ទីក្រុងហាណូយ៖ យន្តហោះដឹកអ្នកដំណើរមួយគ្រឿងរបស់ក្រុមហ៊ុនអាកាសចរណ៍វៀតណាម អ៊ែឡាញ (Vietnam Airlines) ត្រូវតែបង្ខំចិត្តបង្វែរទិសដៅហោះហើររបស់ខ្លួនជាបន្ទាន់បន្ទាប់ពីអ្នកដំណើរជនជាតិកូរ៉េម្នាក់កំពុងអង្គុយនៅលើយន្តហោះរួមដំណើរជាមួយគេឯងសុខៗស្រាប់តែគាត់សន្លប់បាត់មាត់បាត់កភ្លាមមួយរំពេច។
ជើងហោះហើរនេះត្រូវចាកចេញដំណើរពីរដ្ឋធានីហាណូយឆ្ពោះទៅអាកាសយានដ្ឋានខេត្តសៀមរាប។ ប៉ុន្តែយន្តហោះត្រូវតែបង្ខំចិត្តចុះចតទាំងកណ្ដាលទីនៅទីក្រុងដាណាង (Da Nang) នៅពេលហោះបានប្រហែល៤០នាទី។ អ្នកដំណើរដែលអង្គុយនៅកៅអី១៧ជី (17G) ចាប់ផ្ដើមមានអាការៈមិនស្រួលខ្លួនមួយរំពេចហាក់ដូចជារកកលនឹងសន្លប់ ហើយសាច់ឈាមរបស់គាត់ចាប់ផ្ដើមស្លេកស្លាំងកាន់តែខ្លាំងទៅៗ។
នៅក្នុងស្ថានភាពនេះ បុគ្គលិកបម្រើការនៅលើយន្តហោះ (បាហុនិកា) ក៏ចាប់ផ្ដើមផ្ដល់ការជួយសង្គ្រោះបឋមទៅតាមគោលការណ៍ថែរក្សាសុវត្ថិភាពរបស់វិស័យអាកាសចរណ៍។ ប៉ុន្តែនៅពេលពិនិត្យឃើញថាអ្នកដំណើររូបនោះមិនបានប្រសើរឡើងវិញទេ អាកាសយានិកក៏សម្រេចចិត្តបង្វែរទិសដៅយន្តហោះទៅចុះចតនៅអាកាសយានដ្ឋានអន្តរជាតិទីក្រុងដាណាងដើម្បីយកគាត់ទៅពិនិត្យដោយគ្រូពេទ្យជំនាញជាប្រញាប់។ គេទុកឱ្យគាត់សម្រាកព្យាបាលសិនចុះបើគាត់ទៅមុខលែងរួចហើយ។
គ្រាន់តែចុះចតដល់ដីភ្លាម ក្រុមហ៊ុនវៀតណាម អ៊ែឡាញបានចាត់បុគ្គលិកទៅជួយយកអាសាអ្នកដំណើរម្នាក់នោះ និងដឹកគាត់ទៅមន្ទីរពេទ្យដើម្បីសង្គ្រោះបន្ទាន់។ ឥឡូវនេះអាការៈជំងឺរបស់គាត់បានធូរស្បើយហើយ។ បន្ទាប់ពីដឹកគាត់ទៅដាណាងរួច យន្តហោះក៏បន្តដំណើររហូតដល់គោលដៅចុងក្រោយ។ វៀតណាមអ៊ែឡាញថាខ្លួនយកចិត្តទុកដាក់ខ្ពស់ចំពោះសុវត្ថិភាព និងសុខុមាលភាពរបស់អ្នកដំណើរជានិច្ច។ ខាងលើនេះជាការដកស្រង់ប្រភពពីវៀតណាមអ៊ិចប្រែស (Vietnam Express)៕
ចែករំលែកព័តមាននេះ