ខេត្តកំពង់ចាម៖ ការងារជិត២ម៉ឺនកន្លែង រង់ចាំពលករមកពីថៃ​ ដើម្បីចូលបម្រើការងារ នៅក្នុងភូមិសាស្ដ្រខេត្តកំពង់ចាម។

បើតាមរដ្ឋបាលខេត្តកំពង់ចាម ឯកឧត្តម អ៊ុន ចាន់ដា បានធ្វើការអំពាវនាវដល់ប្រជាពលរដ្ឋនិងពលករទើបមកពីប្រទេសថៃដែលមានបំណងចង់រកកាងារធ្វើ សូមមកទំនាក់ទំនងនៅ មន្ទីរការងារនិងបណ្តុះបណ្តាលវិជ្ជាជីវ:ខេត្ត ដែលបច្ចុប្បន្នមានរោងចក្រសហគ្រាស ត្រូវការកម្លាំងពលកម្មជាង ១៨,០០០ កន្លែង។

ការថ្លែងនេះរបស់ឯកឧត្តម អ៊ុន ចាន់ដា អភិបាលខេត្តកំពង់ចាម នាឱកាសអញ្ជើញសំណេះសំណាល និងនាំយកអំណោយ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនពលរដ្ឋភៀសសឹកពីព្រំដែន និងភរិយាយោធិនជួរមុខ ចំនួន ១០៥ គ្រួសារ នៅ​ថ្ងៃទី៥ ខែសីហា ឆ្នាំ២០២៥​។

​សូមជម្រាបជូនថា ​ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ស៊ុន មេសា នៅព្រលប់ថ្ងៃទី៥ ខែសីហា ឆ្នាំ២០២៥​នេះ បានអំពាវនាវសាជាថ្មីម្តងទៀត ឱ្យ​ពលករដែលទើបត្រលប់មកពីថៃសូមទាក់ទងទៅកាន់លេខ ១២៩៧ ដើម្បីទទួលបានឱកាសការងារដ៏សម្បូរបែបនៅកម្ពុជា។​
​​
ជាមួយគ្នានេះ លោកជំរុញឱ្យ​​ពលករខ្មែរដែលទើបមកពីថៃ ស្វែងរកការងារនៅគ្រប់ខេត្តក្រុង ជាពិសេសរាជធានីភ្នំពេញ ស្វាយរៀង កំពង់ស្ពឺ តាកែវ និងព្រះសីហនុជាដើម៕