បរទេស ៖ សហរដ្ឋអាមេរិក និងប្រទេសចិនបានព្រមព្រៀងគ្នាបន្តពន្យារពេលការអនុវត្តពន្ធកម្រិតខ្ពស់លើគ្នារហូតដល់ថ្ងៃទី១០ ខែវិច្ឆិកា ឆ្នាំ២០២៥ ដោយនៅក្នុងសេចក្តីថ្លែងការណ៍រួមបានបញ្ជាក់ថា ប្រទេសដែលមានសេដ្ឋកិច្ចធំជាងគេទាំង ២ របស់ពិភពលោកបានប្រកាសថា…
បរទេស ៖ សហរដ្ឋអាមេរិក និងប្រទេសចិនបានព្រមព្រៀងគ្នាបន្តពន្យារពេលការអនុវត្តពន្ធកម្រិតខ្ពស់លើគ្នារហូតដល់ថ្ងៃទី១០ ខែវិច្ឆិកា ឆ្នាំ២០២៥ ដោយនៅក្នុងសេចក្តីថ្លែងការណ៍រួមបានបញ្ជាក់ថា ប្រទេសដែលមានសេដ្ឋកិច្ចធំជាងគេទាំង ២ របស់ពិភពលោកបានប្រកាសថា អត្រាពន្ធ៣ខ្ទង់លើទំនិញរបស់ប្រទេសទាំងពីរ ដែលបានប្រកាសកាលពីដើមឆ្នាំនេះ នឹងត្រូវផ្អាកសម្រាប់រយៈពេល៩០ថ្ងៃទៀត។ នេះបើតាមប្រភព BBC ចេញផ្សាយនៅថ្ងៃទី១២ ខែសីហា ឆ្នាំ២០២៥។
ការពិភាក្សារវាងប្រទេសមហាអំណាចទាំងពីរ កាលពីខែមុនបានបញ្ចប់ដោយភាគីទាំងពីរបានហៅការពិភាក្សានោះថា «ការពិភាក្សាស្ថាបនា»។ អ្នកចរចាកំពូលរបស់ចិនបានថ្លែងនៅពេលនោះថា ប្រទេសទាំងពីរនឹងជំរុញរក្សាការពន្យារពេលអនុវត្តពន្ធកម្រិតខ្ពស់លើគ្នា ខណៈដែលមន្ត្រីអាមេរិកបាននិយាយថា ពួកគេកំពុងរង់ចាំការចុះហត្ថលេខាចុងក្រោយពីប្រធានាធិបតីអាមេរិក លោក ដូណាល់ ត្រាំ (Donald Trump)។
យ៉ាងណាមិញ កាលពីថ្ងៃទី១១ ខែសីហា លោក ត្រាំ ក៏បានចុះហត្ថលេខាលើបទបញ្ជាប្រតិបត្តិមួយដើម្បីពន្យារការអនុវត្តពន្ធកម្រិតខ្ពស់ជាមួយចិន ដែលមានន័យថា អាមេរិកនឹងពន្យារពេលបន្ថែមទៀតលើការអនុវត្តពន្ធ ១៤៥% លើទំនិញចិន ហើយចិនក៏នឹងបន្តផ្អាកការអនុវត្តពន្ធរបស់ខ្លួននៃ ១២៥% លើទំនិញអាមេរិក។ នៅក្រោមកិច្ចព្រមព្រៀងដ៏សំខាន់នេះ អាមេរិកនឹងរក្សាពន្ធរបស់ខ្លួនលើការនាំចូលពីចិនត្រឹមអត្រា ៣០% រីឯចិននឹងរក្សាពន្ធ ១០% លើទំនិញនាំចូលពីអាមេរិក។
សេតវិមានបានគូសបញ្ជាក់ថា ការពន្យារពេលថ្មីនេះ នឹងផ្តល់ពេលបន្ថែមទៀតសម្រាប់ភាគីទាំងពីរការចរចាអំពីការដោះស្រាយអតុល្យភាពពាណិជ្ជកម្ម និងការអនុវត្តពាណិជ្ជកម្មមិនយុត្តិធម៌។ ការស្វែងរកដំណោះស្រាយនេះ បានលើកឡើងពីឱនភាពពាណិជ្ជកម្មជិត ៣០០ពាន់លានដុល្លារជាមួយប្រទេសចិនកាលពីឆ្នាំមុន ដែលជាចំនួនដ៏ច្រើនបំផុតក្នុងចំណោមដៃគូពាណិជ្ជកម្មរបស់ខ្លួន។ តាមសេចក្តីថ្លែងការណ៍បានឱ្យដឹងទៀតថា កិច្ចពិភាក្សានេះ ក៏នឹងមានបំណងបង្កើនលទ្ធភាពទទួលបានសម្រាប់ក្រុមហ៊ុននាំចេញរបស់អាមេរិកទៅកាន់ចិន និងដោះស្រាយបញ្ហាសន្តិសុខជាតិ ព្រមនឹងសេដ្ឋកិច្ចផងដែរ។
នៅក្នុងសេចក្តីថ្លែងការណ៍ ចិនក៏បានអំពាវនាវឱ្យអាមេរិកដកការរឹតបន្តឹងពាណិជ្ជកម្មដែលខ្លួនហៅថា មិនសមហេតុផល ហើយធ្វើការរួមគ្នាដើម្បីផ្តល់ផលប្រយោជន៍ដល់ក្រុមហ៊ុនទាំងសងខាង និងរក្សាស្ថិរភាពនៃផលិតកម្មបន្ទះឈីប និងផលិតផលពាក់កណ្តាលសម្រេច (Semiconductor) របស់ពិភពលោក។ ការអនុវត្តពន្ធកម្រិតខ្ពស់នឹងប្រថុយនឹងភាពចលាចលពាណិជ្ជកម្ម និងភាពមិនច្បាស់លាស់បន្ថែមទៀត ចំពេលមានការព្រួយបារម្ភអំពីឥទ្ធិពលនៃពន្ធលើតម្លៃ និងសេដ្ឋកិច្ច។
បើទោះបីជាមានការពន្យារពេលអនុវត្តពន្ធកម្រិតខ្ពស់ក៏ដោយ ក៏លំហូរពាណិជ្ជកម្មរវាងប្រទេសទាំងពីរត្រូវបានប៉ះពាល់នៅឆ្នាំនេះ ដោយតួលេខរបស់រដ្ឋាភិបាលអាមេរិកបង្ហាញថា ការនាំចូលទំនិញពីប្រទេសចិនក្នុងខែមិថុនា បានកាត់បន្ថយជិតពាក់កណ្តាលធៀបនឹងរយៈពេលដូចគ្នា កាលពីឆ្នាំមុន។ ក្នុងរយៈពេល៦ខែដំបូងនៃឆ្នាំនេះ អាមេរិកបាននាំចូលទំនិញចិនមានតម្លៃ ១៦៥ពាន់លានដុល្លារ ពោលធ្លាក់ចុះប្រហែល ១៥% ធៀបនឹងពេលដូចគ្នា កាលពីឆ្នាំមុន។ ការនាំចេញរបស់អាមេរិកទៅកាន់ប្រទេសចិនក៏បានធ្លាក់ចុះប្រហែល ២០% សម្រាប់រយៈពេលដូចគ្នា៕ ប្រភព ៖ BBC
ចែករំលែកព័តមាននេះ