លោក ត្រាំ ថា គ្មានផែនការដាក់ទណ្ឌកម្មលើចិនភ្លាមៗ រឿងទិញប្រេងពីរុស្ស៊ីនោះទេ
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសកាលពីថ្ងៃទី១៥ ខែសីហា…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសកាលពីថ្ងៃទី១៥ ខែសីហា ឆ្នាំ២០២៥ ថា លោកមិនចាំបាច់ពិចារណាភ្លាមៗអំពីពន្ធសងសឹកលើប្រទេសដូចជា ប្រទេសចិនសម្រាប់ការទិញប្រេងឆៅពីរុស្ស៊ីនោះទេ ប៉ុន្តែប្រហែលជាត្រូវពិចារណាក្នុងរយៈពេល ២ ឬ ៣ សប្តាហ៍។ នេះបើយោងតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
លោក ត្រាំ បានគំរាមដាក់ទណ្ឌកម្មលើប្រទេសរុស្ស៊ី និងទណ្ឌកម្មបន្ទាប់បន្សំផ្សេងទៀតលើប្រទេសណាមួយដែលទិញប្រេងឆៅរបស់ប្រទេសមួយនេះ ប្រសិនបើគ្មានវិធានការណាមួយត្រូវបានធ្វើឡើង ដើម្បីបញ្ចប់សង្គ្រាមនៅអ៊ុយក្រែននោះទេ។ ដ្បិតប្រទេសចិន និងឥណ្ឌា គឺជាអ្នកទិញប្រេងឆៅកំពូលទាំងពីររបស់រុស្ស៊ី។
លោកត្រាំ បានដាក់ពន្ធ ២៥% បន្ថែមពីលើពន្ធ ២៥% ដែលមានស្រាប់លើទំនិញនាំចូលពីឥណ្ឌា ដោយលើកឡើងពីប្រទេសនេះ នៅតែបន្តទិញប្រេងពីរុស្ស៊ី។ ទោះជាយ៉ាងណាក៏ដោយ ភ្លាមៗលោក ត្រាំ មិនបានចាត់វិធានការស្រដៀងគ្នានេះប្រឆាំងនឹងចិននោះទេ។
នៅពេលត្រូវបានសួរដោយលោក Sean Hannity ពិធីករនៅទូរទស្សន៍ Fox News ថា តើលោកកំពុងពិចារណាសកម្មភាពបែបនេះ ប្រឆាំងនឹងទីក្រុងប៉េកាំងឬយ៉ាងណា បន្ទាប់ពីលោក និងប្រធានាធិបតីរុស្ស៊ី លោក វ្ល៉ាដឺមៀ ពូទីន (Vladimir Putin) មិនអាចបង្កើតបានកិច្ចព្រមព្រៀងដើម្បីដោះស្រាយ ឬ ផ្អាកសង្គ្រាមរបស់រុស្ស៊ីនៅអ៊ុយក្រែន?
លោក ត្រាំ បានថ្លែងបន្ទាប់ពីកិច្ចប្រជុំកំពូលរបស់លោកជាមួយលោកពូទីន នៅរដ្ឋអាឡាស្កាយ៉ាងដូច្នេះថា «មែនហើយដោយសារតែអ្វីដែលបានកើតឡើងនៅថ្ងៃនេះ ខ្ញុំគិតថា ខ្ញុំមិនចាំបាច់គិតអំពីវាឥឡូវនោះទេ។ ខ្ញុំប្រហែលជាត្រូវគិតអំពីវាក្នុងរយៈពេល២សប្តាហ៍ ឬ៣សប្តាហ៍ ឬផ្សេងពីនេះ ប៉ុន្តែយើងមិនចាំបាច់គិតអំពីវានៅពេលនេះទេ។ ខ្ញុំគិតថាអ្នកបានដឹងថា កិច្ចប្រជុំបានដំណើរការយ៉ាងល្អ»។
ប្រភពពី Reuters បានឱ្យដឹងថា សេដ្ឋកិច្ចដែលកំពុងធ្លាក់ចុះរបស់ប្រទេសចិន នឹងរងទុក្ខបន្ថែមទៀត ប្រសិនបើលោក ត្រាំ ធ្វើតាមការសន្យារបស់លោកដើម្បីបង្កើនទណ្ឌកម្ម និងពន្ធគយ។ បច្ចុប្បន្នប្រធានាធិបតីចិន លោក ស៊ី ជិនភីង (Xi Jinping) និងលោក ត្រាំ កំពុងធ្វើការលើកិច្ចព្រមព្រៀងពាណិជ្ជកម្មរួមគ្នា ដែលអាចកាត់បន្ថយភាពតានតឹង និងពន្ធនាំចូលរវាងភាគីទាំងពីរ ដែលជាប្រទេសមានសេដ្ឋកិច្ចធំជាងគេទាំងពីររបស់ពិភពលោក៕
ចែករំលែកព័តមាននេះ