ទីក្រុងវ៉ាស៊ីនតោន៖ អាមេរិកបញ្ជូននាវាមុជទឹកដើរដោយថាមពលនុយក្លេអ៊ែរទៅមហាសមុទ្រប៉ាស៊ីហ្វិចដើម្បីបង្ហាញកម្លាំងសាច់ដុំរបស់ខ្លួន។ នេះជានាវាមុជទឹកធំលំដាប់ទី២របស់អាមេរិកដែលអាចបាញ់គ្រាប់មីស៊ីលបណ្ដែត (cruise) ម៉ាកថូម៉ាហក (Tomahawk) រយៈចម្ងាយឆ្ងាយ។ នាវានេះបានចាកចេញដំណើរទៅកាន់តំបន់មាត់សមុទ្រខាងកើតកោះហាវ៉ៃ។
ចំណាត់ការនេះធ្វើឡើងនៅពេលអាមេរិកចាប់ផ្ដើមរំកិលខ្លួនចូលតំបន់ឥណ្ឌូ-ប៉ាស៊ីហ្វិចកាន់តែជ្រៅដើម្បីងាយស្រួលតទល់គ្នាជាមួយប្រទេសចិនដែលជាបងធំប្រចាំទ្វីបអាស៊ី ហើយកំពុងកសាងកម្លាំងទ័ពជើងទឹកជាប់ចំណាត់ថ្នាក់ទី២នៅលើពិភពលោកបន្ទាប់ពីអាមេរិក (រុស្ស៊ីធ្លាក់ទៅលេខបីវិញ)។ ប៉ុន្មានឆ្នាំចុងក្រោយនេះ ប្រទេសចិនបានពង្រីកវត្តមានយោធារបស់ខ្លួនយ៉ាងសម្បើមនៅមហាសមុទ្រប៉ាស៊ីហ្វិចខាងលិច ជាពិសេសទ័ពជើងទឹក ។
នេះជាសញ្ញាមិនស្រួលសម្រាប់អាមេរិក និងសម្ព័ន្ធមិត្តអាមេរិក។ ប្រទេសចិនក៏បានផលិតគ្រាប់មីស៊ីលយ៉ាងច្រើនសម្បើមអស្ចារ្យស្តុកទុកនៅក្នុងឃ្លាំងរបស់ខ្លួនដែលអាចបាញ់ប្រហារទៅលើទឹកនៃប្រទេសជប៉ុនខណៈដែលជប៉ុនក៏មានមូលដ្ឋានកងទ័ពអាមេរិកជាច្រើនកន្លែងផងដែរ។ ក្នុងនាមជាសម្ព័ន្ធមិត្តសំខាន់របស់អាមេរិកសម្រាប់ទប់ទល់នឹងប្រទេសចិន ជប៉ុនក៏បាន និងកំពុងពង្រឹងសមត្ថភាពការពារជាតិរបស់ខ្លួនសម្បើមណាស់ដែរ។
ដើម្បីត្រៀមទប់ទល់នឹងលទ្ធភាពនៃការវាយប្រហាររបស់ចិន ជប៉ុនបានអភិវឌ្ឍឈានឡើង (upgrade) នូវអាវុធសម្រាប់បាញ់កម្ទេចនាវាចម្បាំង។ មិនតែប៉ុណ្ណោះ ជប៉ុនបានកុម្ម៉ង់ទិញនាវាចម្បាំងទំនើបៗដែលអាចបាញ់កម្ទេចគ្រាប់មីស៊ីលរបស់បច្ចាមិត្ត។ ដូច្នះឃើញថាមហាអំណាចទាំងប៉ុន្មាននេះបើប៉ះគ្នាល្មមធ្វើឱ្យរលាយមហាសមុទ្រប៉ាស៊ីហ្វិច។ រុស្ស៊ី កូរ៉េខាងជើង និងកូរ៉េខាងត្បូង ក៏អាចនឹងចូលរួមនៅក្នុងសង្គ្រាមនេះផងដែរ។
ឆ្លើយតបទៅនឹងការពង្រីកកម្លាំងយោធារបស់ប្រទេសចិននៅប៉ាស៊ីហ្វិច អាមេរិកចាប់ផ្ដើមរៀបចំជើងព្រួលជាបណ្ដើរៗ។ មន្ទីរបញ្ចកោណ (ទីស្ដីការក្រសួងការពារជាតិអាមេរិក) ចាប់ផ្ដើមពង្រឹងកម្លាំងនៅមហាសមុទ្រប៉ាស៊ីហ្វិចខាងលិច។ ក្នុងនោះមានការដាក់ពង្រាយនាវាដឹកយន្តហោះដែលរ៉ាដាចាប់មិនបាន ឬអ្នកខ្លះហៅថាយន្តហោះបំបាំងកាយ (stealth) និងក៏ដាក់ពង្រាយផងដែរជើងទម្របាញ់មីស៊ីលនៅលើដីដែលមានវង់ប្រតិបត្តិការឆ្ងាយ។
នាវាមុជទឹករបស់អាមេរិកខ្លះដែលដើរដោយថាមពលនុយក្លេអ៊ែរកំពុងដំណើរការនៅក្នុងកងនាវាចម្បាំងប៉ាស៊ីហ្វិច និងដាក់ពង្រាយនៅវ៉ាស៊ីនតោន កាលីហ្វ័រញ៉ា ហាវ៉ៃ និងកោះហ្កាំ (Guam)។ កោះនេះមានចម្ងាយជិតជាងគេទៅនឹងប្រទេសចិន និងក៏ជាមូលដ្ឋានយោធាដ៏សំខាន់ផងដែរ។ គ្រាន់តែនៅកោះនេះមួយប៉ុណ្ណោះ អាមេរិកយកនាវាមុជទឹកទៅឈប់សំចតរហូតដល់៥គ្រឿងចាប់តាំងពីខែវិច្ឆិកា ឆ្នាំ២០២៤ រហូតមកដល់បច្ចុប្បន្ន។
នាវាមុជទឹកយូអែសអែស អ៊ីនឌីអាណា (USS Indiana) បានរំកិលខ្លួនទៅដល់ទីសំចតថ្មីរបស់ខ្លួននៅមូលដ្ឋានទ័ពជើងទឹកអាមេរិកនៅកោះហាវ៉ៃកាលពីថ្ងៃអង្គារ។ ទីនោះជាកន្លែងហ្វឹកហាត់ ភស្តុភារ និងផ្ដល់សេវាគាំទ្រចំពោះនាវាមុជទឹក។ មុនការមកដល់នៃនាវានេះ អាមេរិកបានបញ្ជូននាវាមុជទឹកមួយទៀតដើរដោយនុយក្លេអ៊ែរដូចគ្នាឈ្មោះយូអែសអែស ថូឡេដូ (USS Toledo) ទៅដល់ហាវ៉ៃបន្ទាប់ពីបញ្ចប់បេសកកម្មនៅកន្លែងចាស់កាលពីថ្ងៃទី១២ ខែកក្កដា។ ខាងលើនេះជាការស្រង់ប្រភពពីទស្សនាវដ្ដីញូស្វីក (Newsweek) និងប្រភពដទៃទៀត៕
ចែករំលែកព័តមាននេះ