តារាចម្រៀងនាង ពេជ្រ សូលីកា រួមជាមួយអ្នកគាំទ្រជាច្រើនរូបនឹងរៀបចំការដើរថ្មើរជើងដើម្បីសន្តិភាពនៅលើទឹកដីអង្គរ ក្នុងគោលបំណងជាស្មារតី សម្លេង និងកម្លាំងសាមគ្គីជូនដល់ប្រទេសជាតិកម្ពុជា ដែលកំពុងរងការឈ្លានពានពីប្រទេសថៃនៅតាមខ្សែបន្ទាត់ព្រំដែន ។ តាមការគ្រោងទុកកម្មវិធីនេះនឹងធ្វើឡើងនៅថ្ងៃទី២៩…
តារាចម្រៀងនាង ពេជ្រ សូលីកា រួមជាមួយអ្នកគាំទ្រជាច្រើនរូបនឹងរៀបចំការដើរថ្មើរជើងដើម្បីសន្តិភាពនៅលើទឹកដីអង្គរ ក្នុងគោលបំណងជាស្មារតី សម្លេង និងកម្លាំងសាមគ្គីជូនដល់ប្រទេសជាតិកម្ពុជា ដែលកំពុងរងការឈ្លានពានពីប្រទេសថៃនៅតាមខ្សែបន្ទាត់ព្រំដែន ។
តាមការគ្រោងទុកកម្មវិធីនេះនឹងធ្វើឡើងនៅថ្ងៃទី២៩ ខែកក្កដា ឆ្នាំ២០២៥ នេះ ខណះពេលដែលការដើរថ្មើរជើងនេះនឹងចាប់ផ្តើមពីបរិវេណប្រាសាទអង្គរឆ្ពោះទៅកាន់ទីលានជល់ដំរី ។ បើតាមការប្រកាសតាមរយះបណ្តាញសង្គមតារាចម្រៀងនាង ពេជ្រ សូលីកា បានលើកឡើងថា ដំណឹងដ៏រំភើបមួយទៀត 🥹នាងខ្ញុំបានទទួលការអនុញ្ញាតពីអាជ្ញាធរអប្សរា តាមសំណើររបស់នាងខ្ញុំ ក្នុងការដើរថ្មើរជើងសន្ដិភាព មុខបរិវេណប្រាសាទអង្គរវត្ត ឆ្ពោះ ទៅទីលានជល់ដំរី ព្រឹកថ្ងៃទី ២៩ ខែ កក្កដា នេះ នាងខ្ញុំពិតជាសូមគោរពអរគុណ ។
នាងបន្ថែមថា នាងខ្ញុំសុំស្នើរដល់បងប្អូនទាំងអស់គ្នាសម្រាប់ការដើរថ្នើរជើង សូមកុំអោយចេញជារូបភាពមួយ ទៅជារូបភាព បាតុកម្ម ព្រោះយើងគ្រាន់តែត្រូវការ សន្តិភាព នឹង ភាពយុត្តិធម៌ ដល់ប្រទេសជាតិយើងតែប៉ុណ្ណោះ វាជាការដើររួបរួមនៃកម្លាំងសម្គី នឹង ផ្ដល់កម្លាំងចិត្តជូនដល់ ពូៗ បងៗ កងទ័ពជួរមុខ ។
នាងបញ្ជាក់ថា នាងខ្ញុំគ្មានបំណងធ្វើអោយវឹកវរ ឫ ប៉ះពាល់ដល់អាជីវកម្មតាមហាងនានារបស់បងប្អូននៅទីនោះទេ អ្វីដែលនាងខ្ញុំធ្វើនេះ វាគ្រាន់តែជាសម្លេងមួយដែលនាងខ្ញុំអាចធ្វើបានជូនប្រទេសជាតិ ខ្ញុំបានសុំសម្រាកពីការងារ ដើម្បីធ្វើរឿងដែលខ្ញុំគិតថាត្រឹមត្រូវសម្រាប់ប្រទេសជាតិរបស់ខ្ញុំ ។
យ៉ាងណាការបង្កើតឲ្យមានកម្មវិធីដើរដោយថ្មើរជើងដើម្បីសន្តិភាពពីតារាចម្រៀងនាង ពេជ្រ សូលីកា នាពេលនេះគឺមានការគាំទ្រយ៉ាងច្រើនពីមហាជន ក្នុងពេលដែលប្រជាពលរដ្ឋនៅទូទាំងប្រទេសចង់បានសន្តិភាព ដោយមិនត្រូវការសង្គ្រាមនោះឡើយ ។
ជាការកត់សម្គាល់ នេះមិនមែនជាលើកទីមួយទេដែល ពេជ្រ សូលីកា បានធ្វើរឿងមួយនេះ ពោលកាលពីពេលថ្មីៗនេះនាង រួមជាមួយអ្នកគាំទ្រជាច្រើនបាននាំគ្នាដើរថ្មើរជើងមាត់ទន្លេ ដោយកាន់ពិដានានាបង្ហាញពីការចង់បានសន្តិភាពរបស់ប្រទេសកម្ពុជា ។សកម្មភាពរបស់នាងនាពេលនោះក៏មានការចាប់អារម្មណ៍ខ្លាំងផងដែរពីសំណាក់ភ្ញៀវជាតិ និងអន្តរជាតិដែលបានដើរកំសាន្តនៅលើផ្លូវថ្មើជើងមាត់ទន្លេ ។
គួរបញ្ជាក់ថា តារាចម្រៀងនាង ពេជ្រ សូលីកា ក៏ជាអ្នកសិល្បៈជាច្រើនរូបបានចូលរួមយ៉ាងសកម្មតាមរយះយុទ្ធនាកាលនានាទាំងការងារមនុស្សធម៌ និងការគាំទ្រដល់កងទ័ពកម្ពុជាដែលកំពុងឈរជើងការពារទឹកដីតាមបន្ទាត់ព្រំដែនយ៉ាងរ៉ឹងមាំពីការឈ្លានពានរបស់ប្រទេសថៃ ៕
ចែករំលែកព័តមាននេះ