ខេត្តព្រៃវែង ៖ មានករណីរថយន្តហ៊ីយ៉ាន់ដាយចំណុះ5តោនមួយគ្រឿង ដឹកស្រាបៀរ ជាង1000កេស បានរអិលធ្លាក់ចុះពីលើស្ពានអ្នកលឿងយ៉ាងលឿន ហើយបានជ្រុលទៅបុកគូថរថយន្តយីឌុបដឹកត្រីមួយគ្រឿងផ្សេងទៀត ដែលកំពុងបើកនៅខាងមុខ ក្នុងទិសដៅស្របគ្នា រួចទើបក្រឡាប់ចេញពីផ្លូវ…
ខេត្តព្រៃវែង ៖ មានករណីរថយន្តហ៊ីយ៉ាន់ដាយចំណុះ5តោនមួយគ្រឿង ដឹកស្រាបៀរ ជាង1000កេស បានរអិលធ្លាក់ចុះពីលើស្ពានអ្នកលឿងយ៉ាងលឿន ហើយបានជ្រុលទៅបុកគូថរថយន្តយីឌុបដឹកត្រីមួយគ្រឿងផ្សេងទៀត ដែលកំពុងបើកនៅខាងមុខ ក្នុងទិសដៅស្របគ្នា រួចទើបក្រឡាប់ចេញពីផ្លូវ ធ្លាក់ចុះទៅដល់ជើងទេខ្ចាយស្រាបៀរពេញព្រៃ។
ហេតុការណ៍នេះ បានកើតឡើងនៅវេលាម៉ោង 9 ព្រឹក ថ្ងៃទី 9 កក្កដា នៅលើកំណត់ផ្លូវជាតិលេខ 1 ត្រង់ចំណុចភូមិជ័យឧត្តម ឃុំព្រែកខ្សាយ ( ក ) ស្រុកពាមរក៍ ខេត្តព្រៃវែង។
តាមការអះអាងរបស់បុរសជាអ្នកបើកបររថយន្តដឹកស្រាបៀរខាងលើ បានឲ្យដឹងថា ពេលដែលរថយន្តរបស់គាត់បើកដល់លើស្ពានអ្នកលឿង ស្រាប់តែផ្ទុះបែកទុយោប្រេងហ្វ្រាំង ធ្វើឲ្យប្រព័ន្ធហ្វ្រាំងគ្រប់គ្រងលែងបាន ស្របពេលដែលរថយន្តកំពុងចុះចំណោទពីលើស្ពានផងនោះ ទើបធ្វើឲ្យរថយន្តរអិលចុះពីលើស្ពានក្នុងល្បឿនយ៉ាងលឿន ចំណែករូបគាត់បានខំព្យាយាមទប់ចង្កូតរថយន្ត រហូតចុះផុតពីលើស្ពាន តែល្បឿនរថយន្តនៅតែរអិលទៅមុខជាងមួយគីឡូដីទៀត រហូតមកដល់កន្លែងកើតហេតុរូបគេបានឃើញរថយន្តយីឌុបដឹកត្រីមួយគ្រឿង កំពុងបើកនៅខាងមុខ ទើបរូបគេទាញចង្កូតទៅបុកគូទរថយន្តយីឌុបនោះ ក្នុងបំណងដើម្បីបញ្ឈប់រថយន្តរបស់ខ្លួន ប៉ុន្តែពេលបុកហើយរថយន្តនៅតែមិនឈប់ ដោយបានជ្រុលទៅបុករបាំងដែកអមសងខាងផ្លូវទៀត រួចទើបក្រឡាប់ធ្លាក់ទៅក្រោមផ្លូវតែម្ដង។
សមត្ថកិច្ចបានឱ្យដឹងថា គ្រោះថ្នាក់ចរាចរណ៍នេះពុំបានបណ្ដាលឲ្យមាននរណាម្នាក់រងគ្រោះថ្នាក់ទេដោយអ្នកបើកបររថយន្តបង្ក បានពាក់ខ្សែក្រវ៉ាត់សុវត្ថិភាព ដូច្នេះហើយទើបគ្រាន់តែរបួសបន្តិច បន្តួចប៉ុណ្ណោះ ចំណែករថយន្តយីឌុបដឹកត្រី ដែលត្រូវរថយន្តបង្កបុក បានបន្តដំណើរទៅមុខបាត់ ដោយមិននៅទាមទារអ្វីឡើយ។
សមត្ថកិច្ចបានបញ្ជាក់ថា ក្រោយកើតហេតុសមត្ថកិច្ចបានហៅម្ចាស់ក្រុមហ៊ុនស្រាបៀរ អោយមកប្រមូលស្រាបៀរ និងរថយន្តទៅរក្សាទុកនៅប៉ុស្តិ៍នគរបាលសិន ហើយធ្វើការដោះស្រាយសំណងដែលធ្វើឲ្យបាក់របាំងដែកអមសល់ខាងផ្លូវជាមួយមន្ទីរសាធារណការសិន ទើបអនុញ្ញាតឲ្យយករថយន្តនិងស្រាបៀរទាំងអស់ត្រឡប់ទៅវិញ ៕
ចែករំលែកព័តមាននេះ