ខេត្តស្វាយរៀង ៖ កម្លាំងចម្រុះ ចុះបង្ក្រាបទីតាំងបទល្មើសអនឡាញ ២កន្លែង ចាប់ឃាត់ខ្លួនជនសង្ស័យជិត២០០នាក់ ក្នុងនោះរកឃើញជនជាតិចិន ៩០នាក់, ជនជាតិវៀតណាម ៣៥នាក់,…
ខេត្តស្វាយរៀង ៖ កម្លាំងចម្រុះ ចុះបង្ក្រាបទីតាំងបទល្មើសអនឡាញ ២កន្លែង ចាប់ឃាត់ខ្លួនជនសង្ស័យជិត២០០នាក់ ក្នុងនោះរកឃើញជនជាតិចិន ៩០នាក់, ជនជាតិវៀតណាម ៣៥នាក់, ជនជាតិមីយ៉ាន់ម៉ា ១៥នាក់, ឡាវម្នាក់ ក្នុងប្រតិបត្តិការចុះត្រួតពិនិត្យទីតាំងសង្ស័យលួចលាក់ប្រព្រឹត្តបទល្មើស Online Scam នៅក្រុងបាវិត ។
បើតាម សមត្ថកិច្ចឲ្យដឹងថា នៅរសៀលថ្ងៃទី១៨ ខែកក្កដា ឆ្នាំ២០២៥ កម្លាំងចម្រុះ នៃរដ្ឋបាលខេត្តស្វាយរៀង បានចុះធ្វើការត្រួតពិនិត្យទីតាំងសង្ស័យលួចលាក់ប្រព្រឹត្តបទល្មើស Online Scam ចំនួន០២ទីតាំង ៖ ទី១ នៅសណ្ឋាគារ៤រដូវ និងទីតាំងទី២ អគារម៉ារីណា ស្ថិតនៅភូមិបាវិតកណ្តាល សង្កាត់បាវិត ក្រុងបាវិត ។
នៅក្នុងប្រតិបត្តិការនោះ បានរកឃើញ ជនបរទេសកំពុងរស់នៅសរុបជិត២០០នាក់ ក្នុងនោះជនជាតិចិនមាន ចំនួន៩០នាក់ ស្ត្រី២៧នាក់, ជនជាតិវៀតណាម ៣៥នាក់ ស្ត្រី៣២នាក់, ជនជាតិមីយ៉ាន់ម៉ា១៥នាក់ ស្ត្រី១៣នាក់, ឡាវចំនួន០១នាក់ស្ត្រី ។
ក្នុងការចុះបង្ក្រាបទាំង០២ទីតាំងនេះ សមត្ថកិច្ចបានដាក់ការសង្ស័យការជាប់ពាក់ព័ន្ធនឹងការលបលួចប្រព្រឹត្តបទល្មើស Online Scams ខណៈបានរកឃើញថា មានការលួចលាក់កែច្នៃ ជួញដូរ ប្រើប្រាស់ និងរក្សាទុកគ្រឿងញៀន ដែលជាអំពើខុសច្បាប់ ។
វត្ថុតាង និងអ្នកពាក់ព័ន្ធទាំងអស់ត្រូវបានបញ្ជូនទៅអធិការដ្ឋាននគរបាលក្រុងបាវិត ដើម្បីបន្តអនុវត្តនីតិវិធីផ្លូវច្បាប់ ។
សូមបញ្ជាក់ថា សមត្ថកិច្ចនឹងចាត់វិធានការ តាមផ្លូវច្បាប់ឱ្យតឹងរឹងបំផុតចំពោះមេក្លោងទាំងឡាយដែលជាប់ពាក់ព័ន្ធនឹងអំពើឆបោកតាមប្រព័ន្ធបច្ចេកវិទ្យា ៕
ចែករំលែកព័តមាននេះ