ទីក្រុងកូឡាឡាំពួរ ៖ រដ្ឋាភិបាល នៃប្រទេសម៉ាឡេស៊ី កម្ពុជា និងថៃ បានចេញសេចក្ដីប្រកាសរួមនេះ បន្ទាប់ពីកិច្ចប្រជុំពិសេស ដែលធ្វើជាប្រធាន រៀបចំ…
ទីក្រុងកូឡាឡាំពួរ ៖ រដ្ឋាភិបាល នៃប្រទេសម៉ាឡេស៊ី កម្ពុជា និងថៃ បានចេញសេចក្ដីប្រកាសរួមនេះ បន្ទាប់ពីកិច្ចប្រជុំពិសេស ដែលធ្វើជាប្រធាន រៀបចំ និង សាក្សី ដោយនាយករដ្ឋមន្ត្រី Dato’ Seri Anwar Ibrahim នៅទីក្រុង Putrajaya ប្រទេសម៉ាឡេស៊ី ដោយមានការចូលរួមពីនាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត និងនាយករដ្ឋមន្ត្រីស្តីទីថៃ លោក Phumtham Wechayachai។
កិច្ចប្រជុំនេះ ក៏មានការសហការរៀបចំដោយ សហរដ្ឋអាមេរិក និងការចូលរួមយ៉ាងសកម្មពី សាធារណរដ្ឋប្រជាមានិតចិន ក្នុងគោលបំណងជំរុញអោយមានដំណោះស្រាយសន្តិភាពចំពោះស្ថានភាព ដែលកំពុងកើតមាន ។
នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត និងនាយករដ្ឋមន្ត្រីស្តីទី ថៃ Phumtham Wechayachai បានបង្ហាញពីជំហរ និងសេចក្ដីប្រាថ្នាចង់ឃើញបទឈប់បាញ់ភ្លាមៗ និងការត្រឡប់ទៅរកស្ថានភាពធម្មតា ។
ប្រធានាធិបតីសហរដ្ឋអាមេរិក Donald J. Trump បានទាក់ទងជាប់ជាមួយនាយកដ្ឋមន្ត្រីទាំងពីរ ដើម្បីជំរុញដល់ដំណោះស្រាយសន្តិភាព ។
សាធារណរដ្ឋប្រជាមានិតចិន ក៏បានរក្សាការទំនាក់ទំនងជិតស្និទ្ធជាមួយប្រទេសទាំងអស់ ដើម្បីជំរុញសន្តិភាព និងបទឈប់បាញ់ ។
ការចូលរួមរបស់ភាគីទាំងអស់ បង្ហាញពីការប្តេជ្ញាចិត្តរួមចំពោះសន្តិភាព ការសន្ទនារវាងគ្នា និងស្ថិរភាពក្នុងតំបន់ ។
ប្រទេសកម្ពុជា និងថៃ បានសម្រេចការយោគយល់រួមគ្នាលើចំណុចដូចខាងក្រោម ៖
១. កិច្ចព្រមព្រៀងឈប់បាញ់ភ្លាមៗ និងដោយគ្មានលក្ខខណ្ឌ ចាប់ពីម៉ោង ២៤:០០ នាទី (ម៉ោងក្នុងស្រុក) ថ្ងៃទី២៨ ខែកក្កដា ឆ្នាំ ២០២៥។ នេះជាជំហានដំបូងសំខាន់ក្នុងការបន្ធូរស្ថានការណ៍ និងស្ដារឡើងវិញនូវសន្តិភាពនិងសន្តិសុខ។
២. រៀបចំការប្រជុំមួយរវាងមេបញ្ជាការភូមិភាគ (កងទ័ពភូមិភាគ ១ និង ២ តំណាងថៃ និងកងទ័ពភូមិភាគ ៤ និង ៥ តំណាងកម្ពុជា) នៅម៉ោង ០៧:០០ ព្រឹកថ្ងៃទី២៩ ខែកក្កដា ឆ្នាំ២០២៥ ហើយបន្ទាប់មកនឹងមានជំនួបអនុព័ន្ធយោធា ដែលដឹកនាំដោយប្រធានអាស៊ាន ប្រសិនបើមានការព្រមព្រៀងពីភាគីទាំងពីរ ។
៣. រៀបចំកិច្ចប្រជុំគណៈកម្មការព្រំដែនរួម (GBC) នៅថ្ងៃទី ៤ សីហា ២០២៥ ដែលនឹងធ្វើឡើងនៅប្រទេសកម្ពុជា ។
ដោយមានតួនាទីជាប្រធានប្តូរវេណ អាស៊ានបច្ចុប្បន្ន ប្រទេសម៉ាឡេស៊ី ត្រៀមខ្លួនជាស្រេច នឹងរៀបចំក្រុមអ្នកសង្កេតការណ៍ ដើម្បីបញ្ជាក់ផ្ទៀងផ្ទាត់ និងធានាការអនុវត្តបទឈប់បាញ់។ ម៉ាឡេស៊ី ក៏នឹងពិភាក្សាជាមួយសមាជិកអាស៊ានដទៃទៀតផងដែរ ដើម្បីអោយពួកគេចូលរួមកិច្ចខិតខំសង្កេតការណ៍ ដោយឆ្លុះបញ្ចាំងពីការប្តេជ្ញាចិត្ត ដើម្បីគាំទ្រសន្តិភាព នៅទីតាំងផ្ទាល់ ។
ភាគីទាំងពីរ ទទួលស្គាល់ឲ្យបន្តការទំនាក់ទំនងដោយផ្ទាល់រវាងនាយករដ្ឋមន្ត្រី រដ្ឋមន្ត្រីការបរទេស និងរដ្ឋមន្ត្រីការពារជាតិ ។
រដ្ឋមន្ត្រីការបរទេស និងការពារជាតិរបស់ប្រទេសម៉ាឡេស៊ី កម្ពុជា និងថៃ ត្រូវបានណែនាំឲ្យរៀបចំយន្តការលម្អិតសម្រាប់ការអនុវត្ត ការត្រួតពិនិត្យផ្ទៀងផ្ទាត់ និងរាយការណ៍ស្ថានភាពនៃបទឈប់បាញ់។ យន្តការនេះ នឹងដើរតួនាទីជាមូលដ្ឋានសម្រាប់សន្តិភាព និងគណនេយ្យភាពប្រកបដោយចេរភាព ។
កិច្ចប្រជុំនេះបញ្ជាក់ពីការប្តេជ្ញារួមរបស់ប្រទេសម៉ាឡេស៊ី កម្ពុជា និងថៃ ក្នុងការគោរពច្បាប់អន្តរជាតិ សន្តិសហវិជ្ជមានដោយសន្តិភាព និងកិច្ចសហការពហុភាគី ដើម្បីរកដំណោះស្រាយរយៈពេលវែងនិងយុត្តិធម៌ចំពោះស្ថានភាពនេះ ។
បកប្រែក្រៅផ្លូវការដោយកោះសន្តិភាព ២៨ កក្កដា ២០២៥ ទីក្រុងកូឡាឡាំពួរ ៕
ចែករំលែកព័តមាននេះ