ខេត្តកណ្តាល ៖ កូនអើយកូន ខំចិញ្ចឹមតាំងពីបាតជើងក្រហម ធ្លាប់យកទៅដាក់មណ្ឌលកែប្រែបន្សាបគ្រឿងញៀននៅឯភ្នំពេញ អស់រយៈពេល០៧ខែ ចេញមកវិញ ការងារក៏ជួយធ្វើ គិតតែដើរលេង ឡូឡាបំផ្លាញរបស់របរ…
ខេត្តកណ្តាល ៖ កូនអើយកូន ខំចិញ្ចឹមតាំងពីបាតជើងក្រហម ធ្លាប់យកទៅដាក់មណ្ឌលកែប្រែបន្សាបគ្រឿងញៀននៅឯភ្នំពេញ អស់រយៈពេល០៧ខែ ចេញមកវិញ ការងារក៏ជួយធ្វើ គិតតែដើរលេង ឡូឡាបំផ្លាញរបស់របរ សុំលុយម៉ែឪ មិនបាន វាយធ្វើបាបម្តាយ លើកនេះវាយឪពុករហូតហូរឈាម ដោយការអស់ទ្រាំ ឪពុកក៏ប្តឹងសមត្ថកិច្ចឲ្យឃាត់ខ្លួន ។
ហេតុការណ៍នេះបានកើតឡើងកាលពីវេលាម៉ោង០៦ និង២០នាទីព្រឹកថ្ងៃទី១៦ ខែកក្កដា ឆ្នាំ២០២៥ ស្ថិតក្នុងភូមិព្រែកតាហ៊ីង ឃុំព្រែកថ្មី ស្រុកកោះធំ ខេត្តកណ្តាល ។
សមត្ថកិច្ចបានឲ្យដឹងថា ជនរងគ្រោះមានឈ្មោះ លឹប ជាវលី ភេទប្រុស អាយុ៦៨ឆ្នាំ ដែលមានទីលំនៅភូមិព្រែកតាហ៊ីង ឃុំព្រែកថ្មី ស្រុកកោះធំ ខេត្តកណ្តាល (ត្រូវជាឪពុកបង្កើត)។ ចំណែកជនសង្ស័យមានឈ្មោះ មុត វិតា ភេទប្រុស អាយុ៣៦ឆ្នាំ ដែលមានទីលំនៅភូមិព្រែកតាហ៊ីង ឃុំព្រែកថ្មី ស្រុកកោះធំ ខេត្តកណ្តាល (ត្រូវជាកូនបង្កើត) ដកហូតបាន អំបោសដងឬស្សី ចំនួន០១ ។
សមត្ថកិច្ចបានឲ្យដឹងថា រយៈកាលកន្លងមកជនសង្ស័យធ្លាប់ត្រូវបានក្រុមគ្រួសារយកទៅដាក់មណ្ឌលកែប្រែ បន្សាប់គ្រឿងញៀន នៅឯភ្នំពេញអស់រយៈពេល០៧ខែ ។ ក្រោយពីចេញពីមណ្ឌលវិញ ជនសង្ស័យ មិនកែខ្លួន មិនបានជួយធ្វើការងារឪពុកម្តាយនោះទេ គឺគិតតែពីដើរលេងរហូត។ នៅពេលជនសង្ស័យទៅសុំលុយពីម្តាយឪពុកម្តងៗ គឺតែងតែស្រែកឡូឡាជេរប្រមាថហើយបានធ្វើសកម្មភាពវាយតប់ ទៅលើក្បាលម្តាយរបស់ខ្លួនជាញឹកញាប់ទៀតផង តែម្តាយរបស់ជនសង្ស័យគាត់មិនបានទៅរាយការណ៍ និងប្តឹងសមត្ថកិច្ចនោះទេ ។
លុះថ្ងៃទី១៦ ខែកក្កដា ឆ្នាំ ២០២៥ វេលាម៉ោង០៦និង២០នាទីព្រឹក ជនរងគ្រោះ ដែលជាឪពុកបង្កើតកំពុងតែរៀបចំខ្លួនទៅដីចំការស្រាប់តែជនសង្ស័យជាកូន បានដើរចូលមកសុំលុយពីជនរងគ្រោះ ចំនួន១០,០០០៛(មួយម៉ឺនរៀល) តែជនរងគ្រោះគាត់មិនមានលុយឲ្យគ្រប់នោះទេគឺមានលុយតែចំនួន ៦៥០០៛(ប្រាំមួយពាន់ប្រាំរយរៀល)តែប៉ុណ្ណោះ នៅពេលនោះជនសង្ស័យនៅតែមិនព្រមយក ហើយបានទារលុយបន្ថែមទៀតពីជនរងគ្រោះ ដើម្បីឲ្យគ្រប់ចំនួន១០,០០០រៀល តែជនរងគ្រោះគាត់បានឆ្លើយប្រាប់ទៅជនសង្ស័យវិញថា គាត់គ្មានលុយបន្ថែមទៀតនោះទេ ស្រាប់តែជនសង្ស័យជាកូន បានខឹងហើយបានស្រែកឡូឡា និងជេរប្រមាថព្រមទាំងបានយកដំបងឫស្សី ហើយនិងអំបោសយកមកវាយទៅលើជនរងគ្រោះជាឪពុក ជាច្រើនដំបង ត្រូវចំលើផ្ទៃមុខចំនួន០២កន្លែង បណ្តាលអោយបែកចេញឈាម និងត្រូវចំក្បាលបណ្តាលពកចេញឈាមនិងលើដងខ្លួន នៅពេលនោះជនរងគ្រោះគាត់បានស្រែកហៅឲ្យអ្នកជិតខាងមកជួយខ្លួនផង ទើបមានអ្នកជិតខាងដើរចូលមកជួយនិងចាប់ឃាត់ជនសង្ស័យជាកូនបំបែកចេញ។
ក្រោយមកបានបន្តិចជនរងគ្រោះក៏បានទៅដាក់ពាក្យបណ្តឹងនៅប៉ុស្តិនគរបាលប៉ុស្តិ៍ព្រែកថ្មី ដើម្បីអោយសមត្ថកិច្ចជួយនាំខ្លួនជនសង្ស័យខាងលើនេះ យកមកកាន់អធិការដ្ឋាននគរបាលស្រុកកោះធំ ដើម្បីចាត់ការតាមនិតិវិធីច្បាប់ ដោយនៅចំពោះមុខសមត្ថកិច្ចជនសង្ស័យបានឆ្លើយសារភាពថាខ្លួនពិតជាបានធ្វើសកម្មភាពវាយទៅលើជនរងគ្រោះដែលជាឪពុកបង្កើតពិតប្រាកដមែន ៕
ចែករំលែកព័តមាននេះ