សង្គ្រាមអ៊ុយក្រែន ៖ ខណៈប្រធានាធិបតីអាមេរិក លោកដូណាល់ត្រាំ និងសមភាគីរុស្ស៊ីលោកវ្ល៉ាឌីមៀរពូទីន គ្រោងជួបគ្នានាថ្ងៃទី១៥ សីហា នៅអាឡាស្កា ដើម្បីពិភាក្សាពីដំណោះស្រាយបញ្ចប់សង្គ្រាមតំបន់អ៊ុយក្រែនជាច្រើនរងការវាយប្រហារដោយដ្រូនរុស្ស៊ី កាលពីយប់ថ្ងៃទី១០…
សង្គ្រាមអ៊ុយក្រែន ៖ ខណៈប្រធានាធិបតីអាមេរិក លោកដូណាល់ត្រាំ និងសមភាគីរុស្ស៊ីលោកវ្ល៉ាឌីមៀរពូទីន គ្រោងជួបគ្នានាថ្ងៃទី១៥ សីហា នៅអាឡាស្កា ដើម្បីពិភាក្សាពីដំណោះស្រាយបញ្ចប់សង្គ្រាមតំបន់អ៊ុយក្រែនជាច្រើនរងការវាយប្រហារដោយដ្រូនរុស្ស៊ី កាលពីយប់ថ្ងៃទី១០ មក១១សីហា។ មនុស្សយ៉ាងតិចម្នាក់ស្លាប់ក្នុងតំបន់ដូណេតស្ក៍ បន្ទាប់ពីការវាយប្រហារ២លើករបស់រុស្ស៊ី លើតំបន់ក្រុងឌ្រូសគីវកា កាលពីព្រឹកថ្ងៃទី១០ សីហា ចំណែកមនុស្ស៥នាក់ទៀតរងរបួស។
ប៉ូលិសក្រុងនោះគូសបញ្ជាក់ថា ក្នុងការវាយប្រហារទាំងនេះ ក្រៅពីអ្នកស្លាប់និងអ្នករបួស ផ្ទះ៥ខ្នងនិងរថយន្ត២គ្រឿងរងការខូចខាត។ ចំណែកមនុស្ស២នាក់ស្លាប់ មកពីការវាយប្រហារ ដោយដ្រូន
រុស្ស៊ីលើសង្កាត់ទាំងឡាយនៃតំបន់ឃ័រសុនកាលពីថ្ងៃទី១០សីហា ។ ការវាយប្រហារមួយទៀតត្រូវចំអគាររដ្ឋបាលយោធាមួយនៅក្រុងស៊ូមីអ៊ុយក្រែន ដោយពុំបណ្ដាលឲ្យមានជនរងគ្រោះឡើយ។ នៅក្រុងឌីនីប្រូប៉េត្រូវស្ក៍ការរត់របស់រថភ្លើងច្រើនខ្សែត្រូវលុបចោលកាលពីថ្ងៃទី១០សីហា បន្ទាប់ពីកងទ័ពរុស្ស៊ីវាយប្រហារលើស្ថានីយរថភ្លើងមួយកន្លែង ។
ចំណែកកងទ័ពអាកាសអ៊ុយក្រែនថ្លែងថា រុស្ស៊ីបានប្រើដ្រូនដល់១០០គ្រឿងនាពេលយប់ក្នុងនោះ៧០គ្រឿងត្រូវបាញ់ទម្លាក់ដោយកងការពារអាកាស។ រួចនាថ្ងៃទី៩សីហាមនុស្ស២នាក់បានត្រូវស្លាប់ និង១០នាក់ទៀតរងរបួស ពេលដ្រូនរុស្ស៊ីមួយវាយត្រូវចំរថយន្តបឺសធុនតូចមួយគ្រឿងនាជាយក្រុងឃ័រសុនអ៊ុយក្រែន។
មនុស្ស២នាក់ទៀតក៏ត្រូវស្លាប់ដែរ បន្ទាប់ពីដ្រូនរុស្ស៊ីមួយគ្រឿងវាយប្ត្រហារចំរថយន្តរបស់ពួកគេ ក្នុងតំបន់ហ្សាប៉ូរីហ្ស៊ីយ៉ា ។ ម្យ៉ាងវិញទៀត សេនាធិការដ្ឋានកងទ័ពអ៊ុយក្រែនគូសបញ្ជាក់ថា កងទ័ពអ៊ុយក្រែន វាយដណ្ដើមយកបានវិញភូមិបេសហ្សាលីវកាក្នុងតំបន់ស៊ូមីជាប់ព្រំដែនរុស្ស៊ី ។
កងទ័ពរុស្ស៊ីបន្តវាយរុលចូលកាន់តែជ្រៅក្នុងតំបន់ស៊ូមីអ៊ុយក្រែន ជាង២ខែមកហើយបន្ទាប់ពីបើកខ្សែរណសិរ្សថ្មីនៅភាគឦសានប្រទេស ។ នៅតំបន់សារ៉ាតូវរុស្ស៊ី ដ្រូនអ៊ុយក្រែនបានសម្លាប់មនុស្សម្នាក់ ពេលវាយប្រហារទីតាំងឧស្សាហកម្មរុស្ស៊ីមួយកន្លែង ដែលក៏បង្កឲ្យមានការខូចខាតដែរដល់ផ្ទះជាច្រើនក្នុងតំបន់នោះ។ បណ្ដាញតេឡេក្រាមអ៊ុយក្រែនមួយរាយការណ៍ថា បណ្ដាដ្រូនបអ៊ុយក្រែនបានវាយប្រហាររោងចក្រចម្រាញ់ប្រេងកាតរុស្ស៊ីមួយកន្លែង ស្ថិតនៅស្រុកហ្សាវ៉ូតស្គីភាគនិរតីតំបន់សារ៉ាតូវ។
អភិបាលតំបន់នោះអះអាងតាមតេឡេក្រាមថា ប្រជាជនត្រូវបានជម្លៀសចេញពីអគារ៣រងការខូចខាតដោយបំណែកដ្រូន។ បណ្ដាសារព័ត៌មានក្នុងស្រុករុស្ស៊ីរាយការណ៍ថា ការវាយប្រហាររបស់បណ្ដាដ្រូនអ៊ុយក្រែន នាំឲ្យមានភ្លើងឆេះនិងការផ្ទុះក្នុងរោងចក្រចម្រាញ់ប្រេងកាតនៅសារ៉ាតូវនេះ ៕
ចែករំលែកព័តមាននេះ