វៀតណាម ៖ អាជ្ញាធរវៀតណាមបានរកឃើញ និងរឹបអូសជើងមាន់បង្កកជាង១៣តោន ដែលត្រូវបានត្រាំ ដើម្បីបំបាត់ពណ៌ បំបាត់ក្លិន ដោយប្រើសារធាតុគីមីគ្រោះថ្នាក់ ត្រៀមបញ្ចេញទៅកាន់ទីផ្សារ ។…
វៀតណាម ៖ អាជ្ញាធរវៀតណាមបានរកឃើញ និងរឹបអូសជើងមាន់បង្កកជាង១៣តោន ដែលត្រូវបានត្រាំ ដើម្បីបំបាត់ពណ៌ បំបាត់ក្លិន ដោយប្រើសារធាតុគីមីគ្រោះថ្នាក់ ត្រៀមបញ្ចេញទៅកាន់ទីផ្សារ ។ ការរកឃើញនេះ ធ្វើឡើងក្នុងប្រតិបត្តិការត្រួតពិនិត្យឃ្លាំងបង្កកមួយកន្លែង នៅខេត្តថាញហ្វា (Thanh Hóa) កាលពីថ្ងៃទី១៤ ខែកក្កដា ឆ្នាំ២០២៥ ។
យោងតាមប្រភពព័ត៌មានពី Dân Trí News របស់វៀតណាម បានឱ្យដឹងថា នាយកដ្ឋាននគរបាលសេដ្ឋកិច្ចនៃស្នងការដ្ឋាននគរបាលខេត្តថាញហ្វា (Thanh Hóa) រួមជាមួយនាយកដ្ឋានគ្រប់គ្រងទីផ្សារ បានចុះត្រួតពិនិត្យភ្លាមៗនូវឃ្លាំងបង្កករបស់សិប្បកម្មកែច្នៃជើងមាន់បង្កក Thanh Binh ដែលស្ថិតនៅតំបន់កំពង់ផែហ៊ុយ (Hói) ក្នុងសង្កាត់ស៊ាំសឿន (Sầm Sơn) ដែលជាកម្មសិទ្ធរបស់លោកស្រី Nguyễn Thị Diệu Hằng អាយុ៣៥ ឆ្នាំ ។
ក្នុងប្រតិបត្តិការឆ្មក់ចូលឆែកឆេរនេះ អាជ្ញាធរបានរកឃើញថា កម្មករជាច្រើននាក់ កំពុងកែច្នៃជើងមាន់បង្កក ក្នុងបរិមាណដ៏ច្រើនសន្ធឹកសន្ធាប់ ខណៈដែលជើងមាន់ទាំងនោះ កំពុងត្រាំក្នុងធុងធំៗជាមួយនឹងទឹកដែលលាយសារធាតុគីមីឈ្មោះ Interox ST 50 (H₂O₂) ដើម្បីធ្វើឱ្យជើងមាន់ស ស្រស់ល្អ មុនពេលយកទៅបង្កក ហើយវេចខ្ចប់ និងចែកចាយទៅកាន់ទីផ្សារ ។
យោងតាមរបាយការណ៍ ជើងមាន់ ដែលរឹបអូសបានមានទម្ងន់សរុបជាង១៣តោន ដោយអាជ្ញាធរបានបញ្ចូនសំណាកជើងមាន់ទៅធ្វើតេស្តមន្ទីរពិសោធន៍ ដើម្បីជាមូលដ្ឋានផ្លូវច្បាប់សម្រាប់ដោះស្រាយករណីនេះ ។
សូមជម្រាបថា Interox ST 50 ដែលគេប្រើត្រាំជើងមាន់ គឺជាសារធាតុគីមីឧស្សាហកម្ម ដែលមានផ្ទុកអ៊ីដ្រូសែន ពែរអុកស៊ីត (H₂O₂) កំហាប់ ៥០% ។ សារធាតុនេះ ជាទូទៅត្រូវបានគេប្រើប្រាស់សម្រាប់ ៖ បន្សុទ្ធទឹកកាកសំណល់, សម្អាតពណ៌ក្រណាត់ បោកគក់សម្លៀកបំពាក់ លាងបង្គន់ ហើយសារធាតុនេះត្រូវបានក្រសួងសុខាភិបាលវៀតណាម ហាមឃាត់មិនឱ្យប្រើប្រាស់នៅក្នុងឧស្សាហកម្ម និងសិប្បកម្មកែច្នៃចំណីអាហារជាដាច់ខាត ។
យ៉ាងណាក៏ដោយ នៅប្រទេសវៀតណាម ជាញឹកញាប់គេតែងរកឃើញ ការប្រើប្រាស់សារធាតុគីមីនេះ ហួសកម្រិតនៅតាមសិប្បកម្មកែច្នៃអាហារដែលនិយមប្រើសារធាតុនេះ ដើម្បីរក្សាពណ៌ឱ្យស ល្អ ដូចជា នំបញ្ចុក ទំពាំងជ្រក់ គ្រឿងក្នុងជ្រូកជាដើម ។
ចំណីអាហារដែលប្រើសារធាតុនេះនឹងបង្កផលប៉ះពាល់ធ្ងន់ធ្ងរដល់សុខភាព រួមមាន ៖ រលាកភ្នាសខាងក្នុង ,ខូចខាតប្រព័ន្ធរំលាយអាហារ, បំផ្លាញថ្លើម និងតម្រងនោម ,បង្កើនហានិភ័យនៃជំងឺមហារីក ដោយសារតែសំណល់អុកស៊ីតកម្មខ្លាំង នៅសេសសល់ ក្នុងអាហារ ។
គួរកត់សម្គាល់ផងដែរថា ក្រៅពីចំណីអាហារ យោងតាមរដ្ឋបាលចំណីអាហារ និងឱសថអាមេរិក (FDA) ក៏ធ្លាប់បានព្រមានដល់អ្នកប្រើប្រាស់ទូទាំងពិភពលោកឱ្យប្រុងប្រយ័ត្នផងដែរ ចំពោះផលិតផល ឱសថ ,គ្រឿងសម្អាង ,ទឹកសម្លា.ប់មេរោគ និងថ្នាំដុះធ្មេញជាដើម សូមកុំទិញ ឬប្រើប្រាស់ផលិតផលដែលមានផ្ទុកអ៊ីដ្រូសែន ពែរអុកស៊ីត ឬហៅខ្លីថា ទឹកអុកស៊ីសែន លើសកម្រិត ដែលបង្កគ្រោះថ្នាក់ធ្ងន់ធ្ងរ និងអាចស្លា.ប់ផងដែរ ប្រសិនបើលេបវាចូល ៕
ចែករំលែកព័តមាននេះ