រាជធានីភ្នំពេញ៖ ឯកអគ្គរដ្ឋទូត​ចិនប្រចាំនៅកម្ពុជា បានសម្ដែងគារវកិច្ចដល់កម្ពុជាដែលបានបញ្ជូនកងទ័ពរក្សាសន្តិភាពជិត១ម៉ឺន នាក់ទៅកាន់ប្រទេសផ្សេងៗ។

យោងតាមបណ្ដាញសង្គមផ្លូវការរបស់ឯកឧត្តម វ៉ាង វិនពីន (WANG Wenbin) ឯកអគ្គរដ្ឋទូតសាធារណរដ្ឋប្រជាមានិតចិនប្រចាំនៅកម្ពុជាបានចុះផ្សាយនៅថ្ងៃទី១៨ ខែសីហានេះ បានលើកឡើងថា ឯកឧត្តមសូមសម្ដែងគារវកិច្ចដល់កម្ពុជាដែលបានបញ្ជូនកងទ័ពរក្សាសន្តិភាពសរុប ៩.១៩៩ នាក់ទៅកាន់ប្រទេសផ្សេងៗ។

ជាមួយគ្នានេះ ឯកអគ្គរដ្ឋទូត​ចិន គូសបញ្ជាក់ថា កម្ពុជាជាប់ចំណាត់ថ្នាក់ទី ២៧ ក្នុងចំណោមប្រទេសចំនួន ១១៩ ដែលបានបញ្ជូនកងទ័ពទៅបំពេញបេសកកម្មនៅក្រៅប្រទេស និងជាប់ចំណាត់ថ្នាក់លេខ ៣ ក្នុងចំណោមប្រទេសអាស៊ានផងដែរ៕