សហរដ្ឋអាមេរិក ៖ សហរដ្ឋអាមេរិកកំពុងតែចាប់ផ្តើមកម្មវិធីសាកល្បងវិធានការថ្មីមួយ ដែលតម្រូវឱ្យអ្នកធ្វើដំណើរពីបណ្តាប្រទេសមួយចំនួន តម្កល់ប្រាក់ធានាខ្ពស់បំផុតរហូតដល់ ១៥ ០០០ដុល្លារ ដើម្បីអាចចូលទឹកដីរបស់ខ្លួន។ កម្មវិធីសាកល្បងនៃវិធានការថ្មីនេះ នឹងមានរយៈពេល១២ខែ…
សហរដ្ឋអាមេរិក ៖ សហរដ្ឋអាមេរិកកំពុងតែចាប់ផ្តើមកម្មវិធីសាកល្បងវិធានការថ្មីមួយ ដែលតម្រូវឱ្យអ្នកធ្វើដំណើរពីបណ្តាប្រទេសមួយចំនួន តម្កល់ប្រាក់ធានាខ្ពស់បំផុតរហូតដល់ ១៥ ០០០ដុល្លារ ដើម្បីអាចចូលទឹកដីរបស់ខ្លួន។
កម្មវិធីសាកល្បងនៃវិធានការថ្មីនេះ នឹងមានរយៈពេល១២ខែ ដែលគ្រោងចាប់ផ្តើមពីថ្ងៃទី២០ ខែសីហា ឆ្នាំ២០២៥ និងបញ្ចប់នៅថ្ងៃទី៥ ខែសីហា ឆ្នាំ២០២៦ មុនពេលឈានដល់ការអនុម័តជាផ្លូវការ។ ប៉ុន្តែរហូតមកទល់ពេលនេះ មានតែ ២ ប្រទេសប៉ុណ្ណោះ ដែលជាប់ក្នុងបញ្ជីនៃកម្មវិធីសាកល្បងរបស់វិធានការថ្មីនេះ។
គម្រោងនេះ ត្រូវបានលើកឡើងដោយក្រសួងការបរទេស កាលពីថ្ងៃទី៤ ខែសីហា និងត្រូវបានផ្សព្វផ្សាយកាលពីថ្ងៃទី៥ ខែសីហា កន្លងទៅ ដោយសំដៅជាមួយផ្នែកចំពោះភ្ញៀវបរទេសដែលមានអត្រាស្នាក់នៅហួសសុពលភាពនៃទិដ្ឋាការ វាក៏ជាចំណាត់ការចុងក្រោយបង្អស់របស់រដ្ឋបាលលោកប្រធានាធិបតី ដូណាល់ ត្រាំ ដែលមានគោលបំណងរឹតបន្តឹងច្បាប់អន្តោប្រវេសន៍របស់សហរដ្ឋអាមេរិក។
កម្មវិធីសាកល្បងថ្មីនេះ នឹងអនុវត្តចំពោះអ្នកធ្វើដំណើរទេសចរណ៍ និងអ្នកជំនួញដែលត្រូវការស្នើសុំទិដ្ឋាការប្រភេទ B-1 ឬ B-2 ដើម្បីចូលទឹកដីអាមេរិក។ រហូតមកដល់ពេលនេះ មានតែ២ប្រទេសប៉ុណ្ណោះ ស្ថិតក្នុងបញ្ជីនេះ គឺប្រទេសម៉ាឡាវី និងហ្សាំប៊ី។ ទោះជាយ៉ាងណាក៏ដោយ បញ្ជីនេះអាចនឹងត្រូវបានកែប្រែបន្ថែមទៀត ហើយដើម្បីអាចកំណត់បញ្ជីនេះ រដ្ឋាភិបាលអាមេរិកកំពុងប្រើប្រាស់របាយការណ៍ចូល និងចេញឆ្នាំ២០២៣ របស់នាយកដ្ឋានសន្តិសុខមាតុភូមិ។
ក្រសួងការបរទេសអាមេរិកបានលើកឡើងថា ខ្លួនរំពឹងថាមនុស្សប្រហែល ២ពាន់នាក់នឹងត្រូវតម្កល់ប្រាក់ធានា អំឡុងពេលកម្មវិធីសាកល្បងនេះ ដោយការតម្កល់ប្រាក់ត្រូវបានបែងចែកពី ៣ កម្រិត រួមមាន ៥ពាន់ដុល្លារ, ១ម៉ឺនដុល្លារ និង ១៥ ០០០ដុល្លារ។ ចំនួនទឹកប្រាក់ទាំងនេះ នឹងផ្អែកទៅលើស្ថានភាពផ្ទាល់ខ្លួនរបស់អ្នកធ្វើដំណើរ រួមទាំងហេតុផលសម្រាប់ការធ្វើដំណើរ ការងារ ប្រាក់ចំណូល ជំនាញ និងការអប់រំ។
អ្នកធ្វើដំណើរដែលត្រូវតម្កល់ប្រាក់ធានា ត្រូវតែចូល និងចាកចេញពីសហរដ្ឋអាមេរិកតាមអាកាសយានដ្ឋានចំនួន ៣ រួមមាន អាកាសយានដ្ឋានអន្តរជាតិ Boston Logan អាកាសយានដ្ឋានអន្តរជាតិ John F. Kennedy និងអាកាសយានដ្ឋានអន្តរជាតិ Washington Dulles។
មូលបត្រតម្កល់ប្រាក់ធានានឹងត្រូវបានលុបចោល ហើយមន្ត្រីកុងស៊ុលនឹងទូទាត់សងវិញនូវប្រាក់ទាំងនោះ ដោយស្វ័យប្រវត្តិក្នុងកាលៈទេសៈ ដែលអ្នកកាន់ទិដ្ឋាការចាកចេញពីអាមេរិកនៅថ្ងៃកំណត់ ឬមុនថ្ងៃកំណត់អនុញ្ញាតឱ្យស្នាក់នៅ ឬក៏អ្នកកាន់ទិដ្ឋាការមិនបានធ្វើដំណើរទៅអាមេរិកមុនពេលផុតកំណត់នៃទិដ្ឋាការ ព្រមទាំងអ្នកកាន់ទិដ្ឋាការដែលដាក់ពាក្យសុំ និងត្រូវបានបដិសេធមិនអនុញ្ញាតឱ្យចូលនៅតាមច្រកចូលរបស់អាមេរិក៕ ប្រភព ៖ U.S. Department of State និង CNBC
ចែករំលែកព័តមាននេះ