ទីក្រុងឡុង៖ ប្រមុខដឹកនាំអ៊ុយក្រែន លោកហ្សេឡិនស្គី កំពុងបំពេញបេសកកម្មនៅអឺរ៉ុបដើម្បីប្រមូលកម្លាំងគាំទ្រមុនពេលជំនួបកំពូលរវាងលោកត្រាំ និងលោកពូទីននៅថ្ងៃសុក្រ។ មួយថ្ងៃមុនជំនួបកំពូល លោកហ្សេឡិនស្គីបានធ្វើដំណើរទៅទីក្រុងឡុង ប្រទេសអង់គ្លេស បន្ទាប់ពីលោកបញ្ចប់ទស្សនកិច្ចនៅប្រទេសអាល្លឺម៉ង់។ អ៊ុយក្រែន…
ទីក្រុងឡុង៖ ប្រមុខដឹកនាំអ៊ុយក្រែន លោកហ្សេឡិនស្គី កំពុងបំពេញបេសកកម្មនៅអឺរ៉ុបដើម្បីប្រមូលកម្លាំងគាំទ្រមុនពេលជំនួបកំពូលរវាងលោកត្រាំ និងលោកពូទីននៅថ្ងៃសុក្រ។ មួយថ្ងៃមុនជំនួបកំពូល លោកហ្សេឡិនស្គីបានធ្វើដំណើរទៅទីក្រុងឡុង ប្រទេសអង់គ្លេស បន្ទាប់ពីលោកបញ្ចប់ទស្សនកិច្ចនៅប្រទេសអាល្លឺម៉ង់។ អ៊ុយក្រែន និងអឺរ៉ុបកំពុងតែបារម្ភមិនតិចទេថាលោកត្រាំ និងលោកពូទីនអាចនឹងអត្តនោម័តតែ២នាក់ ហើយសម្រេចកាត់ដីទាំងដុំៗទៅឱ្យរុស្ស៊ីដើម្បីចរចាឆាប់ត្រូវរ៉ូវគ្នា។
ប៉ុន្តែលោកត្រាំទើបតែបញ្ជាក់ជំហរថាមិនមែនជួបគ្នាត្រឹមតែម្ដងនេះចប់ទេ។ លោកថ្លែងថានឹងមានកិច្ចជំនួបត្រីភាគីរវាងរូបលោក ជាមួយលោកហ្សេឡិនស្គី និងលោកពូទីន។ ម៉្យាងទៀត លោកសន្យាថាទឹកដីអ៊ុយក្រែនដែលកងទ័ពរុស្ស៊ីកំពុងកាន់កាប់នោះលោកនឹងខិតខំទាមទារមកវិញខ្លះ។ គម្រោងជួបគ្នានៅអាឡាស់ស្កាកើតឡើងចំពេលដែលស្ថានការណ៍សឹកនៅអ៊ុយក្រែនកំពុងឡើងកម្ដៅក្ដៅខ្លាំង។ រុស្ស៊ីបង្កើនការវាយប្រហារដើម្បីបង្ហាញថាខ្លួនមានប្រៀបនៅលើសមរភូមិយោធា។
លោកហ្សេឡិនស្គី និងនាយករដ្ឋមន្ត្រីអង់គ្លេសជួបគ្នាលើកនេះដើម្បីពង្រឹងបន្ថែមពីលើកម្លាំងដែលបានប្រមូលផ្ដុំគ្នាថ្មីៗនេះនៅក្នុងកិច្ចជំនួបតាមប្រព័ន្ធវីឌីអូពីចម្ងាយកាលពីយប់មិញរវាងលោកហ្សេឡិនស្គីជាមួយថ្នាក់ដឹកនាំសហភាពអឺរ៉ុប អង្គការណាតូ និងលោកត្រាំ។ កាលពីយប់មិញ លោកត្រាំព្រមានថារុស្ស៊ីនឹងមានផលវិបាកធ្ងន់ធ្ងរបើសិនលោកពូទីនមិនព្រមបញ្ចប់សង្គ្រាម។ លោកមិនបានបញ្ជាក់ថានឹងមានផលវិបាកអ្វីទេ។ ប៉ុន្តែគេធ្លាប់ឮលោកព្រមានដាក់ទណ្ឌកម្មសេដ្ឋកិច្ច។
