ទីក្រុងបាងកក៖ រដូវវស្សានៅទ្វីបអាស៊ីឆ្នាំនេះបង្កជាគ្រោះទឹកជំនន់យ៉ាងល្ហល្ហាចនៅតាមប្រទេសមួយចំនួន។ ឧទាហរណ៍ ប្រទេសថៃ កូរ៉េខាងត្បូង និងប៉ាគីស្ថានជាដើម។ ប្រទេសខ្លះមានករណីស្លាប់មនុស្សជាបណ្ដើរៗបន្ទាប់ពីជំនន់ទឹកភ្លៀងហក់ឡើងឆាប់រហ័សជាហេតុធ្វើឱ្យពួកគេជាប់ផុងនៅកណ្ដាលវាលទឹក។ តទៅនេះ យើងសូមលើកយកប្រទេសថៃមកនិយាយមុនគេ។ ប្រទេសថៃប្រឈមនឹងភ្លៀងធ្លាក់ខ្លាំង និងខ្យល់កន្ត្រាក់នៅតាមតំបន់មាត់សមុទ្រដោយសារខ្យល់ព្យុះវីផា (Wihpa)។
ខ្យល់ព្យុះនេះកំពុងប្រមូលផ្ដុំកម្លាំងដើម្បីត្រៀមវាយប្រហារ។ រីឯខ្យល់មូសុងវស្សាក៏បក់ខ្លាំងជាងធម្មតាផងដែរ។ គេរំពឹងថាប្រទេសថៃនឹងមានភ្លៀងធ្លាក់ខ្លាំង និងគ្រោះទឹកជំនន់ហក់ឡើងយ៉ាងឆាប់រហ័ស។ ថ្ងៃនេះក្រសួងឧតុនិយមចេញសេចក្ដីប្រកាសអាសន្នមួយដើម្បីឱ្យប្រជាជនប្រុងប្រយ័ត្នខ្ពស់ព្រោះសម្ពាធទាបបន្តគ្របដណ្ដប់តំបន់ខ្ពង់រាបប្រទេសមីយ៉ាន់ម៉ា និងវៀតណាមខាងជើង។ ទន្ទឹមនឹងនោះជំនោរពីទិសនិរតីកំពុងបក់នៅលើសមុទ្រអាន់ដាម៉ាន់ (Andaman) និងឈូងសមុទ្រថៃ។
នៅតំបន់ខាងជើង កណ្ដាល និងខាងកើតនឹងមានភ្លៀងធ្លាក់ខ្លាំង ហើយនឹងមានទឹកជំនន់ហក់ឡើងឆាប់រហ័សនៅតាមតំបន់ខ្សែទឹក, ជើងភ្នំ និងតំបន់ទំនាប។ អាជ្ញាធរអំពាវនាវឱ្យប្រជាជនយកចិត្តទុកដាក់ខ្ពស់ចំពោះបញ្ហានេះ។ បើមើលស្ថានភាពមិនស្រួលទេត្រូវតែប្រញាប់ជម្លៀសខ្លួនជាបន្ទាន់។ នៅលើផ្ទៃសមុទ្រអាន់ដាម៉ាន់ប៉ែកខាងក្រោមអាចនឹងមានរលកកម្ពស់២ម៉ែត្រ។ រីឯប៉ែកខាងលើអាចមានកម្ពស់ចន្លោះពី១-២ម៉ែត្រ។ ទឹករលកអាចនឹងមានកម្ពស់លើស២ម៉ែត្របើមានខ្យល់កន្ត្រាក់។
ហេតុនេះអ្នកចុះទូក និងកប៉ាល់តូចធំគ្រប់ប្រភេទត្រូវប្រុងប្រយ័ត្នខ្ពស់។ ប៉ុន្តែអ្នកបើកទូកដែលជំនាញមែនទែនពួកគេស៊ំានឹងបញ្ហានេះហើយ។ នៅពេលឃើញអ្វីមិនស្រួល ពួកគេច្រើនចូលចតនៅតាមកូនកោះតូចៗ។ នៅហ្វ៊ីលីពីន ខ្យល់ព្យុះវីផានឹងបក់កាត់តំបន់ខ្ពង់រាបប្រទេសហ្វ៊ីលីពីន ហើយនឹងបង្ហួសដំណើរចូលទៅសមុទ្រចិនខាងត្បូងពីថ្ងៃទី១៩-២២ ខែកក្កដា។
