ទីក្រុងកៀវ៖ ថ្ងៃនេះ ប្រទេសអ៊ុយក្រែនមានទុក្ខជាទម្ងន់បន្ទាប់ពីមន្ត្រីជាន់ខ្ពស់ផ្នែកចារកម្មរបស់ខ្លួនម្នាក់ត្រូវជនមិនស្គាល់មុខបាញ់ស្លាប់នៅចំណតរថយន្តនៃទីក្រុងកៀវ។ បន្ទាប់មក ជនដៃដល់រត់គេចខ្លួនដោយជើងទទេនៅកណ្ដាលថ្ងៃត្រង់។ នេះបើយោងតាមការបង្ហើបឱ្យដឹងពីអាជ្ញាធរ និងរូបវីឌីអូឃ្លីបដែលទាញចេញពីកាមេរ៉ាសុវត្ថិភាព។ រហូតមកដល់ពេលនេះ គេមិនទាន់ដឹងអំពីមូលហេតុនៃអំពើឃាតកម្មនេះទេ។ ប៉ុន្តែជនរងគ្រោះជាមន្ត្រីស៊ើបការណ៍សម្ងាត់ឋានន្តរស័ក្ដិជាវរសេនីយ៍ឯក។
កម្លាំងនគរបាលអ៊ុយក្រែនអះអាងថាខ្លួនកំពុងស្រាវជ្រាវសំណុំរឿងនេះដើម្បីឈានទៅកំណត់អត្តសញ្ញាណរបស់ជនប្រដាប់អាវុធរូបនោះ។ នគរបាលដាក់ផែនការធ្វើម៉េចតាមចាប់ជនបង្កឱ្យបានដើម្បីសួរចម្លើយ។ មន្ត្រីជាន់ខ្ពស់អ៊ុយក្រែនម្នាក់ប្រាប់ថាជនរងគ្រោះជាភ្នាក់ងារបម្រើការនៅក្នុងអង្គភាពសេវាស៊ើបការណ៍សម្ងាត់របស់អ៊ុយក្រែនអែសប៊ីយូ (SBU)។
អែសប៊ីយូជាភ្នាក់ងារស៊ើបការណ៍សម្ងាត់ផ្ទៃក្នុងមានបុគ្គលិករាប់ពាន់នាក់។ ភ្នាក់ងារនេះប្រកាសបើកការស៊ើបអង្កេតសំណុំរឿងឃាតកម្មទៅលើបុគ្គលិករបស់ខ្លួនដែលកើតឡើងនៅសង្កាត់ហូឡូស៊ីវស្គី (Holosiivskyi) នៃទីក្រុងកៀវភាគខាងត្បូង។ អត្តសញ្ញាណរបស់ជនរងគ្រោះមិនត្រូវគេបង្ហាញទេ។ ភ្នាក់ងារអែសប៊ីយូភាគច្រើនធ្វើការលើផ្នែកសន្តិសុខផ្ទៃក្នុង និងប្រឆាំងចារកម្ម។
ប៉ុន្តែចាប់តាំងពីសង្គ្រាមអ៊ុយក្រែនផ្ទុះឡើង ភ្នាក់ងារនេះដើរតួនាទីសំខាន់ក្នុងការបើកប្រតិបត្តិការសឹកពិសេសប្រឆាំងនឹងទីក្រុងម៉ូស្គូ។ ភ្នាក់ងារនេះបានរៀបចំផែនការសម្ងាត់ធ្វើឃាតមន្ត្រីយោធារុស្ស៊ីជាច្រើន។ នៅក្នុងចំណោមស្នាដៃរបស់ពួកគេក៏មានផែនការវាយប្រហារដោយដ្រូនទៅលើមូលដ្ឋានទ័ពអាកាសរុស្ស៊ីឆេះអស់យន្តហោះខ្នាតយក្សជាង៤០គ្រឿង។ ភ្នាក់ងារនេះក៏ធ្លាប់រៀបផែនការធ្វើឃាតឧត្ដមសេនីយ៍យោធាកំពូលរបស់រុស្ស៊ីម្នាក់ដោយដាក់បង្កប់គ្រាប់បែកនៅក្នុងម៉ូតូកូនទា។
នៅក្នុងសំណុំរឿងស្លាប់វរសេនីយ៍ឯករបស់អែសប៊ីយូលើកនេះ ទាំងនគរបាល និងអែសប៊ីយូខ្លួនឯងមិនទាន់ធ្វើអត្ថាធិប្បាយ លម្អិត ឬសន្និដ្ឋានថាបណ្ដាលមកពីមូលហេតុអ្វីពិតប្រាកដទេ។ ប៉ុន្តែសារព័ត៌មានប្រាវដា (Pravda) របស់អ៊ុយក្រែនផ្សាយថាជនរងគ្រោះត្រូវបានបាញ់ប្រហារដោយកាំភ្លើងខ្លីចំនួនប្រាំគ្រាប់ឡើងសុសសាច់។ កាសែតនេះចុះផ្សាយថាបន្តទៀតថាជនរងគ្រោះឈ្មោះអ៊ីវ៉ាន វ៉ូរ៉ូនិច (Ivan Voronych) ជាវរសេនីយ៍ឯករបស់អែសប៊ីយូ។
មន្ត្រីផ្លូវការរបស់រុស្ស៊ីរក្សាភាពស្ងៀមស្ងាត់ និងមិនធ្វើអត្ថាធិប្បាយអ្វីទេ។ ប៉ុន្តែក្រុមអ្នកប្លក់ខឺ (bloggers) ដែលគាំទ្ររុស្ស៊ីបង្ហាញអារម្មណ៍សប្បាយរីករាយណាស់ចំពោះដំណឹងស្លាប់នេះ។ លោកអាឡិចសាន់ដឺ ខត់ (Alexander Kots) ជាអ្នកឆ្លើយឆ្លងព័ត៌មានផ្នែកសង្គ្រាមយល់ថានេះជាស្នាដៃរបស់ភ្នាក់ងារសម្ងាត់រុស្ស៊ី។ លោកថ្លែងថាពួកខ្មាំងចាប់ផ្ដើមភ័យនៅលើទឹកដីរបស់ខ្លួនហើយ។
តាមរយៈវីឌីអូឃ្លីបទាញចេញពីកាមេរ៉ាសុវត្ថិភាពដែលបង្ហោះនៅលើបណ្ដាញសង្គម គេឃើញបុរសម្នាក់ស្លៀកខោខាវប៊យដើរចេញពីអគារស្នាក់នៅ និងដើរតម្រង់ទៅរករថយន្តមួយគ្រឿងនៅក្នុងចំណត។ រំពេចនោះបុរសម្នាក់មិនដឹងរង់ចាំគាត់តាំងពីអង្កាល់បានទៅបាញ់គាត់ប្រាវៗតែម្ដង។ បន្ទាប់មក ជននោះក៏រត់ចេញពីកន្លែងកើតហេតុបាត់ទៅ៕
ចែករំលែកព័តមាននេះ