រដ្ឋមន្ត្រីការបរទេសអ៊ុយក្រែនបង្ហោះសារនៅលើបណ្ដាញអ៊ិចថាការជួបគ្នាពីចម្ងាយកាលពីម្សិលមិញជាព្រឹត្តិការណ៍សំខាន់ដើម្បីពង្រឹងការរួបរួមកម្លាំងគ្នានៃតំបន់អន្តរអាត្លង់ទិច (អឺរ៉ុប និងអាមេរិក)។ លោកថាយើងត្រូវការសន្តិភាពអមដោយការពង្រឹងកម្លាំងរបស់យើងឱ្យបានខ្លាំងក្លាសម្រាប់ជាបាតគ្រឹះនៃការធ្វើឱ្យមានសន្តិសុខ និងស្ថិរភាពនៅលើសាកលលោក។
ហ្សេឡិនស្គីថ្លែងថាលោកបានប្រាប់លោកត្រាំរួចហើយឱ្យប្រយ័ត្នឱ្យមែនទែន, ប្រយ័ត្នចាញ់ការបោកបញ្ឆោតរបស់លោកពូទីន។ អ្វីដែលលោកពូទីនថាគាត់មានចិត្តចង់បញ្ចប់សង្គ្រាមនោះគ្រាន់តែជាការនិយាយបញ្ឆោតចិត្តអ្នកដទៃតែប៉ុណ្ណោះ។ មេដឹកនាំអ៊ុយក្រែនរូបនេះអះអាងថាលោកត្រាំគាំទ្រការធានាសន្តិសុខជាតិសម្រាប់អ៊ុយក្រែនក្រោយពេលចប់សង្គ្រាម។ ប្រធានាធិបតីបារាំង លោកម៉ាក្រុង ក៏និយាយស្រដៀងគ្នានឹងលោកហ្សេឡិនស្គីផងដែរថាលោកត្រាំពិតជាគាំទ្រដូច្នេះមែន។
ក្រឡេកទៅមើលសមរភូមិយោធានៅអ៊ុយក្រែនវិញម្ដង លោកហ្សេឡិនស្គីអះអាងថាត្រឹមតែប៉ុន្មានថ្ងៃប៉ុណ្ណោះនៅសប្ដាហ៍នេះ កងទ័ពរុស្ស៊ីវាយយកបានដីជម្រៅពី៩-១០គីឡូម៉ែត្រក្បែរទីក្រុងដូប្រូភីលា (Dobropillia) នៃតំបន់ដូញែត។ ប្រភពខ្លះថាអ៊ុយក្រែនបាត់បង់កម្លាំងយុទ្ធជនអស់ច្រើន។ ម៉្លោះហើយសុខចិត្តដកខ្លួនថយជាជាងប្រយុទ្ធយកស្លាប់រស់នាំឱ្យចាញ់ប្រៀបរុស្ស៊ីកាន់តែខ្លាំង។
មជ្ឈដ្ឋានខ្លះបារម្ភថានៅពេលមានប្រៀបនៅលើសមរភូមិយោធាដូច្នេះ រុស្ស៊ីមិនប្រាកដជាធ្វើតាមការទាមទាររបស់អ៊ុយក្រែន និងអឺរ៉ុបទេ។ មានន័យថាអ្វីដែលរុស្ស៊ីចង់សម្រេចគោលដៅនៅក្នុងសង្គ្រាមនេះគឺត្រូវតែសម្រេចឱ្យបាន។ នោះគឺអ៊ុយក្រែនត្រូវតែជាប្រទេសអព្យាក្រិត មិនចូលបក្សសម្ព័ន្ធ (ជាពិសេស មិនចូលណាតូ), អ៊ុយក្រែនមិនត្រូវដឹកនាំដោយរបបណាហ្ស៊ី, អ៊ុយក្រែនត្រូវកាត់ទឹកដីខ្លះទោឱ្យរុស្ស៊ី។ល។ និង។ល។ នេះបើយោងតាមប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