លោក ត្រាំ ព្រមា.នរុស្ស៊ីអំពីផលវិបាកធ្ងន់ធ្ងរ បើលោកពូទីន មិនព្រមបញ្ឈប់សង្គ្រាមនៅអ៊ុយក្រែន
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសកាលពីថ្ងៃទី១៣ ខែសីហា…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសកាលពីថ្ងៃទី១៣ ខែសីហា ឆ្នាំ២០២៥ ថា ប្រទេសរុស្ស៊ីនឹងប្រឈមនឹងផលវិបាកធ្ងន់ធ្ងរ ប្រសិនបើលោកប្រធានាធិបតី វ្លាដឺមៀរ ពូទីន (Vladimir Putin) មិនព្រមបញ្ឈប់សង្គ្រាមនៅអ៊ុយក្រែន បន្ទាប់ពីកិច្ចប្រជុំកំពូលរវាងមេដឹកនាំកំពូលទាំងពីរនៅថ្ងៃទី១៥ ខែសីហា ខាងមុខនេះ ដែលរៀបចំឡើងនៅអាឡាស្កា (Alaska) សហរដ្ឋអាមេរិក ទោះបីជាលោកមិនបានបញ្ជាក់ថា ផលវិបាកទាំងនោះជាអ្វីក៏ដោយ។ នេះបើយោងតាមប្រភពពីសារព័ត៌មាន CNN, BBC និង AP បានចេញផ្សាយ។
នៅពេលត្រូវបានសួរដោយអ្នកសារព័ត៌មានថា តើផលវិបាកធ្ងន់ធ្ងរនោះ នឹងកើតមានក្នុងទម្រង់នៃការដាក់ទណ្ឌកម្មពន្ធគយ ឬយ៉ាងណា? ភ្លាមៗ លោក ត្រាំ បាននិយាយដូច្នេះថា «ខ្ញុំមិនចាំបាច់និយាយអំពីវាទេ ព្រោះវានឹងមានផលវិបាកធ្ងន់ធ្ងរ»។ ការអត្ថាធិប្បាយរបស់លោក ត្រាំ បានកើតឡើងបន្ទាប់ពីលោកបានចូលរួមកិច្ចប្រជុំតាមប្រព័ន្ធវីដេអូខល ជាមួយបណ្តាមេដឹកនាំអឺរ៉ុប រួមទាំងប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី (Volodymyr Zelenskyy) ដោយបានប្រាប់កិច្ចប្រជុំនោះថា លោក ពូទីន កំពុងតែនិយាយបំផ្លើសអំពីការស្វែងរកសន្តិភាព។ ជាលទ្ធផលកិច្ចប្រជុំ អធិការបតីអាល្លឺម៉ង់ លោក Friedrich Merz បានថ្លែងថា មេដឹកនាំអឺរ៉ុបមានកិច្ចពិភាក្សាប្រកបដោយការស្ថាបនា និងរលូនល្អជាមួយលោក ត្រាំ។
លោក ត្រាំ ក៏បានថ្លែងផងដែរថា នឹងមានឱកាសដ៏ល្អសម្រាប់កិច្ចប្រជុំលើកទី ២ ជាមួយប្រធានាធិបតីរុស្ស៊ី រួមនឹងប្រធានាធិបតីអ៊ុយក្រែនផងដែរ។ ទន្ទឹមជាមួយគ្នានោះ អធិការបតីអាល្លឺម៉ង់ក៏បាននិយាយថា អាទិភាពជាចម្បងគឺការធានាបទឈប់បាញ់ ហើយបន្ថែមទៀតថា សម្ព័ន្ធមិត្តរបស់អ៊ុយក្រែនគួរតែបង្កើនសម្ពាធលើរុស្ស៊ី ប្រសិនបើលោក ពូទីន មិនយល់ព្រមបញ្ឈប់សង្គ្រាម។ ចំណែកនាយករដ្ឋមន្ត្រីអង់គ្លេស លោក Keir Starmer បានសន្យាបន្តគាំទ្រអ៊ុយក្រែន និងអរគុណលោក ត្រាំ ដែលបាននាំលោកពូទីន មកកាន់តុចរចា។
បើយោងតាមការចេញផ្សាយពី ABC News បានឱ្យដឹងថា ការវាយប្រហារចម្ងាយឆ្ងាយដោយរុស្ស៊ី និងអ៊ុយក្រែនបានបន្តពេញមួយយប់ឈានចូលដល់ថ្ងៃទី១៣ ខែសីហា។ កងទ័ពអាកាសអ៊ុយក្រែនបានអះអាងថា រុស្ស៊ីបានបញ្ជូនដ្រូនវាយប្រហារចំនួន ៤៩គ្រឿង និងមីស៊ីលបលលីសស្ទីក (Ballistic) ផលិតដោយកូរ៉េខាងជើងចំនួន២គ្រាប់ ដោយនៅក្នុងនោះ ដ្រូន ៣២គ្រឿង និងមីស៊ីលបលលីសស្ទីកទាំងពីរគ្រាប់ត្រូវបានបាញ់ទម្លាក់។ ទន្ទឹមនឹងនោះ ក្រសួងការពារជាតិរុស្ស៊ីក៏បានប្រកាសថា កងកម្លាំងរបស់ខ្លួនបានបាញ់ទម្លាក់ដ្រូនអ៊ុយក្រែនចំនួន៦៣គ្រឿងផងដែរ៕
ចែករំលែកព័តមាននេះ