ខេត្តបាត់ដំបង៖ លោកចោរគីឡូធ្ងន់ម្នាក់ ក្នុងចំណោមបក្សពួក០២នាក់ ដែលស្ទាក់ប្លន់យកម៉ូតូនារីម្នាក់កណ្ដាលយប់ កាលពីប៉ុន្មានថ្ងៃមុន ត្រូវបានកម្លាំងអធិការក្រុងបាត់ដំបង ធ្វើការស្រាវជ្រាវតាមចាប់ខ្លួនបាន និង បានកសាងសំណុំរឿងបញ្ជូនទៅកាន់សាលាដំបូងហើយ នៅព្រឹកថ្ងៃទី…
ខេត្តបាត់ដំបង៖ លោកចោរគីឡូធ្ងន់ម្នាក់ ក្នុងចំណោមបក្សពួក០២នាក់ ដែលស្ទាក់ប្លន់យកម៉ូតូនារីម្នាក់កណ្ដាលយប់ កាលពីប៉ុន្មានថ្ងៃមុន ត្រូវបានកម្លាំងអធិការក្រុងបាត់ដំបង ធ្វើការស្រាវជ្រាវតាមចាប់ខ្លួនបាន និង បានកសាងសំណុំរឿងបញ្ជូនទៅកាន់សាលាដំបូងហើយ នៅព្រឹកថ្ងៃទី ១០ សីហា។ នេះបើតាមមន្ត្រីអធិការក្រុងបាត់ដំបង បាននិយាយ។
តាមរយៈរបាយការណ៏ អធិការក្រុងបាត់ដំបង លោក ពេជ្រ សារ៉ែន បាននិយាយថា ជនដៃដល់ម្នាក់ដែលត្រូវឃាត់ខ្លួនបញ្ជូនទៅតុលាការនេះ ឈ្មោះ រិទ្ធ បូរស្មី ប្រុសអាយុ២៧ឆ្នាំ ស្នាក់នៅបន្ទប់ជួល នៅភូមិកាប់គោថ្មី សង្កាត់អូរចា ក្រុងបាត់ដំបង។ ជាមួយនឹងការឃាត់ខ្លួនបាន មន្ត្រីជំនាញក៏បានដកហូតថ្នាំញៀនបាន០១ថង់ផងដែរ បន្ថែមលើបទល្មើស«ប្លន់ម៉ូតូ» តែបក្សពួកម្នាក់ទៀតកំពុងគេចខ្លួន។
លោកអធិការ បានបញ្ជាក់ថា ជនសង្ស័យនិងបក្សពួកដែលគេចខ្លួន ត្រូវកម្លាំងជំនាញរបស់លោក ធ្វើការស្រាវជ្រាវរហូតឃាត់ខ្លួនបាន កាលពីយប់ថ្ងៃទី ០៨ សីហា បន្ទាប់ពីមន្ត្រីជំនាញទទូលបានពាក្យបណ្ដឹងពីជនរងគ្រោះឈ្មោះ សល់ សុខគង់ ស្រីអាយុ២៨ឆ្នាំ នៅភូមិស្លាកែត សង្កាត់ស្លាកែត ក្រុងបាត់ដំបង។
របាយការណ៏ព្រឹត្តិហេតុ បានឲ្យដឹងថា ឈ្មោះ រិទ្ធ បូរស្មី និង បក្សពួកម្នាក់ទៀតដែលកំពុងគេចខ្លួន បានធ្វើសកម្មភាពជិះម៉ូតូតាមស្ទាក់វាយ«ប្លន់ម៉ូតូ» ពីនារីរងគ្រោះខាងលើ កាលពីវេលារំលងអាធ្រាត្រឈានចូលថ្ងៃទី ០៦ សីហា ត្រង់ចំណុចភូមិជ្រៃកោង សង្កាត់ស្លាកែត ក្រុងបាត់ដំបង ខណៈដែលនាងកំពុងជិះម៉ូតូតាមដងផ្លូវ។ កាមេរ៉ាសុវត្ថិភាព ដែលគេបំពាក់ខាងមុខផ្ទះ បានថតជាប់ពីសកម្មភាពក្រុមចោរប្លន់ម្នាក់ស្គម ម្នាក់ធាត់ នោះយ៉ាងច្បាស់ក្រឡែត ហើយថែមទាំងមានអ្នកស្គាល់ភិនភាគលោកចោរម្នាក់យ៉ាងច្បាស់ទៀតផង។ ជាពិសេស«ចោរមាឌកាម៉ាប់ ដែលត្រូវសមត្ថកិច្ចចាប់បានខាងលើនេះ»។
