ប្រទេសវៀតណាម ៖ ម៉ូតូអគ្គិសនីស្ទើរតែគ្រប់ម៉ាកគ្រប់ម៉ូត កំពុងតែដាក់លក់បញ្ចុះតម្លៃ និងកម្មវិធីផ្តល់ជូនដល់អតិថិជនជាច្រើនផ្សេងទៀត ខណៈដែលនៅទីក្រុងធំៗជាច្រើនរបស់ប្រទេសវៀតណាមកំពុងតែផ្លាស់ប្តូរជាបណ្តើរៗ ដើម្បីឈានទៅដល់ការបញ្ឈប់ការប្រើប្រាស់យានយន្តប្រើប្រេងសាំង។ នេះបើយោងតាមប្រភពពីសារព័ត៌មានវៀតណាម VnExpress ចេញផ្សាយនៅថ្ងៃទី៣១…
ប្រទេសវៀតណាម ៖ ម៉ូតូអគ្គិសនីស្ទើរតែគ្រប់ម៉ាកគ្រប់ម៉ូត កំពុងតែដាក់លក់បញ្ចុះតម្លៃ និងកម្មវិធីផ្តល់ជូនដល់អតិថិជនជាច្រើនផ្សេងទៀត ខណៈដែលនៅទីក្រុងធំៗជាច្រើនរបស់ប្រទេសវៀតណាមកំពុងតែផ្លាស់ប្តូរជាបណ្តើរៗ ដើម្បីឈានទៅដល់ការបញ្ឈប់ការប្រើប្រាស់យានយន្តប្រើប្រេងសាំង។ នេះបើយោងតាមប្រភពពីសារព័ត៌មានវៀតណាម VnExpress ចេញផ្សាយនៅថ្ងៃទី៣១ ខែកក្កដា ឆ្នាំ២០២៥។
ដូចអ្វីដែលនាយករដ្ឋមន្ត្រីវៀតណាម លោក ផាំ មិញជិញ (Pham Minh Chinh) បានថ្លែងកាលពីថ្ងៃទី១២ ខែកក្កដា ឆ្នាំ២០២៥ កន្លងទៅថា កណ្តាលទីក្រុងហាណូយគួរតែចាប់ផ្តើមហាមឃាត់ម៉ូតូប្រើឥន្ធនៈហ្វូស៊ីល ចាប់ពីពាក់កណ្តាលឆ្នាំ២០២៦ មុនពេលធ្វើឱ្យទីក្រុងទាំងមូលក្លាយជាតំបន់បញ្ចេញឧស្ម័នតិចនៅឆ្នាំ២០៣០។ ទីក្រុងហូជីមិញក៏គ្រោងនឹងបំប្លែងការប្រើប្រាស់ម៉ូតូប្រើសាំងមួយចំនួនធំទៅជាអគ្គិសនី និងដាក់កម្រិតជាឯកជននៅក្នុងតំបន់មួយចំនួនផងដែរ។
ព័ត៌មានពីគោលនយោបាយផ្លាស់ប្តូរទាំងនេះនៅក្នុងទីក្រុងធំៗរបស់វៀតណាម ដែលជាប្រទេសមានការប្រើប្រាស់ទោចក្រយានយន្តច្រើនបំផុតមួយនោះ បានជំរុញការចំណាប់អារម្មណ៍ជាសាធារណៈកាន់តែខ្លាំងឡើងចំពោះម៉ូតូអគ្គិសនី ហើយជាលទ្ធផល ក្រុមហ៊ុនផលិតម៉ូតូអគ្គិសនីកំពុងតែបង្កើនទុនលើសន្ទុះមួយនេះ ជាមួយនឹងការផ្សព្វផ្សាយយ៉ាងភ្លូកទឹកភ្លូកដី។
តួយ៉ាង ក្រុមហ៊ុន VinFast ដែលជាម៉ាកយីហោម៉ូតូអគ្គិសនីក្នុងស្រុកឈានមុខគេនោះ កំពុងតែផ្តល់ជូនការលើកលែងថ្លៃចុះបញ្ជីយានយន្ត និងផ្តល់ការបញ្ចុះតម្លៃ ១០% ទៀត សម្រាប់អតិថិជនដែលមានទីលំនៅអចិន្ត្រៃយ៍ ឬបណ្តោះអាសន្នក្នុងទីក្រុងហាណូយ។ ដោយម៉ូតូអគ្គិសនីតម្លៃប្រហែល ៣០លានដុង ឬ ១ ១៤៤ដុល្លារអាមេរិក អតិថិជននឹងសន្សំលុយបាន ៣,៦លានដុង ឬ ១៣៧ដុល្លារ កម្មវិធីនេះចាប់ផ្តើមពីថ្ងៃទី២៤ ខែកក្កដា ដល់ថ្ងៃទី២៤ ខែតុលា។
លើសពីនេះទៀត កម្មវិធីផ្តល់ជូនពិសេសរបស់ក្រុមហ៊ុន នឹងអនុញ្ញាតឱ្យអ្នកប្រើប្រាស់នៅក្នុងទីក្រុងមួយចំនួន អាចប្តូរម៉ូតូប្រើសាំងរបស់ខ្លួនជាមួយនឹងម៉ូតូអគ្គិសនីទៅតាមលក្ខខណ្ឌរបស់កម្មវិធីផ្តល់ជូន។ ក្រៅពី VinFast ក្រុមហ៊ុនផលិតផ្សេងទៀតទាំងក្នុងស្រុក និងបរទេសក្នុងទីផ្សារវៀតណាម ក៏កំពុងបង្កើនកិច្ចខិតខំប្រឹងប្រែងរៀងៗខ្លួនផងដែរ ដើម្បីប្រកួតប្រជែងអំឡុងពេលទីផ្សារកំពុងពុះកញ្ជ្រោលខ្លាំង។
យោងតាមប្រភពពីសារព័ត៌មានវៀតណាម Znews ឯណោះវិញ នៅថ្ងៃទី៣១ ខែកក្កដា ឆ្នាំ២០២៥ ក៏បានឱ្យដឹងផងដែរថា គម្រោងបំប្លែងយានយន្តប្រើសាំង ៤០ម៉ឺនគ្រឿងទៅជាយានយន្តអគ្គិសនីក្នុងទីក្រុងហូជីមិញ បានធ្វើឱ្យទីផ្សារម៉ូតូអគ្គិសនីកាន់តែមានភាពរស់រវើកខ្លាំងឡើង ដោយបណ្តាហាងលក់ម៉ូតូអគ្គិសនីនៅទីក្រុងមួយនេះ លែងមានម៉ូតូអគ្គិសនីលក់ឱ្យអតិថិជនបានភ្លាមៗទៀតហើយ។
ហាងជាច្រើនបានលើកឡើងស្រដៀងគ្នាថា ឥឡូវនេះ ពួកគេមានម៉ូតូអគ្គិសនីតែប៉ុន្មានគ្រឿងដែលនៅសល់ពីការដាក់តាំងបង្ហាញក្នុងហាងប៉ុណ្ណោះ ខណៈដែលហាងខ្លះទៀតស្ទើរតែគ្មានម៉ូតូអគ្គិសនីលក់ឱ្យអតិថិជនថែមទៀតផង៕
ចែករំលែកព័តមាននេះ