ក្រឡេកទៅមើលស្ថានភាពភ្លៀង និងគ្រោះទឹកជំនន់នៅកូរ៉េខាងត្បូងវិញម្ដង។ នៅកូរ៉េខាងត្បូងភ្លៀងធ្លាក់បីថ្ងៃជាប់គ្នាស្ទើរតែគ្រប់ទីកន្លែង និងបានឆក់យកជីវិតមនុស្សយ៉ាងតិច៤នាក់។ មនុស្សជាង៥ពាន់នាក់ត្រូវបង្ខំចិត្តជម្លៀសខ្លួនចេញពីផ្ទះជាបន្ទាន់នៅពេលជំនន់ទឹកភ្លៀងចាប់ផ្ដើមហក់ឡើងខ្លាំង និងហ៊ុមព័ទ្ធតំបន់ដែលពួកគេរស់នៅ។ អ្នកខ្លះកំពុងជិះឡានសុខៗត្រូវទឹកជំនន់ព័ទ្ធជុំវិញ។ ម៉្លោះហើយពួកគេសុខចិត្តទុកចោលឡានតម្លៃរាប់ម៉ឺនដុល្លារដើម្បីរំដោះខ្លួនចេញពីគ្រោះថ្នាក់។
តំបន់ខ្លះដូចជាទីក្រុងក្វាងជូជាដើម (Gwangju) មានភ្លៀងធ្លាក់ខ្លាំងបំផុត។ ត្រឹមតែ២៤ម៉ោងប៉ុណ្ណោះ ទីនេះទទួលបានរបបទឹកភ្លៀងលើសពី៤រយមិល្លីម៉ែត្រគិតត្រឹមព្រឹកថ្ងៃសុក្រ។ មនុស្សម្នាក់នៅបាត់ខ្លួននៅឡើយមិនដឹងថាគាត់ស្លាប់ ឬរស់នោះទេ។ នៅក្នុងចំណោមអ្នកស្លាប់ទាំង៤នាក់នោះ ២នាក់ជាប់ផុងនៅក្នុងឡានទៅណាមិនរួច។ ម្នាក់ស្លាប់នៅក្នុងផ្ទះរបស់ខ្លួនជាន់ក្រោមដីនៅពេលទឹកជន់លិច។ ចំណែកម្នាក់ចុងក្រោយគេស្លាប់ដោយសារជញ្ជាំងខណ្ឌផ្លូវកម្ពស់ដប់ម៉ែត្របាក់សង្កត់ពីលើ។
ងាកចេញពីកូរ៉េខាងត្បូង យើងទៅតាមស្ថានភាពភ្លៀងធ្លាក់ និងគ្រោះទឹកជំនន់នៅប្រទេសប៉ាគីស្ថានវិញម្ដង។ ប៉ាគីស្ថានហាក់ដូចជារងគ្រោះខ្លាំងបំផុតនៅក្នុងរដូវវស្សាឆ្នាំនេះ។ គ្រាន់តែទឹកជំនន់មួយប្រាវប៉ុណ្ណោះបានសម្លាប់មនុស្សយ៉ាងតិច១៧៨នាក់គិតតែសាកសពជនរងគ្រោះដែលបានរកឃើញ។ ខ្យល់មូសុងវស្សាបានពាំនាំទឹកភ្លៀងដ៏ច្រើនសន្ធឹកសន្ធាប់មកស្រោចលើខេត្ត-ក្រុងនានាព្រមទាំងបំផ្លិចបំផ្លាញផ្ទះរបស់អ្នកស្រុក និងបង្ខំឱ្យមនុស្សរាប់ពាន់នាក់ជម្លៀសខ្លួនជាបន្ទាន់។
អាជ្ញាធរអះអាងថាមនុស្សយ៉ាងតិច៦៣នាក់ស្លាប់នៅខេត្តភូនចាប (Punjab) តែមួយប៉ុណ្ណោះ ហើយនៅក្នុងរយៈពេលត្រឹមតែ២៤ម៉ោងប៉ុណ្ណោះចាប់ពីថ្ងៃពុធដល់ថ្ងៃព្រហស្បតិ៍។ ជនរងគ្រោះភាគច្រើនស្លាប់ដោយសារអគារបាក់សង្កត់ពីលើ។ ចំណែកជនរងគ្រោះដទៃទៀតស្លាប់ដោយសារលង់ទឹក ឬខ្សែភ្លើងឆក់។ នៅក្នុងចំណោមអ្នកស្លាប់សរុបទាំងជាង១រយនាក់នោះគ្រាន់តែកុមារតូចៗមានរហូតដល់៨៥នាក់។ ខាងលើនេះជាការដកស្រង់ប្រភពពីសារព័ត៌មានដឹណេសឹន (The Nation), ដឹ អ៊ីនឌីផឹនដឹន (The Indenpendent) និងទីភ្នាក់ងារព័ត៌មានរ៉យទ័រ (Reuters)៕
ចែករំលែកព័តមាននេះ