ប្រទេស​វៀតណាម ៖ បើ​តាម​សេចក្តីរាយការណ៍​ពី​សារព័ត៌មាន​វៀតណាម VnExpress នៅ​ថ្ងៃ​ទី​២៨ កក្កដា ឆ្នាំ​២០២៥ បានឱ្យ​ដឹង​ថា ទ្រព្យ​សុទ្ធ​របស់​មហាសេដ្ឋី​វៀតណាម​ទាំងអស់​សរុប​បាន​កើនឡើង ២,៥​ពាន់​លាន​ដុល្លារ​អា​មេ​រិ​ក គិត​មក​ទល់​ពេល​នេះ សម្រាប់​ខែកក្កដា ដែល​ជំរុញ​ដោយ​ទីផ្សារ​ភាគហ៊ុន​ដ៏​រឹង​មាំ​របស់​ប្រទេស​អាស៊ី​អាគ្នេយ៍​មួយ​នេះ​។

យោង​តាម​ទិន្នន័យ​ទស្សនាវដ្តី​ពាណិជ្ជកម្ម​អា​មេ​រិ​ក Forbes បាន​បង្ហាញ​ថា មហាសេដ្ឋី​ទាំង​៥​រូប​របស់​ប្រទេស​វៀតណាម បាន​បង្ហាញ​ទ្រព្យ​សុទ្ធ​រួម​បញ្ចូល​គ្នា​សរុប​ចំនួន​២១,២​ពាន់​លាន​ដុល្លារ ខណៈ​ពេល​ដែល​ស​ន្ទ​ស្សន៍​ភាគហ៊ុន​គោល​របស់​វៀតណាម VN-Index បាន​កើនឡើង​ដល់ ១២%​។

លោក Pham Nhat Vuong ប្រធាន​ក្រុមហ៊ុន Vingroup ដែល​ជា​ក្រុមហ៊ុន​ឯកជន​ដ៏​ធំ​បំផុត​របស់​ប្រទេស​វៀតណាម នៅ​តែ​ជា​បុគ្គល​មានទ្រព្យ​សម្បត្តិ​ច្រើន​ជាងគេ​បំផុត​របស់​ប្រទេស​នេះ ជាមួយ​ទ្រព្យ​សុទ្ធ​សរុប ១១,៩ ពាន់​លាន​ដុល្លារ​។ ទ្រព្យ​សុទ្ធ​មហាសេដ្ឋី​វ័យ​៥៦​ឆ្នាំ​រូប​នេះ បាន​កើនឡើង ១,៤​ពាន់​លាន​ដុល្លារ ចាប់តាំងពី​ដើមខែ​កក្កដា ឥឡូវនេះ​លោក​បាន​ជាប់​ចំណាត់ថ្នាក់​ទី​២២៨ ក្នុង​ចំណោម​បុគ្គល​មាន​បំផុត​របស់​ពិភពលោក​។

ការ​កើនឡើង​ទ្រព្យសម្បត្តិ​របស់​លោក Pham Nhat Vuong ត្រូវ​បាន​ផ្សារ​ភ្ជាប់​ទៅ​នឹង​ដំណើរការ​ដ៏​រឹង​មាំ​នៃ​ភាគហ៊ុន​ក្រុមហ៊ុន Vingroup ដែល​បាន​កើនឡើង​ជាង ១៩% ចាប់តាំងពី​ខែកក្កដា​ចាប់ផ្តើម ខណៈ​លោក​កាន់កាប់​ភាគហ៊ុន​ដោយ​ផ្ទាល់​ចំនួន ៤៥០​លាន​ហ៊ុន ដែល​តំណាង​ឱ្យ ១១,៦% នៃ​ភាគហ៊ុន​ក្រុមហ៊ុន Vingroup​។

ដោយឡែក លោកស្រី Nguyen Thi Phuong Thao ប្រធាន​ក្រុមហ៊ុន​អាកាសចរណ៍ Vietjet ឈរ​ជា​បុគ្គល​មាន​បំផុត​ទី​២​របស់​វៀតណាម ដោយ​បាន​កត់ត្រា​ទ្រព្យ​សុទ្ធ​កើនឡើង​ពី ៧០០​លាន​ដុល្លារ​ដល់ ៣,២​ពាន់​លាន​ដុល្លារ​។ នេះ​ជា​ចំនួន​ខ្ពស់​បំផុត​សម្រាប់​លោកស្រី Thao ដែល​ជាប់​ក្នុង​បញ្ជី​មហាសេដ្ឋី​ដំបូង​ក្នុង​ឆ្នាំ ២០១៧​។ ភាគហ៊ុន​របស់ Vietjet និង HDBank ដែល​លោកស្រី Thao ជា​អនុប្រធាន​នោះ បាន​កើនឡើង ៣៨% និង ២៩,៦% ក្នុង​ខែកក្កដា​។ ដ្បិត​លោកស្រី​បាន​កាន់កាប់​ភាគហ៊ុន​សរុប ៤៧,៧​លាន​ហ៊ុន​របស់ Vietjet ដោយ​ផ្ទាល់ ប៉ុន្តែ​ក៏​មាន​ភាគហ៊ុន​រាប់រយ​លាន​នៅ​ក្នុង​ក្រុមហ៊ុន​ទាំង​ពីរ តាម​រយៈ​អង្គភាព​ដាច់​ដោយឡែក ដែល​រួមចំណែក​ដល់​កំណើន​ទ្រព្យសម្បត្តិ​លោកស្រី​។

លោក Tran Dinh Long ប្រធាន​ក្រុមហ៊ុន Steelmaker Hoa Phat Group បានឃើញ​ទ្រព្យ​សុទ្ធ​កើនឡើង​ចំនួន ៣០០​លាន​ដុល្លារ ស្រប​ពេល​លោក Ho Hung Anh ប្រធាន Techcombank ក៏​ឃើញ​ការ​កើនឡើង ១០០​លាន​ដុល្លារ​ផង​ដែរ ហើយ​ឥឡូវនេះ ទ្រព្យ​សុទ្ធ​របស់​លោក Tran Dinh Long កើនឡើង​ដល់ ២,៦​ពាន់​លាន​ដុល្លារ រីឯ​លោក Ho Hung Anh កើនឡើង ២.៤​ពាន់​លាន​ដុល្លារ​។ ចំណែក លោក Nguyen Dang Quang ប្រធាន​ក្រុមហ៊ុន Masan ក៏​បាន​បន្ថែម​ប្រាក់​ចំណេញ​រាប់​សិប​លាន​ដុល្លារ​ចូល​ក្នុង​ទ្រព្យ​សុទ្ធ​របស់​លោក​ផង​ដែរ បច្ចុប្បន្ន​ទ្រព្យ​របស់​លោក​មាន​ចំនួន ១,១​ពាន់​លាន​ដុល្លារ​៕