រាជធានីភ្នំពេញ ៖ នារីម្នាក់ បានបោកផ្ទប់នឹងរថយន្តស្លាប់នៅនឹងកន្លែង និងម្នាក់ទៀត បានផ្លោងរំលងរថយន្តរងរបួសធ្ងន់ ត្រូវបានបញ្ជូនទៅសង្គ្រោះ ខណៈពេលដែលជិះម៉ូតូមួយគ្រឿង ក្នុងល្បឿនលឿន ទៅបុករថយន្ត…
រាជធានីភ្នំពេញ ៖ នារីម្នាក់ បានបោកផ្ទប់នឹងរថយន្តស្លាប់នៅនឹងកន្លែង និងម្នាក់ទៀត បានផ្លោងរំលងរថយន្ត
រងរបួសធ្ងន់ ត្រូវបានបញ្ជូនទៅសង្គ្រោះ ខណៈពេលដែលជិះម៉ូតូមួយគ្រឿង ក្នុងល្បឿនលឿន ទៅបុករថយន្ត ម៉ាក់ហាយឡេនឌ័រ មួយគ្រឿង ដែលកំពុងបត់ឆ្លងផ្លូវពេញទំហឹង ។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះ បានកើតឡើងកាលពីវេលាម៉ោង០៦និង៤៤នាទីព្រឹកថ្ងៃទី១០ ខែសីហា ឆ្នាំ២០២៥ នៅចំណុចផ្លូវលេខ១០០៣ ក្រុមទី៤ ភូមិ៤ សង្កាត់ច្រាំងចំរេះទី១ ខណ្ឌឬស្សីកែវ រាធានីភ្នំពេញ ។
នារីរងគ្រោះ ដែលស្លាប់បាត់បង់ជីវិតឈ្មោះ ថ្លាង ឈុននៀវ ភេទស្រី អាយុ២០ឆ្នាំ ជនជាតិខ្មែរ មុខរបរបុគ្គលិកហាងលក់គ្រឿងសមុទ្រ មានទីលំនៅភូមិជរ ឃុំសណ្តាន់ ស្រុកសណ្តាន់ ខេត្តកំពង់ធំ (បានស្លា.ប់នៅកន្លែងកើតហេតុ)។ ចំណែកអ្នករួមដំណើរ រងរបួសមិនស្គាល់អត្តសញ្ញាណ ត្រូវបានបញ្ជូនទៅសម្រាកព្យបាលនៅមន្ទីរពេទ្យ មិត្តភាពកម្ពុជា-ចិន ព្រះកុសមៈ ហៅមន្ទីរពេទ្យលោកសង្ឃ ។ រីឯអ្នកបើកបររថយន្ត បានរត់គេចខ្លួនបាត់ ។
តាមនគរបាលមូលដ្ឋាន បានឲ្យដឹងថា គ្រោះថ្នាក់ចរាចរណ៍នេះ បានកើតឡើងរវាងម៉ូតូម៉ាកស៊ុយស៊ូគីនិច ពណ៌សលាយខៀវ ពាក់ផ្លាកលេខ ភ្នំពេញ 1FG-5224 និងរថយន្តម៉ាកហាយឡែនឌ័រ ពាក់ស្លាកលេខភ្នំពេញ 2S-7621 ។
តាមសាក្សី បានឲ្យដឹងថា នៅមុនពេលកើតហេតុ គេឃើញនារីរងគ្រោះពីរនាក់ បានជិះម៉ូតូមួយគ្រឿងខាងលើធ្វើដំណើរក្នុងទិសដៅពីត្បូងទៅជើង។ លុះមកដល់ចំណុចកើតហេតុ បានបុកជាមួយរថយន្តម៉ាក់ highlander មួយគ្រឿង ដែលបើកបរដោយនារីម្នាក់ បើកចេញពីបុរីវិមានភ្នំពេញ ផ្លូវលេខ៣៦៦ ក្នុងទិសដៅពីកើតទៅលិចឆ្លងផ្លូវ ។
តាមសាក្សីបានឲ្យដឹងទៀតថា នៅក្នុងគ្រោះថ្នាក់នោះ បណ្ដាឲ្យស្ត្រីជាអ្នកបើកបរម៉ូតូ បានស្លាប់នៅនឹងកន្លែងកើតហេតុ។ ចំណែកនារីម្នាក់ ដែលជិះក្រោយ បានផ្លោងលើរថយន្ត ហើយរងរបួសធ្ងន់។ បន្ទាប់ពីកើតមានគ្រោះថ្នាក់ នគរបាលមូលដ្ឋានក៏បានចុះទៅកន្លែងកើតហេតុ សម្រួលចរាចរណ៍ ហើយបានទាក់ទងទៅនគរបាលជំនាញចរាចរណ៍ ចុះទៅវាស់វែង រួចនាំយករថយន្ត និងម៉ូតូបញ្ជូនទៅកាន់ការិយាល័យចរាចរណ៍ផ្លូវគោក ដើម្បីចាត់ការតាមច្បាប់។ ចំណែកស.ព ប្រគល់ទៅឲ្យក្រុមគ្រួសារនាំយកទៅធ្វើបុណ្យតាមប្រពៃណី៕
ចែករំលែកព័តមាននេះ