ខេត្តកំពង់ស្ពឺ ៖ នគរបាលស្រុកភ្នំស្រួចបានធ្វើការស្រាវជ្រាវឃាត់ខ្លួនក្រុមជនដៃដល់ចំនួន០៣នាក់ ក្រោយពីធ្វើសកម្មភាពស្ទាក់កាប់ជនរងគ្រោះបណ្តាលឱ្យរងរបួសត្រូវដៃ និងរងការខូចខាតម៉ូតូ០១គ្រឿង ហើយជិះម៉ូតូគេចខ្លួនបាន០៥ថ្ងៃ ។ នគរបាលស្រុកភ្នំស្រួចបាននិយាយឱ្យដឹងថា មុនឈានដល់ឃាត់ខ្លួនជនដៃដល់ខាងលើ កាលពីថ្ងៃទី០៤…
ខេត្តកំពង់ស្ពឺ ៖ នគរបាលស្រុកភ្នំស្រួចបានធ្វើការស្រាវជ្រាវឃាត់ខ្លួនក្រុមជនដៃដល់ចំនួន០៣នាក់ ក្រោយពីធ្វើសកម្មភាពស្ទាក់កាប់ជនរងគ្រោះបណ្តាលឱ្យរងរបួសត្រូវដៃ និងរងការខូចខាតម៉ូតូ០១គ្រឿង ហើយជិះម៉ូតូគេចខ្លួនបាន០៥ថ្ងៃ ។
នគរបាលស្រុកភ្នំស្រួចបាននិយាយឱ្យដឹងថា មុនឈានដល់ឃាត់ខ្លួនជនដៃដល់ខាងលើ កាលពីថ្ងៃទី០៤ ខែកក្កដា ឆ្នាំ២០២៥ វេលាម៉ោង០៨ និង៣០នាទី ផ្នែកយុត្តិធម៌បានទទួលពាក្យបណ្ដឹងពីឈ្មោះ អាន សុខថាន ភេទប្រុស អាយុ១៨ឆ្នាំ រស់នៅភូមិអំពៅ ឃុំអូរ ស្រុកភ្នំស្រួច បានប្ដឹងនិងរៀបរាប់ថា កាលពីវេលាម៉ោង២៣ និង៥៥នាទីរំលងអធ្រាត្រថ្ងៃទី០៣ ខែកក្កដា ឆ្នាំ២០២៥ នៅផ្លូវបំបែកជាបួន ចំណុចភូមិតាំងស្រឡៅ(ផ្លូវរទេះភ្លើង) ឃុំតាំងស្យា ស្រុកភ្នំស្រួច ខ្លួនបានជិះម៉ូតូ០១គ្រឿង ម៉ាកនិច ពណ៌ស ស៊េរីឆ្នាំ២០២៤ ពាក់ផ្លាកលេខកំពង់ស្ពឺ1Q -9502 ឌុបឈ្មោះ យ៉ើន ប៊ុនហេង ភេទប្រុស អាយុ១៨ឆ្នាំរស់នៅភូមិសំបួរ ឃុំតាំងស្យា ជិះចេញពីផ្ទះរបស់ឈ្មោះ វ័ន ភេទប្រុស អាយុ៣០ឆ្នាំនៅភូមិតាំងស្រឡៅ (ថ្នល់រទេះភ្លើង) មកដល់ចំណុចខាងលើ មានជនសង្ស័យចំនួន០៣នាក់ ប្រដាប់ដោយ ដាវកែច្នៃ០១ដើម បានស្ទាក់កាប់មកលើខ្លួនចំនួនពីរដាវ ចំដៃខាងស្ដាំ និងបានកាប់ម៉ូតូរបស់ខ្លួនខាងលើបណ្ដាលឱ្យរងការខូចខាត ស្តុបខាងស្ដាំ ស្រទបក្បាំងខាងស្ដាំ និងកាប់ដាច់ផ្លាកលេខម៉ូតូពាក់កណ្ដាលថែមទៀតផង ។ ក្រោយពេលក្រុមជនសង្ស័យដៃដល់ធ្វើសកម្មភាពរួចក៏បានជិះម៉ូតូគេចខ្លួនទៅទិសខាងជើងបាត់ ។
នគរបាលស្រុកភ្នំស្រួចបានបន្តថា បើតាមការស្រាវជ្រាវ មកដល់វេលាម៉ោង៩ និង៤០នាទីព្រឹកថ្ងៃទី៨ ខែកក្កដា ឆ្នាំ២០២៥ នគរបាលប៉ុស្តិ៍បានហៅក្រុមជនសង្ស័យចំនួន០៣នាក់ នៅចំណុចភូមិតាំងស្រឡៅ ឃុំតាំងស្យា ស្រុកភ្នំស្រួច មកសាកសួរ ទី១-ឈ្មោះ គ្រីម រ៉ាហ៉ីម ភេទប្រុស អាយុ១៧ឆ្នាំ រស់នៅភូមិផ្សារត្រពាំងក្រឡឹង ឃុំគិរីវ័ន ស្រុកភ្នំស្រួច(អ្នកកាន់ដាវកែច្នៃកាប់ទៅលើជនរងគ្រោះ) ទី២-ឈ្មោះ ផាប់ សុបិន ភេទប្រុស អាយុ១៦ឆ្នាំ រស់នៅភូមិអន្លង់ថ្លឹង ឃុំមហាសាំង ស្រុកភ្នំស្រួច និងទី៣-ឈ្មោះ រុន សុផែន ភេទប្រុស អាយុ១៦ឆ្នាំ រស់នៅភូមិសំបួរ ឃុំតាំងស្យា ស្រុកភ្នំស្រួច ។
នគរបាលស្រុកភ្នំស្រួចបានបញ្ជាក់ទៀតថា ក្រោយពេលឃាត់ក្រុមជនសង្ស័យទាំង០៣នាក់បានឆ្លើយសារភាពថា ពួកខ្លួនពិតជាបានធ្វើសកម្មភាពដូចបានរៀបរាប់ខាងលើរបស់ជនរងគ្រោះពិតប្រាកដមែន ។
បច្ចុប្បន្ន ក្រុមជនដៃដល់ទាំង០៣នាក់ខាងលើ នគរបាលជំនាញបានកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