នៅក្នុងឃ្លិបវីដេអូ គេឃើញនារីរងគ្រោះបានជិះម៉ូតូម្នាក់ឯងកណ្ដាលយប់សំដៅទៅផ្ទះ បន្ទាប់មកគេក៏ឃើញបុរស០២នាក់ ជិះម៉ូតូប្រដេញពីក្រោយ លុះដល់ចំណូចកើតហេតុ ជននោះក៏ជិះបត់ខាងមុខម៉ូតូជនរងគ្រគោះ ហើយកៀរឲ្យឈប់។
ជនម្នាក់បានចុះមកទាញយកម៉ូតូពីនាង ថែមទាំងវាយនាងថែមទៀត ជាមួយនឹងការ«ប្លន់យកម៉ូតូ លុយ២០ម៉ឺនរៀល និង ទូរស័ព្ទ០១គ្រឿង» រួចជិះត្រឡប់ក្រោយ ដោយសុវត្តិភាព។
បើតាមសមត្ថកិច្ច បានប្រាប់ថា ជនដៃដល់ទាំង០២នាក់ ជាមុខសញ្ញាប្រព្រឹត្តអំពើចោរកម្មផង និង ជាមុខសញ្ញាប្រព្រឹត្តបទល្មើសគ្រឿងញៀន ដ៏សកម្មផង។ ពេលនេះត្រូវចាប់ខ្លួនបានម្នាក់ឈ្មោះ រិទ្ធ បូរស្មី នៅម្នាក់ទៀតកំពុងគេចខ្លួន។
ជាមួយនឹងការចាប់ខ្លួនបាន លោកចោរគីឡូធ្ងន់ឈ្មោះ រិទ្ធ បូរស្មី បានសារភាពថា ខ្លួននិងបក្សពួកម្នាក់ទៀត ពិតជាបានធ្វើសកម្មភាព«ប្លន់យកម៉ូតូនារីរងគ្រោះមែន»។ ជននេះបានបញ្ជាក់ថា ម៉ូតូដែលប្លន់បាននោះ ត្រូវបានដៃគូរខ្លួនយកទៅលក់ហើយ តែខ្លួនមិនដឹងគេនៅឯណាទេ។
នៅក្នុងរបាយការណ៏អធិការក្រុងបាត់ដំបង លោក ពេជ្រ សារ៉ែន បានប្រាប់ថា ម៉ូតូរបស់ជនរងគ្រោះ ដែលត្រូវពួកចោរប្លន់យកទៅនោះម៉ាកហុងដាស្កុបពី ស៊េរីឆ្នាំ២០២១ ពណ៏ខ្មៅ ពាក់ស្លាកលេខ បាត់ដំបង 1AQ-2538។ ប៉ុន្តែវត្ថុតាងដែលក្រុមចោរ ប្លន់បានពីជនរងគ្រោះនោះ រកមិនឃើញទេ តែមន្ត្រីជំនាញកំពុងធ្វើការស្រាវជ្រាវស្វែងរក និង កំពុងតាមចាប់ខ្លួនបក្សពួកម្នាក់ទៀត។ យ៉ាងណាក្ដី ពេលនេះ មន្ត្រីការិយាល័យជំនាញ បានបញ្ជូនខ្លួនលោកចោរគីឡូធ្ងន់ម្នាក់នោះទៅកាន់សាលាដំបូងខេត្តហើយជាមួយនឹងថ្នាំញៀន០១ថង់៕
ចែករំលែកព័តមាននេះ