លោក ត្រាំ ទមា្លក់អត្រាពន្ធលើឥណ្ឌូណេស៊ីពី ៣២% មកនៅត្រឹម១៩%
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានអះអាងថា លោកបានដោះស្រាយបានកិច្ចព្រមព្រៀងពន្ធមួយផ្សេងទៀត…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានអះអាងថា លោកបានដោះស្រាយបានកិច្ចព្រមព្រៀងពន្ធមួយផ្សេងទៀត ដោយលើកនេះជាមួយនឹងប្រទេសឥណ្ឌូណេស៊ី។ នេះបើតាមប្រភពពីសារព័ត៌មាន BBC ចេញផ្សាយនៅព្រឹកថ្ងៃទី១៦ ខែកក្កដា ឆ្នាំ២០២៥។
លោក ត្រាំ ថា លោកបានយល់ព្រមកាត់បន្ថយពន្ធដែលបានដាក់លើទំនិញឥណ្ឌូណេស៊ីនាំចូលសហរដ្ឋអាមេរិកពី ៣២% មកតែត្រឹម ១៩% ដូច្នេះមានន័យថា អត្រាពន្ធថ្មីរបស់ឥណ្ឌូណេស៊ី គឺទាបជាងប្រទេសផ្សេងទៀតក្នុងតំបន់។ លក្ខខណ្ឌនៃកិច្ចព្រមព្រៀងនេះ មិនត្រូវបានបញ្ជាក់ភ្លាមៗ ដោយភាគីឥណ្ឌូណេស៊ី ដែលជាប្រទេសមានសេដ្ឋកិច្ចធំជាងគេបំផុតនៅអាស៊ីអាគ្នេយ៍ ដែលមានទំនាក់ទំនងពាណិជ្ជកម្មតិចតួច ប៉ុន្តែកំពុងរីកចម្រើនជាមួយសហរដ្ឋអាមេរិក នោះទេ។ ប៉ុន្តែទីភ្នាក់ងារព័ត៌មាន Reuters បានរាយការណ៍ថា មន្ត្រីជាន់ខ្ពស់រដ្ឋាភិបាលឥណ្ឌូណេស៊ីបានលើកឡើងកាលពីថ្ងៃពុធថា សេចក្តីថ្លែងការណ៍មួយនឹងត្រូវបានចេញផ្សាយក្នុងពេលឆាប់ៗនេះ។
លោកប្រធានធិបតី ត្រាំ កាលពីថ្ងៃទី៧ ខែកក្កដា ឆ្នាំ២០២៥ កន្លងទៅ បានបង្ហាញអំពីផែនការពាណិជ្ជកម្មថ្មី ពាក់ព័ន្ធនឹងអត្រាពន្ធគយរបស់លោក ប៉ុន្តែទន្ទឹមជាមួយគ្នានោះ លោកក៏បានពន្យារពេលការដំឡើងពន្ធដើមដែលជាពន្ធកម្រិតខ្ពស់លើទំនិញពីបណ្តាដៃគូសំខាន់ៗរហូតដល់ថ្ងៃទី១ ខែសីហា ឆ្នាំ២០២៥ ដែលនេះជាការពន្យារពេល៣សប្តាហ៍បន្ថែមទៀតពីលើការពន្យារពេលពីមុន ដែលបានផុតកំណត់តាំងពីថ្ងៃទី៩ ខែកក្កដា ឆ្នាំ២០២៥ ចំពេលពិភពលោកកំពុងច្របូកច្របល់យ៉ាងខ្លាំងលើយុទ្ធសាស្ត្រសេដ្ឋកិច្ចដ៏ចម្រូងចម្រាសរបស់លោក។
ប្រទេសឥណ្ឌូណេស៊ី ក៏ស្ថិតក្នុងចំណោមប្រទេសមួយចំនួនផ្សេងទៀត ដែលបានទទួលលិខិតមួយច្បាប់ពីលោក ត្រាំ កាលពីសប្តាហ៍មុន ដោយប្រទេសមួយនេះ នៅតែរងពន្ធ ៣២% ដូចនឹងអត្រាចាស់ ដែលត្រូវបានប្រកាសដំបូងដោយលោក ត្រាំ កាលពីដើមខែមេសាកន្លងទៅ។
យ៉ាងណាមិញ លោក ត្រាំ បានប្រកាសកាលពីថ្ងៃអង្គារថា លោកបានកាត់បន្ថយអត្រាពន្ធលើប្រទេសឥណ្ឌូណេស៊ី បន្ទាប់ពីការហៅទូរស័ព្ទជាមួយប្រធានាធិបតីប្រទេសនេះ។ លោកអះអាងថាជាផ្នែកមួយនៃកិច្ចព្រមព្រៀង ប្រទេសឥណ្ឌូណេស៊ីបានយល់ព្រមកាត់បន្ថយពន្ធពាណិជ្ជកម្មរបស់ខ្លួនសម្រាប់ផលិតផលពីអាមេរិក ដែលអាមេរិកបានត្អូញត្អែរថាមានតម្លៃខ្ពស់សម្រាប់ផលិតផលកសិកម្មជាច្រើន ក៏ដូចជាផលិតផលមួយចំនួនផ្សេងទៀត។ លោក ត្រាំ បានបញ្ជាក់តាមរយៈការបង្ហោះលើបណ្តញសង្គម Truth Social ដូច្នេះថា «ពួកគេ (ឥណ្ឌូណេស៊ី) នឹងបង់ ១៩% ហើយយើងនឹងមិនបង់អ្វីទាំងអស់។ យើងនឹងមានសិទ្ធិពេញលេញចូលទៅកាន់ទីផ្សារប្រទេសឥណ្ឌូណេស៊ី»។
ជាមួយគ្នានោះ ឥណ្ឌូណេស៊ីក៏បានឯកភាពបញ្ជាទិញផលិតផលថាមពលពីអាមេរិកនៅក្នុងទំហំទឹកប្រាក់១៥ពាន់លានដុល្លារ ព្រមទាំងផលិតផលកសិកម្ម ៤,៥ពាន់លានដុល្លារ និងយន្តហោះ Boeing ចំនួន៥០គ្រឿងផងដែរ។ ទោះយ៉ាងណាក៏ដោយ ឥណ្ឌូណេស៊ីមិនបានផ្តល់ពេលវេលាជាក់លាក់ ក្នុងការបញ្ជាទិញផលិតផលពីអាមេរិកនៅឡើយទេ។
គួរបញ្ជាក់ថា ប្រទេសឥណ្ឌូណេស៊ីជាប់ចំណាត់ថ្នាក់ជាដៃគូពាណិជ្ជកម្មមួយក្នុងចំណោមដៃគូពាណិជ្ជកម្មកំពូលទាំង ២៥ របស់អាមេរិក ដោយប្រទេសទាំងពីរទំហំពាណិជ្ជកម្មច្រើនជាង ៣៨ពាន់លានដុល្លារ កាលពីឆ្នាំមុន ខណៈឱនភាពពាណិជ្ជកម្មរវាងប្រទេសទាំងពីរមានចំនួន ១៧,៩ពាន់លានដុល្លារ៕ ប្រភព ៖ BBC និង CNBC
ចែករំលែកព័តមាននេះ