ខេត្តត្បូងឃ្មុំ ៖ មានករណីលោកនេនចំនួន៣អង្គ បាននិមន្តទៅងូតទឹកលេងនៅរណ្ដៅដីមួយកន្លែងបណ្ដាលឱ្យលង់សុគត២អង្គ ។ ហេតុការណ៍ខាងលើនេះបានកើតឡើងកាលពីវេលាម៉ោង៣រសៀលថ្ងៃទី២៦ កក្កដា ឆ្នាំ២០២៥ នៅចំណុចទឹករណ្តៅដីមួយកន្លែង ស្ថិតក្នុងឃុំគរ…
ខេត្តត្បូងឃ្មុំ ៖ មានករណីលោកនេនចំនួន៣អង្គ បាននិមន្តទៅងូតទឹកលេងនៅរណ្ដៅដីមួយកន្លែងបណ្ដាលឱ្យលង់សុគត២អង្គ ។
ហេតុការណ៍ខាងលើនេះបានកើតឡើងកាលពីវេលាម៉ោង៣រសៀលថ្ងៃទី២៦ កក្កដា ឆ្នាំ២០២៥ នៅចំណុចទឹករណ្តៅដីមួយកន្លែង ស្ថិតក្នុងឃុំគរ ស្រុកត្បូងឃ្មុំ ខេត្តត្បូងឃ្មុំ ។
តាមប្រភពពីសមត្ថកិច្ចប្រាប់ឲ្យដឹងនាព្រឹកថ្ងៃទី២៧ កក្កដា ឆ្នាំ២០២៥នេះ ថា ទីតាំងកន្លែងរណ្ដៅដីដែលគេជីកនោះគឺស្ថិតនៅមិនឆ្ងាយប៉ុន្មានពីវត្តនោះទេគឺប្រហែលមិនដល់១០០០ម៉ែត្រផង។ កន្លងមកអាជ្ញាធរមូលដ្ឋានបានធ្វើការណែនាំដល់ព្រះសង្ឃជាច្រើនអង្គ ដែលតែងតែនិមន្តមកលេងនៅទឹករណ្តៅដីនេះ សូមកុំមកទៀត ប្រយ័ត្នជួបគ្រោះថ្នាក់ បណ្ដាលឱ្យលង់សុគត។
សមត្ថកិច្ចប្រាប់បន្តឲ្យដឹងទៀតថានៅថ្ងៃទី២៦កក្កដា ២០២៥ វេលាម៉ោង៣រសៀល នៅចំណុច ស្រះទឹកមួយកន្លែងមានទំហំទទឹង ២០ម៉ែត្រ បណ្តោយ ៥០ម៉ែត្រ ជម្រៅ ៤ម៉ែត្រ របស់ម្ចាស់ឈ្មោះសារ ទៀត ភេទប្រុស អាយុ ៦២ឆ្នាំស្តិតក្នុងភូមិក្បាលបឹងសេះកើត ឃុំគរ ស្រុកត្បូងឃ្មុំ ។
សមត្ថកិច្ចបានបន្តថា មានប្រជាពលរដ្ឋបានរាយការណ៍មកកម្លាំងប៉ុស្តិ៍នគរបាលរដ្ឋបាលថាមានករណីព្រះសង្ឃ៣អង្គលង់ទឹកសុគត២អង្គ និងនៅមានព្រះជន្ម១អង្គ ត្រូវបានសង្គ្រោះទាន់ពេល។
ក្រោយទទួលពត៌មានកម្លាំងជំនាញស្រុកសហការជាមួយកម្លាំងប៉ុស្តិ៍រដ្ឋបាលគរ រួមជាមួយអាជ្ញាធរមូលដ្ឋានចុះពិនិត្យសព ក្នុងនោះរួមមាន សាមណេររងគ្រោះមាន១អង្គព្រះនាម ហ័ង លីហួរ ព្រះជន្ម ១៣វស្សា មានស្រុកកំណើតនៅភូមិ ក្បាលបឹងសេះ ឃុំ គរស្រុក ត្បូងឃ្មុំ ខេត្តត្បូងឃ្មុំ និងសាមណេរ១អង្គទៀតព្រះនាម ម៉ៅ សេង ហុង ព្រះជន្ម ១១ វស្សា មានស្រុកកំណើតនៅភូមិ ក្បាលបឹងសេះឃុំគរ ស្រុក ត្បូងឃ្មុំ ខេត្តត្បូងឃ្មុំ ។ ចំណែកសាមណេរ១ដែលរួចផុតពីគ្រោះថ្នាក់ព្រះនាម រឿន ឌីណា ព្រះជន្ម១៥ វស្សា មានស្រុកកំណើតភូមិក្បាលបឹងសេះ ឃុំគរ ស្រុកត្បូងឃ្មុំ ខេត្តត្បូងឃ្មុំ ។ សាមណេទាំង៣អង្គគង់នៅក្នុងវត្តគិរីទក្ខិណារាម (ហៅវត្តក្បាលបឹងសេះ)ស្ថិតក្នុងភូមិក្បាលបឹងសេះកើត ឃុំគរ ស្រុកត្បូងឃ្មុំ។
តាមការបំភ្លឺរបស់ព្រះសង្ឃឈ្មោះរឿន ឌីណា បានឱ្យដឹងថា មុនពេលកើតហេតុ នៅវេលាម៉ោងប្រហែល១២និង៣០នាទីថ្ងៃត្រង់ថ្ងៃកើតហេតុ ព្រះអង្គនិងសាមណេរដទៃទៀត បាននាំគ្នាទៅលេងទឹករណ្តៅដីដែលជាកន្លែងកើតហេតុខាងលើ លុះលេងបានប្រហែល១ម៉ោងជាងក៏ស្រាប់តែមានសាមណេរ២អង្គលង់ទឹកតែម្ដង ។ បន្ទាប់មកព្រះអង្គនិងសាមណេរដទៃទៀតក៏រត់ទៅហៅអ្នកភូមិនៅជិតនោះមកជួយ តែជាអកុសលសាមណេរ២អង្គបានលក់ទឹក បណ្តាលឱ្យសុគតទៅហើយ ។
ការសន្និដ្ឋានរបស់គ្រូពេទ្យមណ្ឌលសុខភាពគរបានឱ្យដឹងថា សពសាមណេរទាំង២អង្គសុគតដោយសារលង់ទឹកពិតប្រាកដមែន ពុំមានពាក់ព័ន្ធនិងបទល្មើសព្រហ្មទណ្ឌ ៕
ចែករំលែកព័តមាននេះ