រាជធានីភ្នំពេញ ៖ ក្រសួងការបរទេស និងសហប្រតិបត្តិការអន្តរជាតិកម្ពុជា បានបញ្ជាក់ថា ភាគីថៃ មិនបានទទួលការសម្របសម្រួលពីនាយករដ្ឋមន្ត្រីម៉ាឡេស៊ី ជាប្រធានប្តូរអាស៊ាន ដែលបានស្នើឲ្យបញ្ចប់ជម្លោះនៅតាមតំបន់ព្រំដែននោះទេ ផ្ទុយទៅវិញ…
រាជធានីភ្នំពេញ ៖ ក្រសួងការបរទេស និងសហប្រតិបត្តិការអន្តរជាតិកម្ពុជា បានបញ្ជាក់ថា ភាគីថៃ មិនបានទទួលការសម្របសម្រួលពីនាយករដ្ឋមន្ត្រីម៉ាឡេស៊ី ជាប្រធានប្តូរអាស៊ាន ដែលបានស្នើឲ្យបញ្ចប់ជម្លោះនៅតាមតំបន់ព្រំដែននោះទេ ផ្ទុយទៅវិញ ធ្វើការទម្លាក់កំហុសដាក់កម្ពុជា ។
ថ្លែងក្នុងសន្នីសីទសារព័ត៌មាន នារសៀលថ្ងៃទី២៥ ខែកក្កដា ឆ្នាំ២០២៥ នៅទីស្តីការគណៈរដ្ឋមន្ត្រី ឯកឧត្តម ជុំ សុន្ទរីអ្នកនាំពាក្យក្រសួងការបរទេស និងសហប្រតិប្តិការអន្តរជាតិ ក៏បានលើកឡើងថា ការធ្វើការសម្របសម្រួលពីនាយករដ្ឋមន្ត្រីម៉ាឡេស៊ី ពាក់ព័ន្ធនឹងជម្លោះរវាងកម្ពុជា និងថៃ សម្តេចបវរធិបតី ហ៊ុន ម៉ាណែតនាយករដ្ឋមន្ត្រី បានផ្ញើលិខិតមួយច្បាប់ ទៅកាន់នាយករដ្ឋមន្ត្រីម៉ាឡេស៊ី ដែលជាប្រធានប្តូរវេន បច្ចុប្បន្នរបស់អាស៊ាន ដើម្បីទាមទារឲ្យបញ្ចប់ករាឈ្លានពានពីសំណាក់ថៃ មកលើដែនអធិបតេយ្យភាពកម្ពុជា ។
ឯកឧត្តម អ្នកនាំពាក្យ បានលើកឡើងថា បន្ទាប់ពីទទួលលិខិតរួច នាយករដ្ឋមន្ត្រីម៉ាឡេស៊ី បានធ្វើការទាក់ទងដោយផ្ទាល់មកសម្តេចបវរធិបតី និងនាយករដ្ឋមន្ត្រីស្តីទីប្រទេសថៃ ដោយធ្វើការសម្របសម្រួលកាលពីថ្ងៃទី២៤ កក្កដា ឆ្នាំ២០២៥ ដោយស្នើឲ្យប្រទេសទាំងពីរ មានការបញ្ចប់ការប្រយុទ្ធគ្នានៅតាមព្រំដែន ក៏ប៉ុន្តែជាការគួរឲ្យសោកស្តាយ ក្នុងរយៈពេល១ម៉ោង បន្ទាប់មកភាគី មានការផ្លាស់ប្តូរជំហរ ហើយនៅម៉ោង៦ព្រឹក ថ្ងៃនេះ ថៃបានធ្វើការបាញ់មកលើតំបន់ឈរជើងរបស់កម្ពុជាទៀត ។
ឯកឧត្តម ជុំ សុន្ទរី បានបញ្ជាក់ថា ៖ «អន្តរាគមន៍របស់នាយករដ្ឋមន្ត្រីម៉ាឡេស៊ី មិនសម្រេចបានលទ្ធផល មិនមែនដោយកម្ពុជាខ្វះឆន្ទៈទទួលយកដំណោះស្រាយនោះទេ ដូចដែលនាយករដ្ឋមន្ត្រីស្តីទីថៃ លើកឡើងនោះទេ។ ផ្ទុយទៅវិញ ធាតុពិត គឺថៃធ្វើការផ្លាស់ប្តូរ មិនទទួលយកការសម្របសម្រួលពីនាយរដ្ឋមន្ត្រីម៉ាឡេស៊ី» ៕
ចែករំលែកព័តមាននេះ