ខេត្តកំពត ៖ ប្រជាពលរដ្ឋរាប់រយនាក់នៅស្រុកអង្គរជ័យ និងស្រុកបន្ទាយមាស កាលពីរសៀលថ្ងៃទី១០ កក្កដា កន្លងមក បាននាំគ្នាមកឈរស្វាគមន៍លោកឧកញ៉ាអ៊ុយ ស៊ើង ដែលធ្វើដំណើរតាមរថយន្តមកពីភ្នំពេញ ហើយបានបាចប្រាក់ និងសារុងនៅតាមដងផ្លូវជាតិលេខ៣១ ចាប់ពីផ្លូវបំបែកគូសរហូតមកដល់ស្រុកបន្ទាយ
ខេត្តកំពត ៖ ប្រជាពលរដ្ឋរាប់រយនាក់នៅស្រុកអង្គរជ័យ និងស្រុកបន្ទាយមាស កាលពីរសៀលថ្ងៃទី១០ កក្កដា កន្លងមក បាននាំគ្នាមកឈរស្វាគមន៍លោកឧកញ៉ាអ៊ុយ ស៊ើង ដែលធ្វើដំណើរតាមរថយន្តមកពីភ្នំពេញ ហើយបានបាចប្រាក់ និងសារុងនៅតាមដងផ្លូវជាតិលេខ៣១ ចាប់ពីផ្លូវបំបែកគូសរហូតមកដល់ស្រុកបន្ទាយមាស។ ប្រជាពលរដ្ឋរាប់រយនាក់ដែលដឹងដំណឹងជាមុនគ្រាន់តែដល់ថ្ងៃលោកឧកញ៉ាអ៊ុយ ស៊ើង ចេញពីភ្នំពេញមកស្រុកបន្ទាយមាសពលរដ្ឋទាំងក្មេងទាំងចាស់ឡើងមករង់ចាំហូរហែនៅតាមដងផ្លូវជាតិយ៉ាងច្រើនកុះករ ។
អ្នកភូមិនិយាយថា នេះជាទម្លាប់របស់លោកឧកញ៉ាតែងបាចប្រាក់ឬបាចសារុងតាមដងផ្លូវ ឯប្រជាពលរដ្ឋក៏បានដណ្តើមគ្នារើសខ្លះក៏រត់ដួលខ្លះក៏ជាន់គ្នាលើដងផ្លូវដែលពេញដោយហ្វូងមនុស្ស អ្នកខ្លះក៏ដណ្តើមបាន ខ្លះទៀតក៏ដណ្តើមមិនបាន ចំណែកឯរថយន្តតូច-ធំគ្រប់ប្រភេទបានឈប់មើលសកម្មភាពពលរដ្ឋរត់ដណ្តើមគ្នា ដោយមិនហ៊ានបើកបរទៅមុខទេរហូតទាល់តែអ្នកភូមិចាកចេញពីកណ្តាលទ្រូង ផ្លូវ ។
លោកគ្រូម្នាក់នៅស្រុកបន្ទាយមាសនិយាយថា លោកឧកញ៉ាអ៊ុយ ស៊ើង រស់នៅរាជធានីភ្នំពេញ និងមានស្រុកកំណើតនៅស្រុកបន្ទាយមាស ពេលដែលលោកមកលេងស្រុកម្តងៗឬមានកម្មវិធីផ្សេងៗ លោកឧកញ៉ាតែងតែចែកជាថវិកានិងសារុងជូនដល់ពលរដ្ឋ ។ ដោយឡែកលោកឧកញ៉ាបាចប្រាក់នៅតាមដងផ្លូវនេះគឺលោកអាណិតដល់ប្រជាពលរដ្ឋចាស់ៗ ។ លោកបានធ្វើទានជាច្រើនមកហើយក្នុងការរួមចំណែកក្នុងការកសាងសាលារៀន និងទីអារាម ។ ទោះបីជាបែបណា អ្នករើសបានលុយឬសារុងរីករាយតែអ្នកដណ្តើមមិនបាននឹងគេបានបង្ហាញនូវការខឹងសម្បារបស់ខ្លួនទៅវិញ ។
លោកទូច ចាន់ធី អធិការរងទទួលបន្ទុកសណ្តាប់ធ្នាប់ស្រុកអង្គរជ័យ មានការចាប់អារម្មណ៍ថា លោកឧកញ៉ាអ៊ុយ ស៊ើង ពិតជាបានដាក់ទានឱ្យដល់ប្រជាពលរដ្ឋមែន តែលោកមិនចង់ឱ្យមានការដាក់ទានដោយការឱ្យមនុស្សរត់ប្រសេកប្រសាចពេញថ្នល់រើសដណ្តើមគ្នាបែបនេះ ដែលលោកចាត់ថា មិនមែនជាទានឧត្តមនោះទេ ។
លោកអធិការរងនិយាយថា បើលោកឧកញ៉ាចង់ធ្វើទានគួររកទីកន្លែងសមគួរណាមួយចែកទានដល់ពលរដ្ឋវិញ ទើបប្រសើរជាងការការបាចលុយឱ្យគេរើស ។ មន្ត្រីប៉ូលិសចរាចរស្រុកសំណូមពរដល់លោកឧកញ៉ាអ៊ុយ ស៊ើង សូមកុំបាចលុយតាមផ្លូវទៀត ព្រោះអាចកើតមានគ្រោះថ្នាក់ជាយថាហេតុណាមួយ ហើយខាងចរាចរគឺជាអ្នកទទួលនូវការស្តីបន្ទោសឱ្យពីថ្នាក់លើ ៕
ចែករំលែកព័តមាននេះ