុងតំលៃចន្លោះពី៦៧ម៉ឺន ទៅ៧០ម៉ឺនរៀល ក្នុង០១តោន តែថ្ងៃនេះឈ្មួញកណ្ដាលទិញក្នុងតំលៃត្រឹមតែ៦៥ម៉ឺនរៀលប៉ុណ្ណោះក្នុង០១តោន កាន់តែថោកទៅៗងើបមិនរួច» ។
ជុំវិញការធ្លាក់ថ្លៃនៃទីផ្សារស្រូវ «ស្រង៉ែ»ក្នុងរដូវច្រូតកាត់នេះ គេឃើញអាជ្ញាធរមូលដ្ឋាន និងមន្ត្រីកសិកម្មបានប្រឹងប្រែងចុះទៅកាន់តំបន់នានា ដើម្បីជួបកសិករពន្យល់ពីមូលហេតុ មិនទៀងទាត់នៃទីផ្សារស្រូវផង និងជួយសម្របសម្រួលស្វែងរកទីផ្សារ ក្រែងបានល្អប្រសើរផង ។
ប៉ុន្តែយ៉ាងណា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង លោក ឈឹម វជិរា ក៏បានទទួលស្គាល់ដែរ អំពីការធ្លាក់ចុះនៃតំលៃស្រូវ «ស្រង៉ែ»នាពេលនេះ។ លោក ឈឹម វជិរា បានថ្លែងប្រាប់ប្រព័ន្ធផ្សព្វផ្សាយក្នុងស្រុកថា តំលៃស្រូវស្រង៉ែពិតជាធ្លាក់ចុះដូចការលើកឡើងរបស់កសិករមែន ហើយមានកត្តាជាច្រើនដែលនាំឲ្យមានការធ្លាក់ចុះនេះ ។
លោកប្រធានមន្ទីរកសិកម្មរូបនេះបានលើកបង្ហាញពីទីផ្សារ «អន្តរជាតិ» ជាចម្បង ។ លោកថា បច្ចុប្បន្ន តំលៃអង្ករលើទីផ្សារអន្តរជាតិក៏បានធ្លាក់ចុះ ។ រីឯប្រទេសជិតខាងកម្ពុជាក៏នាំចូលមិនទៀងទាត់នៅពេលនេះ ។ ដូច្នេះសព្វថ្ងៃនេះ ទីផ្សារស្រូវស្រង៉ែប្រទេសយើង មានតែនាំចេញទៅប្រទេសចិន និងមួយចំនួននាំចេញទៅប្រទេសអឺរ៉ុប ។
ដោយឡែក ប្រទេសម៉ាឡេស៊ី ដែលធ្លាប់ទិញស្រូវស្រង៉ែពីកម្ពុជា ពេលនេះ គេទទួលទិញតែប្រភេទស្រូវក្រអូបតែប៉ុណ្ណោះ ។ បើនិយាយពីតាមបណ្ដារោងម៉ាស៊ីនក្នុងស្រុកយើងវិញ បើតាមលោក ឈឹម វជិរា បានមានប្រសាសន៍ថា នៅតាមរោងម៉ាស៊ីនខ្លះ សល់ស្រូវចាស់ក្នុងស្ដុកច្រើន បញ្ចេញមិនទាន់អស់នៅឡើយ ធ្វើឲ្យម្ចាស់រោងម៉ាស៊ីនខ្វះទុន ទើបមានការរារែកក្នុងការប្រមូលទិញស្រូវចូលរោងម៉ាស៊ីនជាថ្មី ហើយលោកក៏បានចុះធ្វើការសម្របសម្រួលជាមួយម្ចាស់់រោងម៉ាស៊ីននានានៅក្នុងខេត្ត ដើម្បីជួយប្រមូលទិញចូលដែរ ជាការជួយសម្រួលដល់កសិករដែលកំពុងប្រមូលផលស្រូវ ។
បើតាមលោកឈឹម វជិរា ប្រធានមន្ទីរកសិកម្មបានបញ្ជាក់ថា បច្ចុប្បន្ននេះ នៅក្នុងខេត្តបាត់ដំបង កសិករបានធ្វើស្រូវ«ស្រង៉ែ»លើផ្ទៃដីប្រមាណ១៤៨,០០០ហិចតា ។ ប៉ុន្តែកសិករបាននិងកំពុងប្រមូលផលអស់ប្រហែល៧០%ហើយ ។ ប៉ុន្តែយ៉ាងណា ទាំងក្រសួងកសិកម្ម ទាំងមន្ទីរកសិកម្មខេត្ត នៅតែបន្តធ្វើការសម្របសម្រូលជាមួយតាមបណ្ដាម្ចាស់រោងម៉ាស៊ីននានា តាមគ្រប់មធ្យោបាយដើម្បីជួយប្រមូលទិញស្រូវពីកសិករឲ្យអស់ ទោះក្នុងតំលៃថោក ឬថ្លៃក្ដី ៕
ចែករំលែកព័តមាននេះ